OSAPI YO KONDYE | HAMBUKILWA OVILINGA VIOVE
Okuti Okuundapa Unene—Otyo-Kohale?
Alex ukahi nokulongela ovikasa metuku-tuku kovilinga, otyo asona. Elipulu okuti. ‘Omokonda yatyi ndyimonena onkhumbi novilinga evi vialema ñgaa? Opi mandyikavasa ovilinga vinthyambukiswa? Inkha hiundapa, ñgeno hahe vali!’
Nga Alex, ovanthu ovanyingi hono kavahande okuundapa unene. Omukuendye umwe upangiya ovipuka, wati: “Ovanthu ovanyingi vasoka okuti ‘okuundapa unene’ ha palavo. Vapopia okuti: ‘Mandyilingi vala ovilinga evi, mahi tyina namavasi evi vikahi nawa, evi andyiveyekepo.’”
Omokonda yatyi ovanyingi vasokela okuti okuundapa unene ha palavo? Hamwe vahongiliyua netyi tyipopiwa molaliu no motelevisau, tyokuti omunthu “ukahi nawa” oyouna uundapa movilinga vihemupuilisa. Matthew ulinga ovilinga viokupangiya onondondelo, novipuka ovikuavo vali, wati: “Ovanthu vasoka okuti inkha uundapa unene, kukala nehambu.” Shane tupu uundapa unene, wamona ovanthu vasoka ngotyo. Wati: “Namphila ovanthu kovilinga vafetwa—mahi kavahande okuundapa onthiki aiho.”
Mahi, ovanthu ovanyingi vena ehambu, iya okuundapa unene vetyihole. Omukuendye umwe utunga onondyuo, una omanima 25 utiwa o Daniel, wati: “Ame ndyisoka okuti okuundapa unene tyieta ouwa omunene, haunene tyina ankho omunthu otyo muene ahanda.” Andre una omanima 23, wati: “Ame ndyitavela okuti, ehambu, nokupanda ovipuka, vielikuata kumwe novilinga. Inkha omunthu kalingi ovilinga, kakala nehambu, mahi ukala vala nelundo!”
Oityi tyakuatesako ovanthu, nga Daniel na Andre okukala nolusoke luaviuka konthele yokuundapa unene? Tyevekuatesako, okuendela monondonga mbo Mbimbiliya. Ombimbiliya kaisoyesa ovanthu opo vahaundape unene, mahi ikuatesako ovanthu okukala nombili, nokulikuatehila. Ombimbiliya kaitupopila vala okuti tuna okulinga ovilinga. Tupu itulekesa oityi tuna okulinga opo tuhambukilwe ovilinga vietu.
Onondonga patyi mbo Mbimbiliya mbupondola okukukuatesako okuhambukilwa ovilinga viove? Opo utale mbumwe ponondonga ombo, tanga onthele ilandulako.