Epulo 2: Oityi Matyipiti Naame Tyina Namankhi?
ROMAN ankho omututu etyi epanga liae enene aviluka netukutuku ankhi. Wati “okupeseka kepanga liange tyendyihamene unene. Tunde opo mokueenda kuomanima omanyingi, ndyilipula oityi tyipita nonthwe tyina tuamankhi.”
Okulipula ngotyo katyapengele mokonda yatyi? Ovanthu okunkhia katyaviukile. Nalumwe tulitehela okuti tuekula pahe tuhanda tunkhie. Ovanyingi vena owoma wetyi matyiya tyina vamankhi.
Oityi vamwe vapopia konthele yekumbululo liepulo eli? Ovanyingi vetavela okuti tyina omunthu amankhi kuna etyi tyisala nomuenyo. Tupu vetavela okuti ovanthu ovawa vaya keulu, vana valinga ovivi mavakahitiswa apeho mokonda yononkhali mbavo. Ovakuavo vasoka okuti tyina omunthu amankhi kuapwa umwe, walimbuwa.
Ekumbululo olio lilekesa tyi? Ekumbululo liotete lilekesa okuti omunthu kankhile umwe tyilityili. Liavali lilekesa okuti omuenyo utupu etyi walingilua. Ovanthu vasoka ngotyo vakala nolusoke luapenga luokuti: “Tuliei, tunuei, mokonda muhuka matunkhi.”—1 Coríntios 15:32.
Oityi Ombimbiliya ilongesa? Ombimbiliya kailongesa okuti tyina omunthu amankhi kuna etyi tyisala nomuenyo. Huku watuma Ohamba Salomau ahoneke okuti: “Ovanthu vokuna omuenyo vetyii okuti mavankhi, mahi vokuankhia, kavei vali natyike.” (Eclesiastes 9:5) Vokuankhia kavei natyike tyipita konthele yavo. Kaveivi natyike nokuhalingi natyike. Ngotyo vokuankhia kavapondola okukuatesako ine okulinga omapita vokuna omuenyo.
Tyelikalela netyi ovanyingi vasoka, Huku kalingile ovanthu opo vankhie. Oe walingile omunthu wotete, Andau, opo akaleko apeho nomuenyo. Otyikando tyike vala Huku apopia ononkhia opuetyi apopila Andau okuti otyo ehitiso inkha ketavela. Huku wailikile Andau okulia otyinyango tyomuti umwe nokumulondola okuti inkha uliako “tyotyili monkhi.” (Gênesis 2:17) Inkha Andau na Eva vatuaileko okutavela ku Huku, ovo, novana vavo aveho ovakuatyili ku Huku ñgeno vakalako apeho kombanda yoohi.
Andau waholovona okuhetavela ku Huku. Etyi vehetavelele ku Huku valinga onkhali, avankhi. (Romanos 6:23) Natyike tyahupile nomuenyo kolutu lwa Andau. Anthi, Andau wankhia keko vali. Huku wapopilile Andau okuti: “Opo ulie ombolo, una yokupuila metukuta , alo ukondoka keheke, tyetyi oko wapolua. Mokonda ove uheke iya keheke oko mokondoka.” (Gênesis 3:19) Mokonda ovanthu aveho ovana va Andau, tuapiñgana kwe onkhali iya nononkhia mbutualako.—Romanos 5:12.
Namphila Andau waholovona okuhetavela, Huku wafuisapo ehando Liae liokuyulisa oohi novanthu vatuka ku Andau. (Gênesis 1:28; Isaías 55:11) Apa katutu, Jeova matutilisa vokuankhia. Okupopia konthele yomuvo oo, apostolu Paulu wati: “Makukakala etutilo liovaviuki na vana vehevaviuki.”—Atos 24:15.
Roman, wapopiwa tete, welilongesa Ombimbiliya anoñgonoka etyi ilongesa konthele yononkhia na Jeova Huku. Etyi elilongesa tyemukuatesako unene.
Opo ulilongese vali konthele yetyi tyipita mononkhia tala okapitulu 6 komukanda Oityi Ombimbiliya Tyili Ilongesa? Ukahi mo Internete, mo www.pr2711.com
[Okakasa pefo 7]
Oityi Jesus Apopia Konthele Yononkhia?
Jesus ketavelele ononkhalamutwe mbonongeleya kononthiki mbae ankho vapopia okuti kamakukala etutilo liovankhi. (Lucas 20:27) Tupu kalongesile okuti tyina omunthu ankhia pena etyi tyihupa. Anthi, Jesus walongesile etyi tyikahi pombuelo.
Ononkhia mbukahi ngo tumphoki. Etyi epanga liae Lasalu ankhia, Jesus wati: “Epanga lietu Lasalu wakapululukuapo, mahi ame mandyendeko opo ndyikemupindule kotumphoki.” Ovalongwa va Jesus ankho kavanoñgonokele etyi ekahi nokupopia. Avemupulu okuti: “Tatekulu, inkha wakapululukuapo, makala nawa.” Ombimbiliya ihangununa okuti: “Jesus ankho upopia konthele yononkhia mbae. Mahi, ovo ankho vasoka okuti ukahi nokupopia okupululukwapo kolumphoki. Iya pahe Jesus evepopila nawa okuti: ‘Lasalu wankhia.’”—João 11:11-14.
Vokuankhia mavakatutiliswa. Etyi Jesus ehika mepundaumbo lia Lasalu, aungumanesa Marta omphange ya Lasalu. Emupopila okuti: “Omphange yove mapindukapo.” Jesus alingi omulao wae wakolela okuti: “Ame tutilo nomuenyo. Una ukolela muame, namphila ankhia, makala vali nomuenyo.” Omulao oo, wa Jesus hanondaka vala mbehesilivila. Jesus watutilisa Lasalu otyo ovanthu ovanyingi vetyiete, namphila ankho etyi ankhia palambale ononthiki ononkhuana.—João 11:23, 25, 38-45.
Melekeso aavela apostolu João, Jesus walaa vali okuti vokuankhia mavakatutila. Oe ankho ukahi nokupopia omuvo wokomutwe tyina aveho vokuankhia vamakayovolwa mokaleya kononkhia.—Revelação 20:13.