Fuena Komuteheleli Womalikuambelo

OVANYINGI vetavela okuti kuna Huku, kavetyivili okupopia omokonda yatyi vena ekolelo. Tupu kavetyivili okupopia omokonda yatyi onongeleya apeho mbulingila ovivi, ine omokonda yatyi Huku ayekelako ononkhumbi. Mahi, aveho velikuambela ku Huku vehei.

Mahi, ove upondola okufuena vali ku Huku. Upondola okupameka ekolelo liove mokukala nenoñgonoko lia Huku likukalesa nohole nae nokumupanda. Ekolelo liotyotyili lituka kuetyi tyimoneka. (Hebreus 11:1) Inkha ulilongesa otyili konthele ya Huku, upondola okumunoñgonoka nokupopia nae ngatyina upopia nepanga. Tala onongeleka mbovanthu vamwe velikuambela namphila ankho vehetavela okuti kuna Huku.

◼ Patricia, wapopiwa monthele yotete. Wati: “Nthiki imwe, ankho ndyikahi nomapanga ange ekwi, etyi vahimbika okupopia konthele yongeleya. Andyivepopila okuti natunda meumbo mokonda tate yange ankho uhetavela okuti kuna Huku, ankho ukahi nokutomphola Nombangi imwe ya Jeova weile meumbo lietu. Umwe pomapanga ange wati, ‘hamwe Onombangi mba Jeova vapopia otyili.’

Umwe puvo wati: “‘Omokonda yatyi tuhaila keliongiyo liavo tukatale?’ Iya otyo tualinga. Namphila ankho tuhetavela, vamwe puonthue vatuaileko okuenda komaliongiyo mokonda Onombangi ankho vetutambula nawa.

“Mahi, mo Tyalumingu natehelela otyipuka tyimwe tyapilulula olusoke luange. Omulongomoni wahangununa omokonda yatyi ovanthu vamonena emone. Ame ankho hityii okuti omunthu ponthyimbi ankho walingua tyehena nkhali, nokuti onkhali nononkhia mbahimbika nomunthu wike iya ambuliyandyana kovanthu aveho. Omulongomoni tupu wahangununa omokonda yatyi ononkhia mba Jesus ankho mbesukisa opo ovanthu vakale vali netyi omunthu wotete apesela.a (Romanos 5:12, 18, 19) Liwa-liwa andyinoñgonoka okuti atyiho tyapopiwa tyaviuka. ‘Andyitavela okuti, tyilityili kuna Huku wesuka nonthue.’ Natualako okulilongesa Ombimbiliya, iya otyikando tyotete momuenyo wange, nanoñgonoka okuti ndyipondola okulikuambela ku Huku wotyotyili.”

◼ Allan, tupu wapopiua monthele yotete. Wati: “Nthiki imwe Onombangi mba Jeova veile meumbo lietu, omukai wange eveiti vanyingile mokonda oe ankho wesuka netyi vapopia konthele yokukala nomuenyo wahapu pano pohi. Ame ankho nanumana. Moluotyo, nevesapo, andyiihanena omukai wange motyitelekwa, andyipopi nae okuti, ‘Ove soka nawa. Uhetavele ovipuka ovio!’

Omukai akumbulula okuti: “‘Endako ove muene, otale inkha vekahi nokukemba.’

“Tyotyili, hetyivilile okulekesa okuti ovo vekahi nokukemba. Mahi, vapopia nohole naame, avamphe omukanda upopia inkha omuenyo waetuako ine weya vala ngotyo. Ankho tyayandyuluka nawa, okuti vapopia otyili, andyitokola okunoñgonoka vali konthele ya Huku. Nahimbika okulilongesa Ombimbiliya no Nombangi, iya liwa-liwa andyiimbuka okuti etyi vapopia tyelikalela unene novipuka ankho ndyii konthele yongeleya. Etyi nanoñgonoka Jeova, andyihimbika okulikuambela kwe. Ankho ndyitupu ovituwa oviwa, moluotyo nelikuambela opo ankhuateseko. Pahe ankho ndyityii okuti Jeova makumbulula omalikuambelo ange.”

◼ Andrew, ukala ko Inglaterra. Wati: “Namphila ankho omatokolo ange apama, nokuesuka nounongo wouye, ankho ndyitavela okuti ovanthu vatuka kovinyama mokonda vala vakuetu ankho vapopia okuti otyo otyili. Ankho hitavela ku Huku mokonda yovivi aviho vikahiko.

“Pamwe ankho ndyisoka okuti: ‘Inkha kuna Huku, nahanda okunoñgonoka omokonda yatyi kuakalela oungangala novita?’ Tyina ndyina ovitateka, pamwe ndyilikuambela okuita ombatelo, mahi ankho hityii okulie ndyilikuambela.

“Omunthu umwe waavela omukai wange otratadu yalingwa no Nombangi mba Jeova yati, Pode Este Mundo Sobreviver? Tyotyili, apeho ankho ndyilipula ngotyo. Otratadu yanthuala okulipula konthele Yombimbiliya, ‘Okuti omakumbululo Ombimbiliya akolela?’ Etyi ankho ndyikahi konofelia, omunthu umwe wandyavela omukanda A Bíblia — Palavra de Deus ou de Homem?b Etyi nanoñgonoka okuti Ombimbiliya yelikuata nounongo wouye, nelitehela okuti nesukisa okulilongesa vali konthele Yombimbiliya. Moluotyo, etyi Ombangi imwe ya Jeova aita andongese Ombimbiliya, andyitavela. Etyi nanoñgonoka evangelo lia Jeova, natala okuti ndyimui nawa ngomunthu, una ndyipondola okupopia nae melikuambelo.”

◼ Jan, wekulila mongeleya yo Protestante mo Londres. Wati: “Ame nayekapo okuenda kongeleya mokonda younkhembi monongeleya, no nonkhumbi mbutualako. Tupu nayekapo osikola, andyihimbika okuimba nokuhika otyihumba opo ndyimone onombongo. Pomuvo opo andyinoñgonoka Pat. Oe ankho o Katolika, iya atundumo ngetyi nalinga.

“Tuakala mondyuo imwe ankho ihakalwa vali, navakuetu vapuena epangwe ankho vesuka nonongeleya mbo Koutundilo. Kounthiki, ankho tukala onoola ononyingi nokutomphola konthele yomuenyo. Namphila ame na Pat ankho tuehetavela ku Huku, mahi ankho tusoka okuti kuna ononkhono mbumwe ‘mbaetako omuenyo.’

“Etyi tuailukila ko Inglaterra okukaovola ovilinga viokuimba, opo omona wetu akutulwa. Motyinthiki tyimwe omona avele, andyilikuambela namphila ankho nehetavela okuti kuna Huku. Konyima yotyo, atuliyekepo na Pat, napolapo omona wange, Pat andyimusipo. Nelikuambela vali okuita ombatelo, hamwe pena ou manthehelela. Ame ankho hityii, mahi Pat nae ankho ulikuambela.

“Onthiki onkhuavo, Onombangi mba Jeova veya peumbo lia Pat, avemulekesa omalondolo amwe akolela Ombimbiliya. Pat andyihana amphulu inkha naame ndyihanda okulilongesa Ombimbiliya no Nombangi. Liwa-liwa tuelilongesa okuti opo tuhambukiswe Huku, tuna okukahonekesa otyinepo tyetu. Ankho tyimoneka ngoti kamatutyivili mokonda ankho tuna ovitateka ovinyingi.

“Ankho tuhanda okunoñgonoka vali konthele yomaulo Ombimbiliya afuiswapo, nomokonda yatyi kuakalela emone, netyi tyihangununa Ouhamba wa Huku. Katutu-katutu, tuanoñgonoka okuti Huku wesuka nonthue, iya ankho tuhanda okulinga etyi apopia. Tuelihonekesa. Ounongo Wondaka ya Huku wetukuatesako okutekula ovana vetu vetatu. Tuna onthumbi yokuti Jeova watehelela omalikuambelo etu.”

Litalelako Ove Muene

Ovanthu ovanyingi ovakuavo, ngaava vapopiwa monthele ei, namphila ankho vakembwa nonongeleya mbomatutu, vanoñgonoka omokonda yatyi Huku ayekelako emone. Wamona okuti enoñgonoko liafuapo Liombimbiliya olio liakalesa ovanthu ovo nonthumbi yokuti Jeova tyilityili utehelela omalikuambelo?

Nove uhanda okutala etyi tyilekesa okuti Huku oko ekahi? Onombangi mba Jeova mavakala nehambu enene liokukuvatela okulilongesa otyili konthele ya Jeova, noñgeni upondola okufuena “Komuteheleli womalikuambelo.”—Salmo 65:2.

[Onondaka Poutoi]

[Onondaka Mbavilapo pefo 10]

“Etyi nanoñgonoka evangelo lia Jeova, natala okuti ndyimui nawa ngomunthu, una ndyipondola okupopia nae melikuambelo”

[Olutalatu pefo 9]

Ekolelo liotyotyili lituka kuetyi tyimoneka, nehando liokunoñgonoka otyili konthele ya Huku