Lilongesa Ondaka Ya Huku

Oñgeni Ovitumino via Huku Vituetela Ouwa?

Monthele ei muna omapulo amwe hamwe uhole okulinga, nokulekesa apa movasi omakumbululo Mombimbiliya yove. Onombangi mba Jeova mavakala nehambu liokutomphola noove konthele yomakumbululo oo.

1. Oityi tuesukisila okutavela ku Huku?

Tuesukisa okutavela ku Huku mokonda oe wetulinga. Alo umwe Jesus apeho ankho utavela ku Huku. (João 6:38; Revelação 4:11) Ovitumino via Huku vituikulila ondyila yokulekesa okuti tumuhole.—Tanga 1 João 5:3.

Ovitumino aviho via Jeova Huku oviwa pala onthue. Vitulongesa onkhalelo ongwa yomuenyo pahetyino, nokulekesa oñgeni tupondola okukamona ondyambi yomuenyo wahapu komutwe.—Tanga Salmo 19:7, 11; Isaías 48:17, 18.

2. Oñgeni ovitumino via Huku vitukalesa nekongoko ewa?

Ovitumino via Huku konthele younkholwa, vituamena komauvela aipaa no koviponga. Okutyiliya okunwa unene tyituala kowova. (Provérbios 23:20, 29, 30) Jeova utuyeka tunue, mahi monkhalelo yapola pokati.—Tanga Salmo 104:15; 1 Coríntios 6:10.

Jeova tupu utulondola konthele yonkhi, nokunumana unene, novituwa ovikuavo vinyona. Tyina tulandula onondonga mbae tukala nekongoko ewa.—Tanga Provérbios 14:30; 22:24, 25.

3. Oñgeni ovitumino via Huku vituamena?

Ovitumino via Huku viilika otyihola kondye yotyinepo. (Hebreus 13:4) Ovalinepi vetavela otyitumino otyo vakala vali nepamo, nokuetela ehambu ovana vavo. Tupu, otyihola kondye yotyinepo, ovikando ovinyingi tyieta omauvela, nokulihenga, novilwa, noluihamo komutima, novana vatekulwa vala na he ine na ina.—Tanga Provérbios 5:1-9.

Mokulityilika ovipuka vituhongiliya okulinga otyihola kondye yotyinepo, tuyakulila oupanga wetu na Huku. Tupu tulityilika okunyona vakuetu.—Tanga 1 Tessalonicenses 4:3-6.

4. Oñgeni okukala nonthilo nomuenyo tyituetela ouwa?

Ovanthu vokuna onthilo notyiawa tya Huku, omuenyo, vakala nekongoko ewa tyina vayekapo otyituwa otyivi tyokupuena, novituwa ovikuavo viipaa. (2 Coríntios 7:1) Huku upanda alo umwe omuenyo wolukembe lukahi meimo. (Êxodo 21:22, 23) Moluotyo, katupondola okuipaa tyawina olukembe luhenetyitwe. Tupu, vana vetavela etyi Huku apopia konthele yomuenyo, vayunga nawa ovipuka viavo kovilinga, meumbo, netukutuku. (Deuteronômio 22:8) Tupu, kavelipake movitalukiso vipaka omuenyo motyiponga mokonda omuenyo otyali tya Huku.—Tanga Salmo 36:9.

5. Oñgeni okukala nonthilo nohonde tyituetela ouwa?

Ohonde ikola mokonda Huku wati oyo omuenyo ine ohande. (Gênesis 9:3, 4) Otyitumino tya Huku tyipopia okuti ohonde omuenyo, tyituetela ouwa. Ñgeni? Ohonde yaikula ondyila pala okuevela ononkhali. —Tanga Levítico 17:11-13; Hebreus 9:22.

Ohonde ya Jesus yakolela unene mokonda oe ankho utupu onkhali. Jesus wapakula ku Huku omuenyo wae—ohonde yae. (Hebreus 9:12) Ohonde yae yamomeswa ituikulila ondyila yokukala nomuenyo uhapu.—Tanga Mateus 26:28; João 3:16.

Opo unoñgonoke vali konthele oyo, tala ovikapitulu 12 ne 13 komukanda ou, walingua no Nombangi mba Jeova. Oityi Ombimbiliya Tyili Ilongesa?