OMAPULO OMBIMBILIYA AKUMBULULWA
Omokonda yatyi tyepuiyila unene okuetako ombembwa mouye auho?
Outumini wike vala upondola okukaeta ombembwa mouye auho, oyouna utyivila okupilulula omitima viovanthu
Ombimbiliya ipopia omahunga evali. Tete, namphila ovanthu vena ounongo wokulinga ovipuka vihuvisa, mahi kavatungilwe nounongo wokulitumina. Vali, ovanthu kavetyivili okutumina mokonda “ouye auho ukahi pomaoko ondingavivi,” Satanasi Eliapu. Moluotyo, namphila ovanthu valinga ononkhono mbokueta ombembwa mouye auho, kavetyivili.—Tanga Jeremias 10:23; 1 João 5:19.
Tupu, ovanthu kavetyivili okueta ombembwa mouye auho mokonda vena elungavi, nomalityindailo. Outumini wike vala upondola okukaeta ombembwa mouye auho, oyouna utyivila okulongesa ovanthu okukala nohole netyi tyaviuka, nokulitekula nawa navakuavo.—Tanga Isaías 32:17; 48:18, 22.
Olie makaeta ombembwa pano pohi?
Huku Wepondolo aliho, walaa okuti makaetako omutumini wike vala makatumina ovanthu aveho. Makapinga povatumini vovanthu. (Daniel 2:44) Omona wa Huku, Jesus, makakala Ohamba Yombembwa. Makamanako ovivi aviho vikahi pano pohi, nokukalongesa ovanthu okukala nombembwa.—Tanga Isaías 9:6, 7; 11:4, 9.
Pahetyino, Jesus ukahi nokuhongolela ovanthu ovanyingi mouye auho vekahi nokuundapesa Ondaka ya Huku, Ombimbiliya, opo valongese ovanthu okukala nombembwa navakuavo. Apa katutu, mouye auho mamukakala ombembwa.—Tanga Isaías 2:3, 4; 54:13.