Ovatangi Vapula . . .

Okuti Oohi Maikahanyuako?

▪ Vamwe ankho vetavela okuti oohi maihanyuako mu 21 ya Kulindi yo 2011. Mahi otyo katyamonekele. Ngotyo, eulo lia Harold Camping uundapa molaliu ko Amelika, kaliafuisiluepo. Oe waulile okuti Onthiki Yekoyeso maiya mu 21 ya Kapepo yo 2011, makukaenda otyinimawe tyimwe otyinene ouye auho, iya tyina pamalambe onohanyi ononthano, mu 21 ya Kulindi, oohi aiho maihanyuako.

Mahi, oohi nalumwe maihanyuako. Omutungi woohi kemetyiyeke. Ondaka yae yati: “Ove wapameka oohi opo itualeko yapama.”—Salmo 119:90.

Mahi, vamwe vatanga Ombimbiliya vapondola okupopia okuti oohi ino maikahanyuako notupia. Vapopia onondaka mbukahi mu 2 Pedro 3:7, 10 opo veliamene, mbati: “Nondaka yatyo oyo, eulu noohi vikahiko hono, viapakwa pala otupia, nonthiki yekoyeso no yehanyauno liovanthu onondingavivi. . . . Anthi, onthiki ya Jeova maiya ngo tyimphulu, eulu malikanyimako nokuayuela unene. Mahi mokonda yomutokoto omunene ovipuka mavikasengululwa, iya oohi novilinga vikahimo mavikahololoka.” Okuti apostolu Petulu ankho ukahi umwe nokupopia oohi ino neulu tuete?

Au. Mokonda yatyi? Omokonda opo unoñgonoke nawa onoversikulu ombo wesukisa okueleka etyi Petulu apopia mo noversikulu ononkuavo mbomukanda wae, netyi tyipopia ononthele ononkhuavo Mbombimbiliya. Okusoka okuti onoversikulu ombo mbupopia eulu eli, matyilekesa okuti ouye ine eulu, kumwe no nonthungululu novikuavo vali, mavihanyuako notupia mokonda vala yovanthu onondingavivi vehehi. Okuti ove upondola okuhanyauna onthumbo onene yoluheke mokonda yokañgima keke vala wahahandele? Okulinga ngotyo katyaviukile! Tupu, Jeova kamahanyeko ouye auho mokonda vala ya vamwe vakala onomphuki.

Tupu, okusoka ngotyo katyilikuate nonondaka mba Jesus Kristu wati: “Vomutima wapoleya ovana-mbembwa, mokonda mavakapiñgana oohi.” (Mateus 5:5; Salmo 37:29) Okuti he wokuna oluembia, upondola okutungila ombunga yae ondyuo ongwa opo ha eihanyeko notupia? (Salmo 115:16) Otyo owova! Jeova ha Mutungi vala mahi tupu Ohe woluembia.—Salmo 103:13; 1 João 4:8.

Petulu waundapesa ondaka “oohi”, pala okupopia ovanthu, mahi monkhalelo oyo ovanthu onondingavivi. Tala okuti Petulu wetyieleka Nombila Onene kononthiki mba Noe. (2 Pedro 3:5, 6) Pomuvo opo, ovanthu onondingavivi ovo vala vahanyauninueko, oohi nomuviuki Noe nombunga yae vahupile. Tupu Petulu wapopia “eulu” ngotyilekeso vala. Monkhalelo oyo, “eulu” ovatumini vouye uno wovivi. Ngotyo, onondingavivi vehelivele mavanyimuako, kumwe novatumini aveho onondingavivi, mavakasenguluka, nokupingwa noutumini wa Huku wokeulu, ine Ouhamba.—Daniel 2:44.

Okuti oohi maikahanyuako? Au. Mavakahanyuako ovanthu onondingavivi, vaelekwa no ohi. Oohi ino novanthu vetavela Huku mavakakalako apeho.—Provérbios 2:21, 22.