Omahuviso Maakamoneka Komutwe

INKHA ondotolo yokutanda waholovonua opo ekutande ouvela umwe omunene, oñgeni molitehelela inkha unoñgonoka okuti oe nalumwe atandele omunthu una ouvela ngo wove? Tyotyili mosukalala. Mahi, inkha unoñgonoka okuti ondotolo oyo ongwa, iya watandale ovanthu ovanyingi, avakala nawa? Kumakala vali nonthumbi yokuti mekukuatesako?

Hono, ouye uno wavela unene, iya wesukisa “okutandwa.” Mondaka yae Ombimbiliya, Jeova Huku walaa okuti makapilulula oohi ino opo ikale vali Omphangu Yombembwa. (2 Pedro 3:13) Mahi opo otyo tyimoneke, onondingavivi ambuho mbesukisa okuhanyuako. (Salmo 37:9-11; Provérbios 2:21, 22) Tyina nkhele omphangu yombembwa iheneye, ovipuka aviho ovivi tuete hono, vina okunyimuako. Tyotyili, otyo matyikakala ehuviso!—Revelação 21:4, 5.

Onombangi mba Jeova vetavela okuti omapiluluko oo maakamoneka apa katutu. Omokonda yatyi? Omokonda omahuviso Jeova Huku alingile kohale, alekesa nawa okuti oe una epondolo liokufuisapo omilao viae. Eleka omahuviso epandu ekahi Mombimbiliya novipuka Ombimbiliya ilaa okuti mavikamoneka komutwe wandyila.

Tualako okulilongesa konthele yetyi Ombimbiliya ilaa okuti matyikamoneka komutwe wandyila. Putyina ekolelo liove liliyawisa, nekevelelo liove maliliyawisa​—ekevelelo liokukakalako opolo ouwa komahuviso Jeova makalinga.

[Okakasa/​Olutalato pefo 7]

EHUVISO:

NONOMBOLO MBEHEHI NOMBISI JESUS WAAVELELE OKULIA OVANTHU OVANYINGI. —MATEUS 14:13-21; MARCOS 8:1-9; JOÃO 6:1-14.

OMULAO:

“Oohi maikaava okulia okunyingi. Huku, Huku yetu meketuyamba.”—SALMO 67:6.

TYIHANGUNUNA TYI PALA ONTHUE:

NAWIKE VALI MAKAMONA ONONKHUMBI MOKONDA YONDYALA.

EHUVISO:

JESUS WAPATULILE OMAIHO OVAMPHOKI. —MATEUS 9:27-31; MARCOS 8:22-26.

OMULAO:

“Omaiho ovamphoki maakapatuluka.”

—ISAÍAS 35:5.

TYIHANGUNUNA TYI PALA ONTHUE:

OVAMPHOKI AVEHO MAVAKAMONAPO.

EHUVISO:

JESUS WAHAKULILE OVILEMA. —MATEUS 11:5, 6; JOÃO 5:3-9.

OMULAO:

“Otyilema matyikalombauka ngombambi.”

—ISAÍAS 35:6.

TYIHANGUNUNA TYI PALA ONTHUE:

AVEHO VALEMANA MAVAKAHAKULWA.

EHUVISO:

JESUS WAHAKULILE OMAUVELA ELIKALAILA. —MARCOS 1:32-34; LUCAS 4:40.

OMULAO:

“Nawike omunthu kombanda yoohi makati: ‘Ame ndyivela.’”—ISAÍAS 33:24.

TYIHANGUNUNA TYI PALA ONTHUE:

OMAUVELA AEHO MAAKAPOLUAKO. MATUKAKALA NEKONGOKO EWA.

EHUVISO:

JESUS WAYUNGILE ONONKHONO MBUHONGOLELA OVIPUKA VIAVASIWAKO. —MATEUS 8:23-27; LUCAS 8:22-25.

OMULAO:

“Mavakatunga onondyuo avakalamo, mavakatuika omiti avakalia ovinyango viavio. Kamavalingi ovilinga tyahapoloko esilivilo.”—ISAÍAS 65:21, 23.

“Mokakala kokule nemone—kumakakala nowoma nomunthu nawike—netyi tyitilisa owoma, mokonda kamatyikehika ponthele yove.”—ISAÍAS 54:14.

TYIHANGUNUNA TYI PALA ONTHUE:

OVINIMAWE NOVIPUKA OVIKUAVO OVIVI KAMAVIKAKALAKO VALI.

EHUVISO:

JESUS WATUTILISILE VOKUANKHIA. —MATEUS 9:18-26; LUCAS 7:11-17.

OMULAO:

“Aveho vekahi momalangalo . . . mavakatundamo.”—JOÃO 5:28, 29.

“Elunga liaava vana vankhilamo, iya ononkhia Nelangalo, viaava vokuankhia vekahimo.”—REVELAÇÃO 20:13.

TYIHANGUNUNA TYI PALA ONTHUE:

VETU VOKUANKHIA MAVAKATUTILISWA.