Okuti Ombimbiliya Omukanda Umwe Vala Ngomikuavo?
“Ovihonekwa aviho viatumwa okuhonekwa na Huku nokuna esilivilo . . . , opo omunthu wa Huku akale tyafuapo nawa, nokuapongiyua nawa pala ovilinga aviho oviwa.”—2 TIMÓTEO 3:16, 17.
OVANTHU vamwe kavetavela onondaka ombo mbahonekwa pombanda. Iya ove? Ponondaka ombu mambulandulako, ombupi mbaviuka konthele Yombimbiliya?
• Omukanda umwe vala omuwa
• Yelifwa nomikanda omikuavo ominyingi vikola
• Omukanda womahipululo upopia konthele yovituwa
• Ondaka ya Huku
Mahi pena epulo limwe: Okuti etyi utavela tyakolela? Tala etyi Ombimbiliya muene ipopia: “Ovipuka aviho viahonekwa kohale, viahonekwa pala okutulonga, opo tukale nekevelelo, mokonda yekoleleyo lietu neungumaneso lio Vihonekwa.” (Romanos 15:4) Ombimbiliya ipopia okuti yahonekwa opo itulongese, nokutupameka, nokutuavela ekevelelo.
Okuti Ombimbiliya omukanda umwe vala omuwa ine yelifwa nomikanda omikuavo ominyingi vikola? Inkha ongotyo, okuti ñgeno wayumbako onthumbi opo ikulongese ove nombunga yove, haunene inkha onondaka mbukahimo mbelikalela netyi usoka okuti tyaviuka? Inkha Ombimbiliya omukanda womahipululo, ñgeno wapolako epameko, nekevelelo komilao viayo?
Tupu, ovanthu ovanyingi vokulilongesa Ombimbiliya vena onthumbi yokuti oyo Ondaka ya Huku. Mokonda yatyi? Oityi tyilekesa okuti Ombimbiliya yelikalela nomikanda omikuavo? Tukuita ulilongese ovipuka vitano mononthele mambulandulako vilekesa omokonda yatyi Ombimbiliya, yelikalela nomikanda omikuavo.