Okuti Kuna Umwe Omunthu Utehelela Omalikuambelo?

Ovanthu vamwe vasoka okuti okulikuambela okupesela vala omuvo, kutupu-ale nawike weetehelela. Vakuavo valinga ononkhono mbokulikuambela, mahi kavenekumbululwe. Omunthu umwe uhetavela okuti kuna Huku, wapopia etyi asoka konthele ya Huku iya elikuambela okuti: “Nkhumbulule-vo okunthotovekela vala katutu.” Mahi ati, Huku atualako “tyihakumbulula.”

Mahi, Ombimbiliya itupopila okuti kuna Huku iya oe utehelela omalikuambelo. Ombimbiliya ipopila ovanthu tunde kohale okuti: “Oe [Huku] mekulingila onkhenda tyina uliyavela okuita ombatelo. Tyina amekuivi, mekukumbulula liwa-liwa.” (Isaías 30:19) Oversikulu onkhuavo yo Mbimbiliya yati: “Elikuambelo liovaviuki limuhambukiswa.”—Provérbios 15:8.

Ombimbiliya tupu ipopia onongeleka mbovanthu velikuambelele, avakumbululwa. Oversikulu imwe yati, Jesus ankho “wiita ku Una ankho upondola okumuyovola . . . iya Huku emutehelela.” (Hebreus 5:7) Onongeleka ononkhuavo, mbuvasiwa mu Daniel 9:21 no mu 2 Crônicas 7:1.

Iya omokonda yatyi ovanthu vamwe velitehelelela okuti omalikuambelo avo kaakumbululwa? Opo tutehelelwe, tuna okulikuambela vala ku Jeova Huku yo Mbimbiliya,a ha ko nohuku ononkhuavo ine o kovakuaukulu. Huku tupu uhanda “tuite etyi tyelikuata nehando liae,” ovipuka oe etavela. Huku utulaa okuti inkha tulikuambela monkhalelo oyo, “metutehelela.” (1 João 5:14) Ngotyo opo omalikuambelo etu atehelelwe, tuna okunoñgonoka Huku yo Mbimbiliya, netyi ahanda.

Ovanthu ovanyingi vetavela okuti okulikuambela hatyiso vala tyo nongeleya, kuna Huku utehelela omalikuambelo nokueekumbulula. Isaac, wo ko Kenia, wati: “Ame nelikuambela okuita opo ankhuateseko okunoñgonoka Ombimbiliya. Konyima yononthiki mbehehi, omunthu umwe weya kuame iya amphe ombatelo ankho nesukisa.” Hilda wo mo Filipina, ankho uhanda okuyeka-po okusipa ine okupuena. Etyi etyilinga ovikando vimwe ehetyivili, omulume wae emupakela-mo okuti: “Oityi uhelikuambelela ku Huku opo ekukuateseko?” Omukai elikuambela, iya ati: “Andyihuvu okutala onkhalelo Huku ankhuatesako. Nahimbika okulithelela okuti ovipepe viokusipa vikahi nokutepuluka. Iya andyiyeke-po otyituwa otyo.”

Okuti Huku wesuka nokukukuatesako konthele yomasukalalo ove elikuata nehando liae?