Lilongesa Ondaka ya Huku
Oityi Matyikamoneka Monthiki Yekoyeso?
Monthele ei muna omapulo amwe hamwe uhole okulinga, nokulekesa apa movasi omakumbululo Mombimbiliya yove. Onombangi mba Jeova mavakala nehambu liokutomphola noove konthele yomakumbululo oo.
1. Onthiki Yekoyeso Oityi?
Ngetyi tyalekeswa polutalatu lukahi kokulio, ovanthu ovanyingi vasoka okuti Monthiki Yekoyeso, ovanthu ovanyingi mavakatualwa kotyipundi tya Huku opo vakoyeswe kese munthu okutalela kovipuka valingaile kohale—vamwe avapewa ondyambi yomuenyo keulu, ovakuavo avakamoneswa ononkhumbi onene mo ifelunu. Mahi, Ombimbiliya ilekesa okuti Onthiki Yekoyeso maiya okuyovola ovanthu kovivi. (Salmo 96:13) Huku waholovona Jesus, opo akale Omukoyesi makaeta vali ouviuki pala ovanthu aveho.—Tanga Isaías 11:1-5; Atos 17:31.
2. Oñgeni Onthiki Yekoyeso maikaetako vali ouviuki?
Etyi omulume wotete Andau atyitukilapo Huku tyauina, waetela ovana vae aveho onkhali, nononkhumbi, nononkhia. (Romanos 5:12) Opo aviukise ovivi ovio, Jesus makatutilisa ovanthu ovanyingi vokuankhia. Omukanda wa Revelação ulekesa okuti otyo matyikamoneka mokueenda kuoutumini wa Kristu Jesus womanima ovityita ekwi.—Tanga Revelação 20:4, 11, 12.
Vana mavakatutiliswa, kamavakakoyeswa mokonda yetyi valingile etyi ankho vehenenkhie, mahi omokonda yetyi mavalingi tyina “onombuingwa” mbapopiwa mu Revelação okapitulu 20 mbamaholololwa. (Romanos 6:7) Apostolu Paulu wapopia okuti puvana mavakatutiliswa nokukakala nomphitilo yokulilongesa konthele ya Huku pena “ovaviuki navana vehevaviuki.”—Tanga Atos 24:15.
3. Oityi Onthiki Yekoyeso maikalinga?
Vana vokuankhia, mahi vehelilongesile konthele ya Jeova Huku, nokumuumbila, mavakakala nomphitilo yokupiluluka, nokulinga etyi tyaviuka. Inkha valinga etyi tyaviuka, etutilo liavo malikala, “etutilo liomuenyo.” Mahi, puvana mavakatutiliswa, vamwe kamavahande okulilongesa onondyila mba Jeova. Etutilo liavo malikakala “etutilo liekoyeso.”—Tanga João 5:28, 29; Isaías 26:10; 65:20.
Konthyulilo Yonthiki Yekoyeso yomanima ovityita ekwi, Jeova makamanuhula okuetela ovanthu ovataveli onkhalelo yavo yaviuka yoponthyimbi. (1 Coríntios 15:24-28) Olio ekevelelo limwe lihuvisa ovanthu aveho ovataveli vena! Meheteko liahulililako, Huku makapola Satanasi Eliapu mokaleya omu ankho ekahi omanima ovityita ekwi. Satanasi makaovola vali okuyapula ovanthu ku Jeova, mahi vana mavaanye Satanasi, mavakakala nomuenyo wahapu pano pohi.—Tanga Isaías 25:8; Revelação 20:7-9.
4. Oipi onthiki onkhuavo yekoyeso maikaetela ouwa ovanthu?
Ombimbiliya tupu yuundapesa ondaka “onthiki yekoyeso” pala okupopia etyi matyikahanyako ouye uno wovivi. Onthiki oyo yekoyeso maikauhuluka Ngombila Onene yo pononthiki mba Noe, yahanyeneko ovanthu aveho onondingavivi. Tyihambukiswa unene, mokonda ehanyauno “liovanthu onondingavivi” malikaikula ondyila opo pano pohi pakale ovanthu ovape, “nouviuki.”—Tanga 2 Pedro 3:6, 7, 13.
Opo unoñgonoke vali konthele yotyo, tala pomafo 213-215 momukanda ou walingwa no Nombangi mba Jeova. Oityi Ombimbiliya Tyili Ilongesa?
[Olutalatu pefo 16]
“The Last Judgement,” lwa Gustave Doré, 1832-1883
[Lualandwa]
Olutalatu lualingwa na Doré