Jesus​—Osapi Pala Okukala Nomuenyo Omuwa

OKUTI Jesus ankho una umwe omuenyo omuwa? Ankho wekulila mombunga yahamonene, iya mokueenda kuomuenyo wae auho kakalele novipuka ovinyingi. Ankho “utupu apa alangeka omutwe.” (Lucas 9:57, 58) Tupu, ankho uyelwe, nokupenyua, iya konyima aipawa nonondyale mbae.

Upondola okusoka okuti, ‘Kuame omuenyo oo hamuwako!’ Mahi, pena vali ovipuka ovikuavo konthele yomuenyo wa Jesus tuesukisa okunoñgonoka. Matulilongesa ovipuka vikuana.

1. JESUS ANKHO UHANDA OKULINGA EHANDO LIA HUKU.

“Okulia kuange okulinga ehando lia una wanthuma.”​—João 4:34.

Muetyi ankho apopia netyi alinga, Jesus waovolele okufuisapo ehando lia Tate yae keulu, Jeova.a Okulinga ehando lia Huku tyemuhambukisilwe unene. Alo umwe ankho utala okulinga ehando lia Huku ngatyina okulia, ngetyi tyilekesa otestu ikahi pombanda. Tala opomuvo patyi aelekele okulinga ehando lia Huku nokulia.

Jesus wapopile onondaka ombo komeliya. (João 4:6) Ankho waendele omuhuka auho monomphunda mbo Samaria, moluotyo ankho waliua nondyala. Alo umwe, ovalongwa vae vemupopilile okuti: “Mulongesi lia.” (João 4:31) Ekumbululo lia Jesus lialekesile nawa okuti ankho ulitehela okuti wapama mokonda yokulinga ehando lia Huku. Otyo katyilekesa okuti omulume oo ankho una omuenyo omuwa?

2. JESUS ANKHO UHOLE UNENE TATE YAE.

“Ame ndyihole Tate.”​—João 14:31.

Keulu, Jesus ankho una oupanga omunene na Tate yae. Ohole onene na Huku yemulundile okunoñgonokesa enyina lia Tate yae, nevangelo liae, novituwa viae. Muevi ankho apopia, nevi alinga, novituwa viae, Jesus walekesile nawa oñgeni Tate yae ekahi, moluotyo, tyina tutanga konthele ya Jesus, ongatyina tukahi nokutanga konthele ya Tate yae. Ngotyo, etyi Filipe aitile Jesus okuti: “Tulekese Tate,” Jesus akumbulula okuti: “Una uluete ame, tupu uluete Tate.”—João 14:8, 9.

Mokonda Jesus ankho uhole Tate yae, ankho wafuapo pala okumutavela, alo umwe okunkhia. (Filipenses 2:7, 8; 1 João 5:3) Ohole oyo onene Jesus ankho ena na Huku, yemukalesile nomuenyo omuwa.

3. JESUS ANKHO UHOLE OVANTHU.

“Nawike una ohole ipona yauna waava omuenyo mokonda yomapanga ae.”​—João 15:13.

Mokonda tuvakuankhali, katukevelela natyike otyiwa komutwe. Ombimbiliya ipopia okuti: “Mokonda yomunthu wike vala [Andau] onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.” (Romanos 5:12) Katupondola okuhupa kononkhia mokonda mbatuka konkhali.—Romanos 6:23.

Tupandula unene, mokonda Jeova wetuyovola. Wayekele Omona wae wehena onkhali, Jesus, opo amoneswe emone, ankhi opo aave ofeto yeyovo pala okuyovola ovanthu moupika wonkhali, no kononkhia. Mokonda Jesus uhole Tate yae, novanthu, wetavelele okuava omuenyo wae wehena onkhali pala ouwa wetu. (Romanos 5:6-8) Ohole oyo yemukalesile nomuenyo omuwa.b

4. JESUS ANKHO UTYII OKUTI TATE YAE UMUHOLE NOKUEMUPANDA.

“Ou Omona wange onthyolwe, ame napanda unene.”​—Mateus 3:17.

Jeova wapopile onondaka ombo tunde keulu etyi Jesus ambatisalwa. Ngotyo, Jeova walekesile okuti uhole Omona wae Jesus, nokuemupanda. Otyo Jesus apopilile nonthumbi okuti: “Tate unthyole”! (João 10:17) Mokonda ankho Jesus utyii okuti Tate yae umuhole nokuemupanda, wakalele nomutima wakola opo akoleleye oundyale. Otyo, alo umwe tyemukuatesileko okuhakala nowoma wokunkhia. (João 10:18) Okunoñgonoka okuti Tate yae umuhole nokuemupanda, tyotyili tyakalesile Jesus nomuenyo omuwa.

Tyotyili, Jesus wakalele nomuenyo omuwa. Tyimoneka nawa okuti tupondola okulilongesila unene ku Jesus oñgeni tupondola okukala nomuenyo omuwa. Onthele ilandulako maipopi onondonga mbumwe mbayandyuluka Jesus aavelele ovalongwa vae konthele yoñgeni vena okutyinda omuenyo wavo.