Lilongesa Ondaka Ya Huku

Huku Olie?

Onthele ei ikatula omapulo hamwe uhole okulinga, nokulekesa opi movasi omakumbululo mo Mbimbiliya yove. Onombangi mba Jeova vena ehambu liokupopia noove konthele yomakumbululo oo.

1. Huku Olie?

Huku yotyotyili oyouna Waetako ovipuka aviho. Ombimbiliya imuihana okuti “Ohamba yaapeho,” tyihangununa okuti utupu onthyimbi nonthyulilo. (Revelação 15:3) Mokonda Huku Ondyivindyivi yomuenyo, oe vala tuna okufenda.—Tanga Revelação 4:11.

2. Huku ukahi ñgeni?

Nawike unemone Huku mokonda Huku Ospilitu, tyilekesa okuti omuenyo wae wavilapo vali tyipona ovipuka aviho vina omuenyo kombanda yoohi. (João 1:18; 4:24) Onkhalelo Huku atuwa italelwa kovipuka oe atunga. Mongeleka, tyina tutala evi atunga novinyango vielikalaila, no nonthemo, tuimbuka okuti Huku una oluembia nounongo. Ounene wouye utulekesa epondolo lia Huku.—Tanga Romanos 1:20.

Tupondola okunoñgonoka vali onkhalelo Huku atuwa tyina tutanga Ombimbiliya. Mongeleka, Ombimbiliya itupopila etyi Huku ehole netyi eyele, oñgeni atekula ovanthu, no ñgeni atetulula kese tyitateka.—Tanga Salmo 103:7-10.

3. Okuti Huku una enyina?

Jesus wati: “Tate yetu keulu, enyina liove lisukukiswe.” (Mateus 6:9) Namphila Huku ena omanyina omanyingi enkhimano, mahi enyina liae like vala. Kese laka, ovanthu vatumbula enyina olio mononkhalelo mbelikalaila. Molunyaneka liihanwa okuti “Jeova.”—Tanga Salmo 83:18.

Mono Mbimbiliya ononyingi enyina lia Huku ovanthu velipolamo avapingiyapo Tatekulu ine Huku. Mahi etyi Ombimbiliya yahonekwa, ankho enyina lia Huku livasiwamo ovikando vihika po 7.000. Jesus wanoñgonokesile enyina lia Huku mokulitumbula tyina ankho ahangununina ovanthu Ondaka ya Huku. Oe wakuatesileko ovanthu okunoñgonoka Huku.—Tanga João 17:26.

4. Okuti Jeova wesuka nonthue?

Jeova ulekesa okuti wesuka nonthue mokutehelela omalikuambelo etu. (Salmo 65:2) Okuti tyina tumona ononkhumbi ononene tyilekesa okuti Huku kesukile nonthue? Ovanthu vamwe vati Huku utumonesa ononkhumbi pala okutulola, mahi otyo hatyiliko. Ombimbiliya yati: “Okulinga ovivi tyikahi kokule na Huku.”—Jó 34:10; tanga Tiago 1:13.

Huku uhumba ovanthu mokuveavela epondolo liokuholovona. Okuti tupanda epondolo olio mokuholovona okuumbila Huku? (Josué 24:15) Ovanyingi vehole okumona unene ononkhumbi mokonda vaholovona okulinga ovivi vakuavo. Jeova tyimuihama unene komutima tyina atala ovivi.—Tanga Gênesis 6:5, 6.

Apa katutu Jeova matumu Jesus amaneko ononkhumbi na vana vembuetako. Tyina ehenetyilinge, Jeova una omahunga omawa okuyekelako nkhele ovivi. Ononthele ononkhuavo komutwe mambukahangununa omokonda yatyi Huku ayekelako ononkhumbi.—Tanga Isaías 11:4.

5. Huku uhanda tulinge tyi?

Jeova wetutunga nounongo wokumunoñgonoka nokukala nohole nae. Oe uhanda tunoñgonoke otyili konthele yae. (1 Timóteo 2:4) Inkha tulilongesa Ombimbiliya tupondola okumunoñgonoka ngatyina Epanga.—Tanga Provérbios 2:4, 5.

Mokonda Jeova oe wetuavela omuenyo, tuesukisa okukala nohole nae tyipona kese umwe tuhole. Tupondola okulekesa okuti tuhole Huku mokupopia nae melikuambelo nokulinga etyi etuita. (Provérbios 15:8) Jeova utuita tutekule ovanthu vakuetu nohole.—Tanga Marcos 12:29, 30; 1 João 5:3.

Opo unoñgonoke vali konthele oyo, tala okapitulu 1 komukanda ou walingua no Nombangi mba Jeova Ityi Ombimbiliya Tyili Ilongesa?

[Olutalatu pefo 23]

Okuti Huku una ehunga ewa liokuyekelela nkhele ononkhumbi?