Lilongesa Ondaka ya Huku
Onondaka Onongwa Konthele Yongeleya Oityi?
Onthele ei ipopia omapulo hamwe ove wasukalala nao, nokulekesa opi upondola okuvasa omakumbululo Mombimbiliya yove. Onombangi mba Jeova vena ehambu liokutomphola nove omakumbululo oo.
1. Okuti onongeleya ambuho onongwa?
Monongeleya ononyingi muna ovanthu vena omitima omiwa vahanda okuhambukiswa Huku. Huku weete ovanthu ovo, iya wesuka navo. Mahi ovanthu vamwe, vaundapesa ongeleya opo valinge ovivi. Kohale, ononkhalamutwe mbonongeleya ankho valinga onya onondyale mbavo. (2 Coríntios 4:3, 4; 11:13-15) Ngetyi tyilekesa omikanda, no televisau, hono ononkhalamutwe mbumwe mbonongeleya valunda ovanthu velipake moungangala, ine okuaamena ovita, ine okulala novana kononkhono.—Tanga Mateus 24:3-5, 11, 12.
Ombimbiliya ilongesa okuti kuna onongeleya onombali, imwe oyotyotyili, onkhuavo oyomatutu. Ongeleya yomatutu kailongesa otyili konthele ya Huku. Mahi, Jeova Huku uhanda ovanthu vanoñgonoke otyili konthele yae.—Tanga 1 Timóteo 2:3-5.
2. Onondaka onongwa konthele yongeleya oityi?
Huku kahande ovanthu vayondyue nonongeleya mbupopia okuti vemuhole, mahi otyo vahalongesa otyili konthele yae. Tyilityili, ovanthu vonongeleya ombo omapanga ouye ukahi nokutuminwa na Satanasi, Eliapu. (Tiago 4:4; 1 João 5:19) Ondaka ya Huku ipopia okuti, onongeleya mbuyumba onthumbi movatumini tyipona ku Huku, mbukahi ngekunga. Ombimbiliya iihana ekunga olio okuti “Ombambilonia Onene,” enyina liepundaumbo omu muahimbika ongeleya yomatutu konyima Yombila Onene kononthiki mba Noe. Apa katutu, Huku makahanyako onongeleya mbukahi nokuyondya nokumonesa emone ovanthu.—Tanga Revelação 17:1, 2, 5, 17; 18:8, 23, 24.
3. Oñgeni Huku makaetela ehambu ovanthu aveho?
Ekoyeso lionongeleya mbomatutu malikalingwa apa katutu, onondaka onongwa. Malikamanako ononkhumbi mouye auho. Onongeleya mbomatutu kamambukayondya vali ovanthu nokuveyapula. Aveho mavakafenda vala Huku wike wotyotyili.—Tanga Isaías 11:9; Revelação 18:20, 21; 21:3, 4.
4. Oityi ovanthu vomutima waviuka vesukisa okulinga?
Jeova kalimbuilwe ovanthu vomutima waviuka vekahi monongeleya mbomatutu mouye auho. Oe hono ukahi nokuongiya ovanthu ovo mokuvelongesa otyili.—Tanga Miquéias 4:2, 5.
Jeova utambula nawa mombunga yae vana vahanda okumufenda. Namphila omapanga etu, nombunga vanumana tyina tuhimbika okuumbila Jeova, onthue matukala nouwa omunene. Tukala omapanga a Huku, “nombunga” omphe ina ohole, nekevelelo liokukala nomuenyo uhapu.—Tanga Marcos 10:29, 30; 2 Coríntios 6:17, 18.
[Ehangununo liolutalatu pefo 27]
Opo unoñgonoke vali konthele oyo, tala ovikapitulu 15 no 16 viomukanda ou, walingua no Nombangi mba Jeova.
[Ehangununo liolutalatu pefo 27]
OITYI OMBIMBILIYA Tyili ILONGESA?
[Ehangununo liolutalatu pefo 26]
The Complete Encyclopedia of Illustration /J. G. Heck