Moisesi—Ankho Weliola Omutima
OKULIOLA OMUTIMA OITYI?
Okuliola omutima tyakutikinya okuhakala nomalityindailo ine okuhelipakeko. Omunthu wokuna omutima weliola katale vakuavo ngatyina ovatutu vali kwe. Uhinangela okuti omukuankhali iya utyii okuti pena ovipuka ehevili okulinga.
OÑGENI MOISESI ALEKESILE OKUTI WELIOLA OMUTIMA?
Etyi Moisesi apewa otyilinga tyokukala onkhalamutwe, kelipakeleko. Apeho, tyina omunthu apewa otyilinga tyimwe tyakolela, opo malekesa inkha una omutima weliola ine ulipakako. Robert G. Ingersoll omunongo wokotyita 19 wapopia okuti: “Opo unoñgonoke inkha omunthu umwe una omutima weliola ine ulipakako, muavela otyilinga tyakolela.” Moisesi wetusila ongeleka imwe ongwa konthele yokukala nomutima weliola. Ñgeni?
Jeova wapele Moisesi otyilinga otyinene tyokuhongolela ova Isilayeli. Mahi nongotyo Moisesi kelipakeleko. Mongeleka, tala onkhalelo atetululile otyitateka otyinene konthele yepingo. (Números 27:1-11) Otyitateka otyo ankho otyinene unene mokonda etokolo liae ankho kamalilandulwa vala novakai vana, mahi malitualako nokulandulwa novanthu aveho.
Oñgeni Moisesi etyitetululile? Okuti wasokele okuti mokonda omuhongoleli wova Isilayeli ankho upondola okutokola ngetyi ahanda? Ankho mayumbu onthumbi mounongo wae muene, muevi ankho eyale nokusoka okuti wiyale etyi Jeova asoka konthele yotyo?
Omunthu wokulipakako ñgeno ongotyo alingile. Mahi Moisesi kalingile ngotyo. Ombimbiliya itupopila okuti: “Moisesi wapopilile Jeova otyitateka otyo.” (Números 27:5) Nkhele soka! Namphila ankho ekahiale nokuhongolela elongo lio Isilayeli mokueenda kuomanima 40, Moisesi keliyumbile onthumbi, mahi wayumbile onthumbi mu Jeova. Tyimoneka nawa okuti Moisesi ankho weliola unene omutima.
Moisesi kasokele okuti oe vala ankho una okukala notyilinga tyokuhongolela. Wahambukilwe unene etyi Jeova aholovona ova Isilayeli ovakuavo opo navo vakale ovauli. (Números 11:24-29) Etyi tateivi ya Moisesi emupakelamo aholovone ovalume ovakuavo opo vemukuateseko movilinga vimwe, Moisesi etyitavela nomutima weliola. (Êxodo 18:13-24) Konthyulilo yomuenyo wae, namphila ankho nkhele ena ononkhono, Moisesi waitile ku Jeova aholovone omunthu omukuavo opo emupinge. Etyi Jeova aholovona Josue, Moisesi emukuatesako nomutima auho, apopila ovanthu opo valandule ehongolelo lia Josue, evetuale Kotyilongo Valaelwe. (Números 27:15-18; Deuteronômio 31:3-6; 34:7) Tyotyili Moisesi wahambukilue unene notyilinga tyokuhongolela ova Isilayeli mefendelo. Mahi, ankho kasoko okuti otyilinga tyae tyakolela vali tyipona ouwa wovanthu.
OTYO TYITULONGESA TYI?
Tyitulongesa okuti katupondola okulipakako mokonda yotyilinga tyimwe tuapewa ine omokonda tuna ounongo wokulinga otyipuka tyimwe. Hinangela: Opo tutyivile okulinga nawa ovilinga via Jeova, tyakolela vali, okukala nomutima weliola, haunongoko. (1 Samuel 15:17) Tyina tuna omutima weliola, tulinga ononkhono mbokulandula ehongolelo eli Liombimbiliya: “Yumba onthumbi mu Jeova nomutima wove auho, uhakolele menoñgonoko liove muene.”—Provérbios 3:5, 6.
Ongeleka ya Moisesi tupu itulongesa okuti hatyiwako okulipakako mokonda yotyilinga tyimwe tuna.
Okuti inkha tuhetekela ongeleka ya Moisesi yokuliola omutima, matupoloko ouwa? Eenga! Tyina tukala nomutima weliola, tupepukisa omuenyo wavana tukala navo, iya avakala nohole nonthwe. Haunene, Jeova Huku wokuna otyituwa otyo otyiwa, nae ukala nohole nonthwe. (Salmo 18:35) “Huku uyele vokulipakako, mahi una okankhenda na vana vena omutima weliola.” (1 Pedro 5:5) Otyo tyituavela ondundo onene yokuhetekela Moisesi!