Okuti Satanasi Otyilekeso Vala Tyovivi?

Tyapepuka unene okusoka okuti Satanasi tutanga Mombimbiliya otyilekeso vala tyovipuka ovivi. Mahi okuti ongotyo umwe Ombimbiliya ilongesa? Inkha ongotyo, omokonda yatyi Ombimbiliya ipopila Satanasi okuti wapopia na Jesus Kristu, na Huku Wepondolo Aliho? Tala onongeleka onombali mbetompho olio.

ETYI SATANASI EKAHI NOKUPOPIA NA JESUS

Etyi Jesus ahimbika ovilinga viae viokuivisa pano pohi, Eliapu liayondya Jesus ovikando vitatu. Tete, Satanasi wapopila Jesus aundapese epondolo apewa na Huku opo aovole okulinga monkhalelo ihaviukile. Okulandulako, Eliapu alipopila Jesus alamboke pana paya unene peulu okupaka omuenyo wae motyiponga, opo ankhimane. Konyima, Satanasi waita Jesus emufende opo emuavele outumini womauhamba aeho ouye. Movikando ovio vitatu aviho, Jesus nounongo wapopia Ovihonekwa.​—Mateus 4:1-11; Lucas 4:1-13.

Olie Jesus ankho apopila? Okuti ankho upopila otyivi tyikahi mokati kae? Ngetyi tyipopia Ovihonekwa, Jesus “wamonesua ononkhumbi mononkhalelo ambuho ngonthue, mahi utupu onkhali.” (Hebreus 4:15) Tupu, Ombimbiliya ipopia okuti: “Oe kalingile onkhali, no momulungu wae kamuavasilwe omatutu.” (1 Pedro 2:22) Jesus watualako tyehena onkhali, nokukakatela mouviuki. Nalumwe ayekele otyituwa otyivi tyikale momutima wae. Tyimoneka nawa okuti Jesus ankho kekahi nokupopila otyivi tyimwe mokati kae, mahi ankho ukahi nokupopia nomunthu wotyotyili.

Etompho olio lilekesa nawa okutala okuti Satanasi omunthu wotyotyili.

• Hinangela okuti Eliapu liavela Jesus omautumini aeho ouye inkha umufenda. (Mateus 4:8, 9) Inkha Eliapu hamunthu wotyotyili ñgeno kavelele Jesus omautumini oo. Tupu, Jesus kaanyene okuti Satanasi utupu outumini oo.

• Etyi Jesus aanya okulolwa, nkhele Eliapu “alimusipo alo pomuvo omukuavo lihanda.” (Lucas 4:13) Okuti ngotyo Satanasi otyivi vala, ine ondyale imwe onkhalavi?

• Tala okuti “onoandyu ambuya ambuhimbika okuvatela” Jesus. (Mateus 4:11) Okuti hono onoandyu ombo ovanthu vahamonua, vaava epameko nokukuatesako Jesus? Yoo. Muaina, omokonda yatyi pahe tupopila okuti Satanasi omunthu wotyotyili hatyivi vala?

ETYI SATANASI APOPIA NA HUKU

Otyikando tyavali muakutikinya Job omulume umwe ankho una onthilo na Huku. Ehipululo eli lilekesa omatompho evali Satanasi akalele nao na Huku. Ovikando ovio aviho, Huku wapandele Job mokonda yekolelo liae. Satanasi wapopia okuti Job umbila vala Huku mokonda yetyi emuavela, ngatyina Huku ekahi nokulanda oukuatyili wa Job. Ngotyo, Eliapu liapopia okuti lianoñgonoka vali Job tyipona Huku. Jeova ayeke Satanasi apole omalumono a Job, aliipaa ovana vae, iya alinyono ekongoko liae.a Konyima, atyilekesa okuti Jeova wapopia otyili konthele ya Job, iya Satanasi wakemba. Huku ayambe Job mokonda youkuatyili wae.​—Jó 1:6-12; 2:1-7.

Metompho olio lia Huku na Satanasi, okuti Jeova ankho ukahi nokupopia notyivi tyikahi mwe? Ombimbiliya yati: “Ondyila ya Huku yotyotyili yafuapo.” (2 Samuel 22:31) Ondaka ya Huku tupu yati: “Omusukuki, omusukuki, omusukuki o Jeova Huku, wepondolo aliho.” (Revelação 4:8) Ousukuki tyilekesa okwayela, etyi tyikola, tyihena onkhali. Jeova wafuapo utupu onkhali. Huku utupu otyituwa natyike otyivi.

Mahi, vamwe vapondola okupopia okuti alo Job ankho hamunthu-ko, moluotyo etompho olio otyilekeso vala. Mahi, okuti otyo otyili? Pena ono testu ononkhuavo mbulekesa okuti Job ankho omunthu wotyotyili. Mongeleka, mu Tiago 5:7-11, tutangamo ongeleka ya Job ipameka Ovakristau momivo viovitateka, neungumaneso liokuti Jeova uyamba vana vakoleleya. Okuti ñgeno ongeleka oyo yakala no nonkhono inkha ankho Job hamunthu-ko, nokuluiswa na Satanasi inkha otyilekeso vala? Tupu mu Ezequiel 14:14, 20, Job wakutikinyua movo Noe na Daniele okuti, ovalume vetatu ovaviuki. Nga Noe na Daniele, Job wali omunthu wotyotyili, omulume wekolelo enene. Inkha Job wali omunthu wotyotyili, okuti una wemuluisa nae havanthu wotyotyili?

Tyimoneka nawa okuti, Ombimbiliya ilekesa okuti Satanasi omunthu wotyotyili uhamonwa. Ove hamwe upondola okulipula, ‘Okuti Satanasi upondola okulinga otyivi, ame nombunga yange hono mouye uno?’

IYA PAHE MOMUVO WETU?

Soka ñgeno pena omakongombanda anyingila liwa-liwa motyilongo ukala. Tyotyili, omuenyo wovanthu nepameko vikala motyiponga. Pahe tutale etyi tyelifwa notyo: Satanasi novilulu viae, ovanthu vahamonwa, nga Satanasi navio viatyitukilapo Huku​—iya avatahelwa pano pohi. Otyo atyieta tyi? Soka konthele yovipuka ove umona potyilongo ine hamwe omouye.

• Ove weete ovivi vikahi nokuliyawisa, oungangala, nokuliipaa namphila ovanthu valinga ononkhono mbokuvimanako?

• Ove weete ovinyano vikahi nokuliyawisa vilekesa omawanga, novivi, vikahi nokusukalalesa ovohe ovanyingi?

• Ove weete omphepo, nomaande, no nohika, mbukahi nokuhanyaunwa, namphila ovanthu valinga ononkhono mbokuviyakulila?

• Katyimoneka nawa okuti kuna tyimwe tyihaviukile mouye​—ononkhono mbukahi nokuhongiliya ovanthu okulinga ovivi?

Mbambavo tala etyi Ombimbiliya yapopia tyikahi konyima yovivi: “Engandu enene liatahelwa pombuelo, onyoka yokonthuko, iihanwa okuti Eliapu Satanasi, likahi nokuyondya ovanthu aveho. Liatahelwa pombuelo, pohi, no noandyu mbalio mbatahelwa kumwe nalio pombuelo. . . . Tatiei ove ohi nelunga, mokonda Eliapu lialaukila kuonwe nonyengo onene, mokonda lityii okuti omuwo walio kauhi.” (Revelação 12:9, 12) Konyima yomalekeso oo, ovanthu ovanyingi vetavela okuti Satanasi omunthu omukalavi uhamonwa, ukahi nokuhongiliya ouye auho.

Hamwe upondola okulipula okuti ñgeni moliyakulila. Otyiho otyo tyaviuka. Onthele mailandulako maipopi etyi matyitukuatesako.