5 Huku Utavela Omafendelo Aeho Okuti Otyo Otyili?

Ove hamwe uhole okuiva okuti: “Ngetyi kuna onondyila ononyingi mbutuala komphangu ike, tupu kuna onondyila ononyingi mbutuala ku Huku. Kese umwe una okuvasa ondyila yae imutuala ku Huku.”

Oityi Ombimbiliya ilongesa: Tuna okufenda noukuatyili, okulityilika omalityindailo, nemphinia. Jesus wapopilile ononkhalamutwe mbonongeleya kononthiki mbae oityi Huku eveanyena. Wati: “Isaia wetyipopia nawa konthele yenyi, vemphinia okuti: ‘Ovanthu ava vampha vala ehumbilo nomilungu, anthi omitima viavo vikahi kokule naame.’” (Marcos 7:6) Mahi, okukala vala omukuatyili katyilekesa okuti Huku metavela efendelo lietu.

Jesus wetyiyandyulula nawa mokuahololola etyi ankho tyahaviukile mefendelo lio nonkhalamutwe mbonongeleya novalanduli vavo. Oe wevepopila onondaka ombu mba Huku: “Vatualako okundingila efendelo lihasilivila, mokonda valongesa omalongeso vatumwa novanthu.” (Marcos 7:7) Efendelo liavo ankho “kalisilivila,” mokonda ankho vapaka komutwe oviso vionongeleya mbavo, avahalandula ovitumino via Huku.

Ombimbiliya kaipopi okuti kuna onondyila ononyingi mbutuala ku Huku, anthi ipopia ondyila ike vala. Mateus 7:13, 14 yati: “Nyingililei mombundi yahita. Mokonda onthanda nokuahandyuka etapalo lituala kehanyauno, iya ovanyingi omo vekahi nokunyingilila. Anthi, ombundi onthutu nondyila yahita, ituala komuenyo, iya kavehi vekahi nokuivasa.”

Oñgeni okunoñgonoka otyili konthele ya Huku matyikukuatesako: Nkhele soka ñgeno ukahi movinyano viokulilola okuhateka opo ufetwe, mahi tyina uhika kombitulilo atyitiwa kumafetwa mokonda wapangesa ovitumino konthele yokuhateka. Molitehela okuti ononkhono walinga ambuho mbapeseka vala. Okuti nefendelo lietu ku Huku lipondola okukala ngotyo?

Okueleka efendelo lietu novanthu vokuhateka apostolu Paulu wahoneka okuti: “Tupu, tyina omunthu ahateka okulilola, movinyano viokuhateka kapewa ondyambi inkha kaendelele movitumino viaitwa.” (2 Timóteo 2:5) Opo efendelo lietu lipandwe na Huku tuna okufenda monkhalelo “yelikuata novitumino,” okulinga ngetyi oe ahanda. Ngetyi vokuhateka vahapondola okuhateka ngetyi ovo muene vahanda, nonthwe katupondola okupandwa na Huku inkha tuovola okumufenda monkhalelo onthwe muene tuhanda.

Opo tupandwe na Huku, efendelo lietu lina okukula tyihena ounkhembi konthele yae. Jesus wati: “Ovafendeli votyotyili, mavafende Tate nospilitu notyili.” (João 4:23) Onthwe tulilongesa onondyila mbotyili mba Huku, Mondaka yae Ombimbiliya.—João 17:17.a

[Onondaka Poutoi]

[Onondaka Mbavilapo pefo 8]

Okuti onongeleya ambuho mbulongesa ovanthu okufenda Huku ngetyi oe apanda?