Lunguka Komaliva Eliapu!

“Tundei meliva lie Liapu.”—2 TIMÓTEO 2:26.

OÑGENI MOKUMBULULA?

Inkha tuna otyituwa tyokupopia omapita vakuetu oityi tuna okulinga?

Oityi tuelilongesila ku Pilatu na Petulu, konthele yokukala nowoma nokuhongiliyua?

Oñgeni molityilika okusoka unene konkhali walingile?

1, 2. Omaliva patyi Eliapu matulilongesa monthele ei?

ELIAPU liluisa ovaumbili va Jeova. Mahi etyi ahanda hakuveipaa ngetyi tyilinga omukongo tyina amakuate otyinyama. Anthi, Eliapu lihanda okuvekuata nomuenyo opo valinge etyi lihanda.—Tanga 2 Timóteo 2:24-26.

² Opo omukongo akuate otyinyama nomuenyo pamwe utela eliva. Upondola okutyiihana opo tyitunde pana tyaunda, atyinkhi meliva. Ine upaka eliva pana otyinyama tyehelimono. Eliapu liundapesa omaliva ngoo opo likuate ovaumbili va Huku nomuenyo. Inkha katuhande okukuatwa, tuna okulunguka nokutavela omalondolo etukuatesako okuimbuka omaliva a Satanasi. Monthele ei matulilongesa oñgeni matulityilika omaliva etatu Eliapu lihole okukuata nao ovanthu va Huku. Omaliva oo (1) okupopia tyihasoko, (2) owoma, nokuhongiliyua, (3) okusoka unene konkhali tualingile. Onthele mailandulako maipopi omaliva omakuavo evali a Satanasi.

NYIMA OTUPIA TUOKUPOPIA TYIHASOKO

3, 4. Oityi tyipondola okumonekapo inkha katuyungu nawa elaka lietu? Popiapo ongeleka.

³ Omukongo tyina ahanda okuundulula ovinyama, upaka otupia pana vikahi iya tyina vikahateka, eviipaa. Tupu, Eliapu lihanda okupaka otupia mewaneno lio Vakristau. Inkha lityivila, lipondola okuvepola momphangu oyo yapama, opo livekuate. Oñgeni tupondola okutokela meliva liokukuatesako Satanasi, mahi, otyo tuhetyii?

⁴ Omulongwa Tiagu waelekele elaka notupia. (Tanga Tiago 3:6-8.) Inkha katuyungu nawa elaka lietu, matulingi ngatyina tupaka otupia mewaneno. Oñgeni otyo tyipondola okueenda? Soka kuetyi: Meliongiyo liewaneno muapopiwa okuti omphange umwe wakala omukokoli-ndyila. Konyima yeliongiyo ovaivisi vevali vapopia konthele yotyo. Umwe wahambukua, nokuhanda ovilinga viomphange oo viende nawa. Omukuavo upopia okuti omphange oo wakala omukokoli-ndyila mokonda uhanda okulipaka kounene. Povaivisi ovo vevali olie uhanda akale epanga liove? Katyipuiya okuimbuka olie upondola okupaka otupia mewaneno mokonda yonkhalelo apopia.

5. Inkha tuhanda okunyima otupia tuokupopia tyihasoko, oityi tuna okulinga?

⁵ Oñgeni tupondola okunyima otupia tuokupopia tyihasoko? Jesus wati: “Omulungu upopia etyi tyeyula momutima.” (Mateus 12:34) Moluotyo, otyipuka tyotete tuesukisa okulinga okutala nawa omutima wetu. Okuti tulityilika omalusoke omavi apondola okutulingisa okupopia ovipuka vinyona? Mongeleka, tyina tuiva okuti omukuatate ukahi nokulinga ononkhono opo akale novilinga mewaneno, tusoka okuti ukahi nokulinga nawa, ine tusoka okuti uhanda okulipaka kounene? Inkha tuna eyembelo liokusoka okuti ovakuatate vetu vaumbila vala Jeova mokonda yelungavi, tuesukisa okuhinangela okuti Eliapu ongotyo liapopile omuumbili wa Huku wekolelo Job. (Jó 1:9-11) Tuhasokei omapita konthele yovakuatate vetu, mahi tuesukisa okulipula omokonda yatyi tuvepopila omapita. Okuti tuna umwe ehunga liokusoka ngotyo? Ine omutima wetu ukahi nokuhongiliyua notyituwa tyouye tyokuhena ohole mononthiki mbuno mbonthyulilo?—2 Timóteo 3:1-4.

6, 7. (a) Omahunga patyi amwe apondola okutulingisa okupopia omapita vakuetu? (b) Oityi tuesukisa okulinga tyina vakuetu vetupopia omapita?

⁶ Tala omahunga omakuavo apondola okutulingisa okupopia omapita vakuetu. Ehunga limwe omokonda tuhanda vakuetu vahuve netyi tulinga. Moluotyo tupondola okuhimbika okutala vakuetu ngatyina vekahi vali pombuelo. Ine tupondola okutatesa mokonda yokuahalingili tyimwe ankho tuna okulinga. Tyina tupopia omapita vakuetu mokonda yomalityindailo ine onkhi, otyo tyipondola okutunyona.

⁷ Pamwe tupondola okusoka okuti tuna ehunga ewa liokupopia omapita vakuetu. Hamwe tueihamenwa natyimwe tueiva vapopia konthele yetu. Inkha ongotyo, okuvekondolela hayoko onkhalelo ongwa yokutetulula otyitateka. Okulinga ngotyo, tukahi vala nokuhohiya potupia nokulinga ehando lie Liapu, halia Huku. (2 Timóteo 2:26) Mahi, tuesukisa okuhetekela Jesus. Tyina ankho apopiwa omapita, “oe kevepopile omapita okuvekondolela.” Mahi, oe “ankho ulipakula ku una ukoyesa nouviuki.” (1 Pedro 2:21-23) Jesus ankho una onthumbi yokuti Jeova matetulula ovipuka monkhalelo Yae no momuvo Wae muene. Nonthue tuesukisa okuyumba onthumbi mu Huku. Tyina tupopia ovipuka oviwa vipameka vakuetu, tukuatesako ewaneno lietu okutualako “nombembwa newaneko.”—Tanga Efésios 4:1-3.

TILA KELIVA LIOWOMA NOKUHONGILIYUA

8, 9. Omokonda yatyi Pilatu atumine okuipaa Jesus?

⁸ Tyina otyinyama tyinkhia meliva, katyityivili vali okulinga natyike. Tupu, tyina omunthu akala nowoma, nokuyeka vakuavo vemuhongiliye, ketyivili vali okulinga natyike. (Tanga Provérbios 29:25.) Tutalei onongeleka mbovanthu vevali vakalele nowoma nokuyeka vakuavo vevehongiliye, nokutala oityi tupondola okulilongesilako.

⁹ Omutumini wo Roma Posiu Pilatu ankho utyii okuti Jesus kapengesile, iya ankho kahande okumulinga otyivi. Pilatu alo umwe wapopile okuti Jesus “utupu etyi alinga tyimuipaesa.” Mahi, watuma okuipaa Jesus. Mokonda yatyi? Omokonda Pilatu wetavelele okuhongiliyua novanthu. (Lucas 23:15, 21-25) Onondyale ombo vahongiliya Pilatu okulinga etyi ankho vahanda, vati: “Inkha uyovola omulume ou, kupangako lia Sesale.” (João 19:12) Pilatu tyafuile watilile owoma wokupolua koutumini, ine okuipawa, inkha waamenene Kristu. Moluotyo, wetavela okuhongiliyua, alingi etyi ankho Eliapu lihanda.

10. Omokonda yatyi Petulu apopila okuti kei Kristu?

¹⁰ Apostolu Petulu ankho epanga lia Jesus. Kakalele nowoma wokupopila vakuavo okuti Jesus o Mesiya. (Mateus 16:16) Petulu watuaileko nekolelo etyi ovalongwa vakuavo vahanoñgonokele etyi Jesus apopia, avemusipo. (João 6:66-69) Iya etyi onondyale veya okukuata Jesus, Petulu wakuata omutunga opo aamene Tatekulu yae. (João 18:10, 11) Mahi konyima, Petulu akala nowoma iya alo umwe aanye okuti wii Jesus Kristu. Owoma novanthu welifua neliva, iya Petulu atokela meliva olio, kakalele nomutima wakola opo alinge etyi tyaviuka nokukala omukuatyili na Jesus.—Mateus 26:74, 75.

11. Omahongiliyo patyi hamwe tuna okulwa nao?

¹¹ Ovakristau aveho vesukisa okulwa opo vahahongiliyue okulinga ovipuka vinumanesa Huku. Ovahona, novanthu vakuavo vapondola okutukuluminya okupopia omatutu, ine okulinga omaundalelapo. Ovakristau vapondola okuhongiliyua navakuavo kosikola opo valinge ono kabula, nokutala omikanda no nosinema mbovanthu vemuhoyo, nokupuena, nokusipa omapangue, nokunwa unene, ine okulinga omaundalelapo. Moluotyo, oityi matyitukuatesako okutila eliva liokukala nowoma, nokuhongiliyua okulinga etyi tyinumanesa Jeova?

12. Oityi tulilongesila ku Pilatu na Petulu?

¹² Tutalei etyi tupondola okulilongesila kongeleka ya Pilatu na Petulu. Pilatu ankho kei unene konthele ya Kristu. Mahi ankho utyii okuti Jesus omunthu omuwa, hamukalaviko. Mahi, Pilatu ankho utupu omutima weliola nohole na Huku yotyotyili. Moluotyo, Eliapu alimukuate liwa-liwa nomuenyo. Petulu ankho una enoñgonoko liafuapo nohole na Huku. Mahi ovikando vimwe, wakalele nowoma, keliolele omutima, etavela okuhongiliyua. Etyi Jesus nkhele ehenekuatwe, Petulu wapopia okuti: “Namphila vakuetu aveho vekusapo, ame himetyilingi.” (Marcos 14:29) Inkha Petulu wayumbile onthumbi mu Huku, ngetyi tyalingile omuhoneki wo no salmu, ñgeno welifuiikile vali nawa pala ovipuka ankho maviya komutwe. Omuhoneki oo waimba okuti: “Jeova ukahi konthele yange, himakala nowoma. Oityi omunthu apondola okundinga?” (Salmo 118:6) Kotyinthiki tyahulililako tyomuenyo wae pano pohi, Jesus waya na Petulu nono apostolu vevali motyikunino tyo Getsemani. Jesus weveita vakale tyipahi, mahi Petulu navakuavo avalala. Jesus evepahulapo, ati: “Valume, kalei tyipahi nokulikuambela, opo muhayondyue.” (Marcos 14:38) Mahi, Petulu alala vali iya konyima akala nowoma, nokuyeka ahongiliyue.

13. Oñgeni tupondola okulityilika okuhongiliyua okulinga ovivi?

¹³ Ongeleka ya Pilatu noya Petulu mbutulongesa otyipuka otyikuavo tyakolela: Opo tutyivile okutyilika okuhongiliyua tuesukisa enoñgonoko liafuapo, nokuliola omutima, nonondunge, nohole na Huku, nonthilo na Jeova, nokuhakala nowoma novanthu. Inkha ekolelo lietu liapamena menoñgonoko liafuapo, matupopi konthele yomatavelo etu nomutima wakola. Otyo matyitukuatesako okulityilika okuhongiliyua, nokufinda owoma novanthu. Moluotyo, tuhasokei okuti tuapama unene. Anthi tuna okuimbuka okuti tuesukisa ononkhono mba Huku opo tuhahongiliyue. Tuesukisa okuita ospilitu ya Jeova nokuyeka ohole tuna nae itulunde okukakatela menyina liae no movitumino viae. Mahi, tuesukisa okulifuiika tyina nkhele tuhenelolwe. Mongeleka, tuesukisa okulikuambela novana vetu opo tuvekuateseko okukumbulula nawa tyina vahongiliyua navakuavo okulinga ovivi.—2 Coríntios 13:7.a

LITYILIKA ELIVA LIOKUSOKA UNENE KONKHALI WALINGILE

14. Eliapu lihanda tusoke tyi konthele yononkhali tualingile?

¹⁴ Pamwe, eliva ekuavo liundapeswa, okutela epundi lialema ine emanya enene, pana pehole okukuata otyinyama. Otyinyama tyihalungukile tyiliata mongoi, eliva alipasuka iya emanya ine epundi alityitokela. Okusoka unene konkhali hamwe tualingile, tyipondola okuelekwa nomulemo omunene umiangula. Tyina tusoka konkhali tualingile, tupondola “okusoya unene.” (Tanga Salmo 38:3-5, 8.) Satanasi uhanda ove usoke okuti kuatokalele okankhenda ka Jeova, ine kumetyivili okuendela movitumino Viae.

15, 16. Oñgeni molityilika eliva liokusoka unene konkhali walingile?

¹⁵ Oñgeni molityilika eliva olio limiangula? Inkha walinga onkhali onene, likuatehila okulinga etyi tyesukisa, opo ukondoke moupanga wove na Jeova. Kaovole ovakulu vewaneno, oiti vekukuateseko. (Tiago 5:14-16) Linga ononkhono mbokulinga etyi tyaviuka. (2 Coríntios 7:11) Inkha uviyulwa, uhasoye. Tyina Jeova ekuviyula tyilekesa okuti ukuhole. (Hebreus 12:6) Tokola okuhalingi vali onkhali, olikuatehila okulinga ngetyi watokola. Konyima yokuelivela nokupilulula onkhalelo yomuenyo wove, kala nonthumbi yokuti otyilikutila tyofeto yeyovo tya Jesus Kristu tyipondola okuhita ononkhali mbove.—1 João 4:9, 14.

¹⁶ Ovanthu vamwe nkhele vatualako okulivela onombei mokonda yononkhali vaeveluale. Inkha nove ulitehelela ngotyo, hinangela okuti Jeova waevelele Petulu nono apostolu ononkhuavo namphila vasilepo Jesus Omona Wae onthyolwa momuvo wononkhumbi. Jeova waevelele omulume umwe wapolelwe mewaneno lio Korintu mokonda yokualingile onkhali imwe onene youndalelapo, mahi konyima elivele. (1 Coríntios 5:1-5; 2 Coríntios 2:6-8) Ondaka ya Huku ipopia ovanthu valingile ononkhali ononene mahi etyi velivela Huku eveevela.—2 Crônicas 33:2, 10-13; 1 Coríntios 6:9-11.

17. Oityi ofeto yeyovo itulingila?

¹⁷ Jeova mekuevela nokulimbwa ononkhali mbove inkha ulivela tyotyili, nokutavela okankhenda kae. Uhasoke okuti ofeto yotyilikutila tya Jesus kamaipate ononkhali mbove. Inkha usoka ngotyo motokela meliva lia Satanasi. Eliapu lihanda usoke okuti ofeto yeyovo kaituuka opo Jeova aevele ononkhali mbove ambuho. Mahi vana valinga ononkhali mavembuevelwa ambuho, inkha velivela. (Provérbios 24:16) Okukala nekolelo mofeto yeyovo matyikukuatesako okuhasoko unene konkhali walingile, nokukuavela ononkhono mbokuumbila Huku nomutima wove auho, nomuenyo wove no nondunge mbove ambuho.—Mateus 22:37.

OMALIVA A SATANASI TWEI NAWA

18. Oñgeni matulityilika omaliva Eliapu?

¹⁸ Satanasi kesukile neliva patyi aundapesa, etyi ahanda vala okutukuata. Mokonda twii nawa omaliva a Satanasi, tupondola okulityilika okukuatwa nae. (2 Coríntios 2:10, 11) Kamatutokela momaliva ae, inkha tulikuambela okuita ounongo wokulityilika omaliva oo. Tiagu wahoneka okuti: “Inkha umwe pokati kenyi wakamba ounongo, atualeko okuita ku Huku, oe meupewa, mokonda Huku wavela aveho otyali, ahakandukila.” (Tiago 1:5) Tuesukisa okulinga ngetyi tuelikuambela, mokulilongesa apeho nokuendela Mondaka ya Huku. Omikanda viomupika wekolelo nokualunguka vitukuatesako okuimbuka omaliva Eliapu nokulityilikao.

19, 20. Omokonda yatyi tuna okuyala ovivi?

¹⁹ Okulikuambela nokulilongesa Ombimbiliya tyitukuatesako okulinga etyi tyaviuka. Mahi, tupu tyakolela okulilongesa okuyala ovivi. (Salmo 97:10) Okusokolola nawa kononkhumbi mbutuka kokulinga ovivi matyitukuatesako okulityilikavio. (Tiago 1:14, 15) Tyina tulilongesa okuyala ovivi nokulinga oviwa, kamatukokwa nomaliva a Satanasi mokonda tueyele.

²⁰ Tupandula unene mokonda Huku utukuatesako opo tuhatokele momaliva a Satanasi! Jeova uundapesa ospilitu Yae, Nondaka yae neongano liae, opo etuyovole “kondingavivi.” (Mateus 6:13) Monthele mailandulako, matulilongesa oñgeni matulityilika omaliva omakuavo evali, Eliapu lihole okukuata nao ovanthu va Huku.

[Onondaka Poutoi]

[Olutalatu pefo 24]

Okupopia tyihasoko tyipondola okueta ovitateka ovinyingi mewaneno

[Olutalatu pefo 27]

Uhasoke unene konkhali walingile