Harmagedom Vamwe Vapopia Okuti Oityi?

“Iya aveveongiya pomphangu itiwa Armagedom, melaka lio Hebreu.”—REVELAÇÃO 16:16, João Ferreira de Almeida.

OITYI usoka tyina wiva ondaka “Armagedom”? Tyafuile usoka komphepo onene ihanyauna onondyuo novikuavo vali. Namphila ondaka oyo imoneka vala Mombimbiliya otyikando tyike, ononkhalamutwe mbonongeleya, na vana vaundapa mo televisau no molaliu, veipopia unene.

Okuti etyi ovanthu vapopia konthele yo Armagedom tyelifwa netyi Ombimbiliya ilongesa? Tyakolela unene okunoñgonoka ekumbululo. Mokonda yatyi? Mokonda otyili konthele yo Armagedom matyikuyovola kowoma, nokunoñgonoka etyi tyikahi komutwe, nokulunda onkhalelo yove yokusoka konthele ya Huku.

Tala omapulo etatu alandulako, nokueleka etyi ovanthu vasoka konthele yo Armagedom, netyi Ombimbiliya tyilityili ilongesa.

1. OKUTI O ARMAGENDOM MAIYETUA NOVANTHU?

Vana vaundapa mo TV, no molaliu, novanongo vomouye, ovikando ovinyingi vaundapesa ondaka “Armagedom” pala okuhangununa oviponga ovinene vihole okuetuako novanthu. Mongeleka, Ovita Viotete no Viavali Viouye Auho, ankho veviihana okuti o Armagedom. Konyima yovita ovio, ovanthu ankho vena owoma wokuti o Estados Unidos no União Soviética mavekelilwisa nomauta omanene. O televisau, nono jornale, vaihana ovilwa ovio okuti o “Armagedom.” Hono, ovanongo vomouye vokuna owoma wokuti omphepo yasila maikaeta omapiluluko omanene pano pohi, valondola ovanthu okuti makuya o “Armagedom yomphepo.”

Etyi ovanthu vasoka: Etyi matyikapita komutwe noohi, nomuenyo auho, tyitei kovanthu. Inkha ovatumini kavalingi ovipuka nonondunge, oohi maikanyoneka apeho.

Etyi Ombimbiliya ilongesa: Huku kamayeke ovanthu vahanyaune oohi. Ombimbiliya itupopila okuti Jeovaa kalingile oohi opo “ikale vala ngotyo.” Mahi, weitunga “opo mukale ovanthu.” (Isaías 45:18) Huku kamayeke ovanthu vahanyauneko oohi, anthi, “makahanyako vana vekahi nokuhanyauna oohi.”—Revelação 11:18.

2. OKUTI O ARMAGENDOM MAIYA VALA AIKE?

Vokuundapa mo televisau no molaliu, ovikando ovinyingi vapopia ondaka “Armagedom” tyina pamoneka otyiponga otyinene. Mongeleka, mo 2010, omukanda umwe wapopia konthele yo “‘Armagedom’ mo Haiti.” Wapopia ononkhumbi, nehanyauno, novanthu vaipawa notyinimawe tyaendele motyilongo otyo. Vokuundapa mo televisau, no vokulinga osinema, kavapopi vala o Armagedom konthele yovipuka viaendakuale mahi nevi vatila okuti mavikamoneka komutwe. Mongeleka, vehole okuundapesa ondaka “Armagedom” pala okupopia ehanyauno malietuako novipuka vikahi ngomamanya mavikatunda keulu avitutanena pohi.

Etyi ovanthu vasoka: O Armagedom otyipuka tyimwe matyiya vala atyiipaa aveho. Petupu etyi upondola okulinga opo uhupe.

Etyi Ombimbiliya ilongesa: O Armagedom kamaiya okuipaa aveho. Mahi, o Armagedom, maikaipaa vala onondingavivi. Ombimbiliya ilaa okuti apa katutu “ondingavivi kamaikakalako vali. Mokatala pana ankho ikala, mahi kukeivasapo vali.”—Salmo 37:10.

3. OKUTI MO ARMAGEDOM HUKU MAKAHANYAKO OOHI?

Ovanthu ovanyingi vongeleya, vetavela okuti makukakala ovilwa viahulililako pokati kotyiwa notyivi, iya otyo matyikamanako oohi yetu. Ovanthu valamba po 400 vapulwa mo Estados Unidos no Princeton Survey Research Associates, vetavela okuti ouye maukapuako “movilwa vio Armagedom.”

Etyi ovanthu valongesa: Ovanthu kavalingilwe pala okukala apeho pano pohi, tupu oohi kayalingilwe opo ikaleko apeho. Huku watunga ovanthu opo vakaleko vala katutu, konyima avankhi.

Etyi Ombimbiliya ilongesa: Ombimbiliya ipopia nokuayandyuluka okuti Huku “watunga oohi pomphangu yaviuka nawa. Kamaikatengaiswa, omuvo uhapu ine apeho, apeho.” (Salmo 104:5) Ombimbiliya ipopia konthele yovanthu mavakakala pano pohi okuti: “Ovaviuki mavapiñgana oohi, avakakalamo apeho.”—Salmo 37:29.

Tyimoneka nawa okuti Ombimbiliya kaitavela etyi ovanthu vapopia konthele yo Armagedom. Mahi, otyili tyikahi pi?

[Onondaka Poutoi]