OSAPI YOKONDYE | OVE UPONDOLA OKUFUENA KU HUKU
Ove Wii Enyina lia Huku Nokulitumbula?
Okuti tyitavela okukala noupanga wapama nomunthu otyo uhei enyina liae? Katyitavela. Omukai umwe utiwa Irina wati: “Katyitavela okufuena ku Huku otyo uhei enyina liae.” Ngetyi tyapopiwa monthele yokualamba Huku uhanda ove ufuene kwe. Ngotyo, Nombimbiliya, Jeova muene welitumbula etyi ati: “Ame, ame Jeova. Eli olio enyina liange.”—Isaias 42:8.
Nombimbiliya Jeova welitumbula okuti: “Ame, ame Jeova. Eli olio enyina liange.”—Isaias 42:8
Mahi okuti ku Jeova tyesukisa okunoñgonoka enyina liae nokulitumbula? Tutalei: Enyina lia Huku liahonekwa movihonekwa vio Hebreu, elaka lio konthuko nomaletela aa ekuana (יהוה) eiwe okuti, Tetragrama, iya avasiwa mo Vihonekwa viotete ovikando vihungi 7.000. Enyina olio enyingimo vali tyipona omanyina omakuavo ekahi Mombimbiliya. Tyotyili otyo tyilekesa okuti Jeova uhanda tumunoñgonoke nokutambula enyina liae.a
Oupanga wovanthu haunene uhimbikila kokulipopila omanyina. Okuti ove wii enyina lia Huku?
Vamwe vasoka okuti mokonda Huku omusukuki iya omukulami, okutumbula enyina liae okuhena nonthilo nae. Tyotyili katyaviukile okupenyenyeka enyina lia Huku, ngetyi uhapopi omapita enyina liepanga liove. Mahi, Jeova uhanda vana vemuhole vankhimaneke enyana liae, nokulinoñgonokesa kovanthu. (Salmo 69:30, 31; 96:2, 8) Hinangela etyi Jesus alongesa ovalongwa okulikuambela okuti: “Tate yetu keulu, enyina liove lisukukiswe.” Tupondola okusukukisa enyina lia Huku mokulipopila ovanthu. Iya otyo tyitukalesa noupanga nae.—Mateus 6:9.
Ombimbiliya ilekesa okuti Huku uhole vana “vasokolola, kenyina liae.” (Malaquias 3:16) Vokulinga ngotyo, Jeova wevelaa okuti: “Ame mandyiveamena, mokonda vanoñgonoka enyina liange. Ovo mavandyihana iya ame andyivetavela. Mandyikala navo tyina vamona ononkhumbi.” (Salmo 91:14, 15) Okunoñgonoka enyina lia Jeova nokulitumbula tyakolela inkha tuhanda okufuena ku Huku atukala noupanga nae.
a Katyihambukiswa okutala ovapitiyi ovanyingi vapola enyina lia Huku Mombimbiliya, ngwe enyina olio liahonekwa ovikando ovinyingi Movihonekwa vio Hebreu vitiwa o Testamendu Onkhulu. Tyihe otyo, penyina lia Huku vapingiyapo omanyina enkhimano ngetyi o “Tatekulu” ine o “Huku.” Opo unoñgonoke vali konthele yotyo tala momukanda Oityi Ombimbiliya Tyili Ilongesa? pefo 195-197 walingua no Nombangi mba Jeova.