Otyiho Noviponga

Alona wati: “Etyi neiva ongendyo yokulondola ihika, omutima aundomboka, andyikahateka, andyiholama metoto. Mahi, no metoto ankho ndyili, nalinga vala otyiho. Ankho otyiho tyange tyivilapo tyina ndyili vala pondye, nehena apa ndyiholama. Onthiki imwe puetyi ankho ndyikahi nokueenda metapalo, andyihimbika okulila, anehetyivili vali okufuima. Opo ndyitule omutima, pakalele onoola ononyingi. Mahi, ongendyo aihimbika vali.”

Ovita, otyimwe povipuka ovinyingi vieta oviponga. Mongeleka, okunoñgonoka okuti ove, ine o umwe uhole una ouvela uhena ovihemba, tyipondola okukuhanununa. Vamwe vasukalala unene mokonda vena owoma netyi matyiya komutwe. Vena otyiho tyokuti ‘ovana vavo ine ovatekula vavo, mavekulila mouye weyula ovita, novivi, nomphepo yasila, nomivo vipilauluka, nomikihi.’ Oñgeni matulwisa otyiho ngotyo?

Mokonda tyotyili ovipuka ovivi vimoneka, tyina ‘omuna-ndunge amamono otyiponga, ukaholama.’ (Provérbios 27:12) Ngetyi tuovola okuyakulila ekongoko liolutu luetu, tupu tuesukisa okulinga ononkhono mbokuyakulila omalusoke etu, nonkhalelo tulitehelela. Ovinyano viokuliveta, nevi tutala ine tuiva mo televisau no molaliu, viyawisa vali kotyiho tyetu, no tyovana vetu. Okulityilika okutala ovipuka ovio, katyilekesa okuti katusuku novipuka vikahi nokumoneka mouye. Huku katungile omitima vietu opo tukoleleye ovivi. Mahi, wevitunga opo tuyulise-mo “ovipuka aviho viotyotyili, . . . viaviuka, . . . viasukuka, . . . viapandwa.” Inkha tulinga ngotyo, “Huku yombembwa,” metuavela ombembwa momalusoke no momutima.—Filipenses 4:8, 9.

OKULIKUAMBELA TYAKOLELA

Ekolelo liotyotyili litukuatesako okufinda otyiho. Ombimbiliya itulunda okuti, “kalei tyalunguka mokulinga omalikuambelo.” (1 Pedro 4:7) Tupondola okuita ku Huku opo etukuateseko nokutuavela ounongo, nomutima wakola, opo tulinge omatokolo aviuka, nokukala nonthumbi yokuti “utehelela atyiho tukahi nokumuita.”—1 João 5:15.

Ombimbiliya ipopia okuti “omutumini wouye uno” o Satanasi, ha Huku ko. Tupu yati, “ouye auho ukahi pomavoko ondingavivi.” (João 12:31; 1 João 5:19) Ngotyo, etyi Jesus etulongesa opo tulikuambele, wapopia otyili, wati: “Tuyovole kondingavivi.” (Mateus 6:13) Alona wati: “Etyi ongendyo yahimbika vali okuhika, andyiiti ku Jeova opo ankhuateseko okuyunga omalusoke ange. Tupu, omulume wange andyihana, atulikuambela. Tyotyili, okulikuambela tyikuatesako unene.” Ombimbiliya yati: “Jeova ukahi popepi novanthu aveho vemuihana. Na vana aveho vemuihana notyili.”—Salmo 145:18, okatoi.

ETYI TUKEVELELA KOMUTWE

Melongomona liae lio Komphunda, Jesus walongesile ovalanduli vae opo velikuambele okuti: “Ouhamba wove uye.” (Mateus 6:10) Ouhamba wa Huku, maukanyima-ko atyiho tyitukalesa notyiho. Menyina lia Jesus “Ohamba Yombembwa,” Huku “makamanako ovita alo kuna kuaoyela ohi.” (Isaías 9:6; Salmo 46:9) “Huku makakoyesa ovanthu ovanyingi . . . Otyilongo katyikakatukila vali otyilongo otyikuavo nomitunga, tupu kavekelilongesa vali ovita. . . . Nawike mekevetilisa owoma.” (Miquéias 4:3, 4) Onombunga mambukakala nehambu, “avakatunga onondyuo avakala-mo, avakatuika omiti avakalia ovinyango viavio.” (Isaías 65:21) “Nawike vali kombanda yohi makati: ‘Ame ndyivela.’”—Isaías 33:24.

Hono, namphila tuliyunga nawa, mahi tyipuiya okulityilika “ovitateka viuhuluka vala,” ine okulityilika okukala pomphangu ihaviukile momuvo uhaviukile. (Eclesiastes 9:11) Tunde kohale, ovita, noungangala, nomauvela, vitualako okuipaa ovanthu ovaviuki. Oityi ovanthu ovo, vehena etyi valinga vakevelela?

Ovanthu ovanyingi-nyingi, vokuiwe vala na Huku, mavakakala vali nomuenyo. Mahi, nkhele velele mehinangelo liafuapo lia Huku, alo onthiki ‘aveho ovo . . . mavakatunda-mo.’ (João 5:28, 29) Ombimbiliya itupameka netutilo okuti: “Tuna ekevelelo eli ngomphameno yohande, yapama nokuakola, iya linyingila alo nthele ina ekulutina.” (Hebreus 6:19) Iya Huku, waavela ovanthu “onthumbi yokuti onthiki oyo yekoyeso maiya, mokonda wemupindula mononkhia.”—Atos 17:31.

Mahi, nkhele na vana vaovola okuhambukiswa Huku mavakala notyiho. Paul, na Janet, na Alona, vekahi nokufinda otyiho vena, mokulikuambela apeho ku Huku, nokupameka ekolelo liavo muetyi Ombimbiliya ilaa. Ngetyi ekahi nokulinga novakuatate ovo, “Huku wokuava ekevelelo, emuyulise nehambu aliho nombembwa, mokonda muna onthumbi mwe.”—Romanos 15:13.