Vokuankhia Vena Ekevelelo!

O Betania ankho epundaumbo limwe etutu lielikalela popepi no Jelusalei. (João 11:18) Etyi Jesus nkhele eheneipawe, mepundaumbo olio muamonekele otyipuka tyimwe otyivi. Lasalu, umwe pomapanga a Jesus wavelele unene iya ankhi.

Etyi Jesus etyiiva, apopila ovalongwa vae okuti Lasalu ulele iya ankho uhanda okukemupahulapo. (João 11:11) Mahi, ovalongwa va Jesus avehetyinoñgonoka, moluotyo Jesus evepopila umwe okuti: “Lasalu wankhia.”​—João 11:14.

Lasalu apakwa, apalambe ononthiki ononkhuana, iya Jesus ehiki mo Betania aovola okuungumanesa Marta, omphange ya Lasalu. Marta ati: “Tatekulu, inkha wali pano, ñgeno omphange yange kankhile.” (João 11:17, 21) Jesus emukumbulula okuti: “Ame tutilo nomuenyo. Una ukala nekolelo muame, namphila ankhia, makala vali nomuenyo.”​—João 11:25.

Pala okulekesa okuti etyi ankho ekahi nokupopia otyili, Jesus afuene peendo, apopi okuti: “Lasalu, tundamo!” (João 11:43) Lasalu atundumo iya aveho ankho velipo, avahuvu.

Jesus watutilisiliale ovanthu vevali. Umwe puvo ankho, omona wa Jailu. Etyi nkhele ehenemututilise, Jesus tupu wapopile okuti ankho ulele.​—Lucas 8:52.

Tala okuti etyi Lasalu nomona wa Jailu vankhia, Jesus waelekele ononkhia nolumphoki. Okupopia ngotyo tyaviuka. Omokonda yatyi? Mokonda tyina omunthu elele utupu etyi ei, kamono ononkhumbi, iya keivi oluihamo. (Eclesiastes 9:5; tala okakasa kati “Ononkhia Mbelifwa Nolumphoki.”) Ovalongwa va Jesus vo kohale ankho vei nawa onkhalelo yo vokuankhia. Omukanda umwe utiwa Encyclopedia of Religion and Ethics, wati: “Kovalongwa va Jesus ononkhia ankho mbukahi ngolumphoki, iya eendo ankho omphangu yokupululukwa . . . pala vana vankhila mekolelo.”a

Tyituungumanesa unene okunoñgonoka okuti vokuankhia velele momaendo, kavekahi nokumona ononkhumbi. Mokonda tutyii etyi tyimonekapo tyina tunkhia, katuesukisile vali okutila owoma.

“INKHA OMUNTHU UNKHIA, UPONDOLA OKUKALA VALI NOMUENYO?”

Mahi, putyina tulangalapo kounthiki, olie uhanda okulangalapo ahapahukapo vali? Omokonda yatyi tupondolela okukala nonthumbi yokuti vokulele momaendo mavakapindukapo, nga Lasalu nomona wa Jailu?

Job walingile omapulo omanyingi etyi ankho asoka okuti mankhi. Wapulile okuti: “Inkha omunthu unkhia, okuti upondola okukala vali nomuenyo?”​—Jó 14:14.

Job wakumbululile epulo liae muene, apopila Huku Wepondolo Aliho okuti: “Ove moihana, iya ame andyikutavela. Moivaluka ovilinga waundapa nomaoko ove.” (Jó 14:15) Job ankho una onthumbi yokuti Jeova uhanda unene okututilisa omuumbili Wae wekolelo. Okuti otyo ankho tyikahi vala molusoke lwa Job? Au.

Omatutilo Jesus alingile, alekesile nawa okuti Huku waavela Jesus epondolo liokumanako ononkhia. Tyotyili, Ombimbiliya ipopia okuti Jesus una “osapi yononkhia.” (Revelação [Apocalipse] 1:18) Ngotyo, Jesus makaikula omapito omaendo, ngetyi atumine okupolapo emanya ankho likahi peendo lia Lasalu.

Ombimbiliya ipopia ovikando ovinyingi omulao ou wetutilo. Oandyu imwe yalaele omuuli Daniele okuti: “Ove mokapululukuapo, mahi konthyulilo yononthiki mokapinduluapo.” (Daniel 12:13) Jesus wapopilile ova Sanduseu, ononkhalamutwe mbo va Judeu ankho vehetavela ketutilo, okuti: “Onwe muanguanguana, mokonda Ovihonekwa, nepondolo lia Huku kamuvii.” (Mateus 22:23, 29) Apostolu Paulu wapopile okuti: “Ndyina ekevelelo ku Huku, . . . liokuti, makukakala etutilo liovaviuki na vana vehevaviuki.”​—Atos 24:15.

VOKUANKHIA ONALUPI MAVAKATUTILA?

Onalupi ovaviuki, na vana vehevaviuki mavakatutiliswa? Oandyu yapopilile Daniele okuti makatutiliswa “konthyulilo yononthiki.” Tupu, Marta ankho utavela okuti omukulu wae Lasalu, “makapindukapo monthiki yahulililako.”​—João 11:24.

Ombimbiliya tyina ipopia “onthiki yahulililako” tupu ipopia outumini Wouhamba wa Kristu. Paulu wahoneka okuti: “Mokonda, [Kristu] una okutumina alo Huku apaka onondyale mbae ambuho mombuelo yonomphai mbae. Iya ononkhia ondyale yahulililako, mambukanyimuako.” (1 Coríntios 15:25, 26) Olio ehunga liakolela tuna pala okulikuambela, okuita Ouhamba wa Huku uye opo ehando lia Huku lilingwe pano pohi.b

Job ankho utyii nawa okuti, Huku uhanda okukatutilisa vokuankhia. Tyina onthiki oyo yamehikipo, ononkhia kamambukakalako vali. Iya nawike vali mekelipula okuti: ‘Vokuankhia vena ekevelelo?’