OKUPOLELA KOSAPI YOKONDYE: OITYI TULILONGESILA KU MOISESI
Moisesi Ankho Olie?
Oityi usoka tyina wiiva enyina Moisesi? Usoka . . .
kolukembe luaholekelwe na ina mosesu alupakwa Mondongi Nilu?
komukuendye watekulilue nomona wa Farao omuhikuena mo Egitu ankho muna omalumono omanyingi, mahi ahalimbwa okuti omu Isilayeli?
komulume wakalele omanima 40 nokulisa mo Midiaa?
komulume wapopile na Jeovaa ponthele yotyinkhondo tyatema?
komulume wakalele nomutima wakola pokuita ohamba yo Egitu opo ayovole ova Isilayeli koupika?
komulume watuminue na Huku okupopia Omahingano Ekwi ankho maeya mo Egitu etyi ohamba yehetavelele Huku yotyotyili?
komulume wahongolelele ova Isilayeli etyi vatunda ko Egitu?
komulume watuminue okuyapula pokati Elunga Enkhuhu?
komulume wapelue na Huku Ovitumino Ekwi opo evipopile ova Isilayeli?
MOISESI walingile ovipuka ovio, novikuavo vali. Otyo Ovakristau, nova Judeu, nova Musulumanu vena onthilo nomulume oo wekolelo!
Tyotyili, Moisesi wali omuuli walingile “ovilinga vihuvisa.” (Deuteronômio 34:10-12) Wayekele Huku emuundapese monkhalelo yavilapo. Mahi, Moisesi ankho ukahi vala ngovanthu ovakuavo. Ngovauli ovakuavo, Moisesi nae ankho omunthu “ngonthue.” (Tiago 5:17) Moisesi nae wali novitateka ovinyingi ngevi tuna hono, iya evitetulula nawa.
Uhanda okunoñgonoka oñgeni etyilingile? Matulilongesa ovituwa vitatu oviwa Moisesi ankho ena, netyi tupondola okulilongesila kongeleka yae.
a Jeova enyina lia Huku ngetyi tyipopia Ombimbiliya.