Omapulo Ombimbiliya Akumbululwa
Omokonda yatyi ovanthu ovanyingi vetavelela okuti kuna Omutungi?
Okuti omuenyo kauhuvisa?
Kohale omuhoneki umwe wapopile okuti: “Natungwa monkhalelo imwe ihuvisa unene.” (Salmo 139:14) Tyina usoka olukembe lutuka kohonde, katyikuhuvisa? Ovanthu ovanyingi vetavela okuti ovipuka aviho pena ou wevitunga.—Tanga Salmo 139:13-17; Hebreus 3:4.
Wokuatunga ohi aiho opo ikalwe, oe watunga ovipuka aviho vina omuenyo. (Salmo 36:9) Omutungi upopia novanthu, iya wetupopila oñgeni atuwa.—Tanga Isaías 45:18.
Okuti tuatuka kovinyama?
Ovipuka ovinyingi molutu luetu, vielifwa no viovinyama. Mahi vielifwa tupu, omokonda Omutungi watunga ovanthu novinyama opo vikale kombanda yohi, wike vala. Etyi Omutungi alinga omulume wotete, kemupolele kovinyama, mahi wemupola meheke.—Tanga Gênesis 1:24; 2:7.
Ovanthu velikalela novinyama mononkhalelo onombali mbakolela. Yo tete, omokonda ovanthu vetyivila okunoñgonoka Omutungi, nokumuhumba, nokukala nonthilo nae. Ya vali, ovinyama kaviatungilwe pala okukalako apeho, mahi ovanthu vatungwa pala okukalako apeho. Mahi pahe, ovanthu aveho vapiñgana ononkhia komulume wo tete wehetavelele okuhongolelwa Nomutungi.—Tanga Gênesis 1:27; 2:15-17.