Apa Katutu Ononkhumbi Mambukapuako!
Soka ñgeno ukala mouye muhena ononkhumbi, noungangala, novita, nomauvela, novinimawe nomitetanena. Ñgeno ononthiki ambuho tyina upindukapo, utupu otyiho konthele yonombongo, nokuti molingwa okapungulula, ine onya. Okuti ovipuka ovio oviwa unene ngoti kamavifuisuapuale? Tyotyili, kutupu omunthu ine eongano liovanthu lipondola okueeta ovipuka ovio. Mahi Huku walaa okuhanyako aveho vaetela ovanthu ononkhumbi, okukutikinyamo vana vapopiwa monthele yokualamba. Tala omilao vilandulako vikahi Mondaka ya Huku, Ombimbiliya:
OUTUMINI WOMUTUMINI OMUWA
“Huku yo keulu makavialeka ouhamba umwe uhakahanyuako nalumwe. Ouhamba oo kamaukapita pomaoko elongo ekuavo. Maukahanyako omautumini atyo aeho nokuenyimako. Iya ouhamba watyo oo, ngao ukakalako apeho.”—Daniel 2:44.
Ouhamba wa Huku outumini wo keulu. Omutumini waholovonua o Jesus Kristu, maukapinga ovatumini aveho vovanthu iya okupolelela opo, ehando lia Huku kamalifuisuapo vala keulu mahi tupu malifuiswapo pano pohi. (Mateus 6:9, 10) Outumini oo kamaukapingwa noutumini nawike wovanthu mokonda maukakala “ouhamba uhapu wa Tatekulu yetu no Muyovoli Jesus Kristu.” Ombembwa yahapu maikafuiswapo.—2 Pedro 1:11.
KAMAKUKAKALA VALI ONONGELEYA MBOMATUTU
“Satanasi utualako okulikalesa ngoandyu yotyitei. Moluotyo, hatyipuka ko otyinene inkha ovaumbili vae tupu velipilulula ovaumbili vouviuki. Anthi, onthyulilo yavo maikelifwa novilinga viavo.”—2 Coríntios 11:14, 15.
Onongeleya mbomatutu mambukaimbukwa okuti ovilinga vie Liapu, iya ambukahanyuako. Okunengula ohonde nokapungulula kalingwa monongeleya kamavikakalako vali. Otyo matyikuatesako aveho vehole “Huku yotyotyili womuenyo” okumufenda “nekolelo like vala” “nospilitu notyili.” Otyo matyikaeta ombembwa, newaneko!—1 Tessalonicenses 1:9; Efésios 4:5; João 4:23.
OVANTHU KAMAVAKAKALA VALI NONKHALI
“Huku muene makakala navo. Huku makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:3, 4.
Otyo, Jeova Huku meketyilinga menyina Liomona wae Jesus, waava omuenyo wae pala ovanthu aveho. (João 3:16) Tyina Jesus amatumina, ovanthu kamavakakala vali nonkhali. Kamakukakala vali ononkhumbi mokonda “Huku muene makakala navo” iya “makasekuna ononkhuka momaiho avo.” Onkhali nononkhumbi apa katutu mavikakala ovipuka viokualamba, “ovaviuki mavakapiñgana ohi, avakakalako apeho.”—Salmo 37:29.
ONOANDYU ONOMBI KAMAMBUKAKALAKO VALI
“[Jesus Kristu] akuate engandu, onyoka yokonthuko Eliapu Satanasi, elikutu omanima ovityita ekwi. Iya weliyumba mokaleya, ayeilapo nokupatapo, opo liahayondye vali omalongo.”—Revelação 20:2, 3.
Tyina Satanasi novilulu viae vamayumbwa “mokaleya,” kamavetyivili vali okuhongiliya ovanthu. Kamavekelipaka vali povilinga viovanthu. Matyikakala otyiwa unene okukala mouye muhena omahongiliyo a Satanasi no noandyu onombi!
“ONONTHIKI MBAHULILILAKO” MAMBUKAPUA
“Ononthiki mbahulililako” mambukamanuako netyi Jesus aihana okuti “ononkhumbi ononene.” Wati: “Makukakala ononkhumbi mbumwe ononene, mbuheneendeko tunde konthyimbi youye alo pahe. Tupu, kamambukaendako otyikando tyavali.”—Mateus 24:21.
Ononkhumbi, mambukakala ononene mokonda makukamoneka ovipuka viheneendeko. Ovio mavikapuila “movita vionthiki onene ya Huku Wepondolo aliho,” viiwe okuti o “Armagedon.”—Revelação 16:14, 16, onondaka pokatoi.
Konomphangu ambuho, ovanthu vehole etyi tyaviuka vakevelela onthyulilo youye uno wovivi. Tala ononkhano mbumwe onongwa mbuvekevelela Mouhamba wa Huku.
HUKU MAKALINGA VALI OVIPUKA OVINYINGI!
“Otyinyingi tyovanthu” mavakahupa, avanyingila mouye omupe wombembua: Ondaka ya Huku ipopia okuti “otyinyingi tyovanthu” tyehevilwa okuvalulwa, ‘matyikatunda mononkhumbi ononene’ nokukahupisua avanyingila mouye omupe wouviuki. (Revelação 7:9, 10, 14; 2 Pedro 3:13) Mavakapopia okuti vayovoka mokonda ya Jesus Kristu, “Ondyona ya Huku, ipola onkhali mouye.”—João 1:29.
Ovanthu mavakapola ouwa omunene kelongeso lia Huku: Mouye omupe, “ohi aiho tyotyili maikeyula enoñgonoko lia Jeova.” (Isaías 11:9) Elongeso olio lia Huku malikakutikinya onondonga mboñgeni ovanthu aveho mavakakala kumwe nombembwa. Huku walaa okuti: “Ame, Jeova, ame Huku yove, Una ukulongesa etyi tyakolela, Una ukuhongolela mondyila una okuendela.”—Isaías 48:17.
Vetu vokuankhia mavakatutiliswa: Etyi ankho Jesus ekahi pano pohi, watutilisile epanga liae Lasalu. (João 11:1, 5, 38-44) Ngotyo, Jesus walekesile etyi makalinga Mouhamba wa Huku tyina amahimbika okutumina pano pohi.—João 5:28, 29.
Ombembwa nouviuki mavikakalako apeho: Moutumini wa Kristu, vokutomba ovitumino kamavakakalako vali. Oñgeni tutyii? Mokonda Jesus, utyivila okutanga omutima, makaundapesa ounongo oo opo akoyese ovaviuki nonondingavivi. Vana vehetavela okupilulula ovituwa viavo ovivi kamavakakala mouye omupe wa Huku.—Salmo 37:9, 10; Isaías 11:3, 4; 65:20; Mateus 9:4.
Tuapopiapo vala omilao viehehi pomilao ominyingi Viombimbiliya vilekesa okuti kukahi nokuya omuvo omuwa. Tyina Ouhamba wa Huku wamahimbika okutumina pano pohi, “ombembwa onene” maikakalako apeho. (Salmo 37:11, 29) Ovipuka aviho vietela ovanthu oluihamo nononkhumbi mavikahanyuako. Tupondola okukala nonthumbi yotyo mokonda Huku walaa okuti: “Tala! Ovipuka aviho ndyikahi nokuvilinga ovipe. . . . onondaka ombu ombotyotyili nokuakolela.”—Revelação 21:5.