Pahe Ndyilitehelela Okuti Ndyipondola Okukuatesako Vakuetu

OMUENYO WANGE KOHALE:

Natyitilwa mo Acul, epundaumbo likala kokule pohika yonomphunda koutakelo wo Guatemala. Ombunga yange oyo va Ixil, omuhoko umwe watuka ko va Maya. Nekula nokupopia elaka lio Espanhola, nelaka lietu lio potyilongo. Natyitwa pomuvo wovita ovinene vio Guatemala, viakalele omanima 36. Mokueenda kuomuvo oo, ova Ixil ovanyingi avaipawa.

Puetyi ankho ndyina omanima 4, omukulu wange womanima 7, ankho ukahi nokunyana no ongalanata, iya aitutana. Moluotyo omukulu wange anyimi, iya ame andyituiki omaiho. Konyima yotyo, andyikalongeswa mosikola imwe yovana ovamphoki Mepundaumbo lio Guatemala, omu nalongeswa elaka lio Braille. Ovaundapi wo mosikola omo, andyilika okutomphola novana vakuetu. Ngotyo, vana tulongeswa navo avahimbika okunianga. Apeho ankho ndyina ounye, iya andyiivaluka onohanyi onombali ndyihole okukakala keumbo kese nima, na me unthyole, nokuna okankhenda name. Etyi natuukisa omanima 10 me anyimi. Tyina ankho ndyisoka okuti omunthu wike mouye ankho unthyole wanyima, atyindyihama unene.

Etyi natuukisa omanima 11, andyikondoka kepundaumbo lietu, iya andyikakala nomukulu wange mu tate, nombunga yae. Ankho vampha atyiho nesukisa, mahi ankho nawike unkhuatesako konthele yonkhalelo ndyilitehelela. Pamwe ankho ndyiliyava ku Huku okuti: “Omokonda yatyi me anyimina? Oityi ame natuikila omaiho?” Ovanthu ankho vapopia okuti oviponga ovio, ehando lia Huku. Andyisoko okuti Huku ondingavivi utupu okankhenda. Heliipaele vala mokonda ankho ndyitupu oñgeni mandyityilingi.

Okukala omumphoki tyankhalesa omapita molutu no monkhalelo ndyilitehelela. Puetyi ndyimukuendye, ovikando ovinyingi nakuatelwe kononkhono okulinga otyihola. Hine-tyipopie komunthu nawike, mokonda ankho ndyisoka okuti nawike-ale mesuku natyo. Ovanthu kavapopi name, iya ame hitomphola nomunthu nawike. Ankho ndyiivite oulike nokuasoya, tupu ankho ndyitupu onthumbi momunthu nawike.

OÑGENI OMBIMBILIYA YAPILULULA OMUENYO WANGE:

Puetyi pahe ndyimuendye, Onombangi mba Jeova vevali, (ovalinepi) avambasi posikola pomuvo wokuomba katutu. Umwe povalongesi vange ankho una okankhenda name, oe weveita opo veye okunthalela-po. Iya avamphopila konthele yomilao vio Mbimbiliya viokuti vokuanyima mavakatutiliswa, iya ovamphoki mavaikuka omaiho. (Isaías 35:5; João 5:28, 29) Andyihambukwa netyi vandongesa, mahi ankho tyemphuiya unene okutomphola navo, mokonda ankho hetyiliyile okupopia. Namphila ankho ndyina ohonyi, mahi nohole, nokuapwa elundo, vatuaileko okunthalela-po opo vandongese konthele yo Mbimbiliya. Ovalinepi ovo, ankho vaenda etyi tyilamba po nokilometu 10, nokuinduka omphunda opo vehike mepundaumbo lietu.

Omukulu wange mu tate, amphopila okuti ovanthu ovo vavala nawa, mahi ha vahona-ko. No ngotyo, ankho valekesa okuti vesuka name, nokundyetela ovipuka. Andyisoko okuti, Ovakristau votyotyili vala vapondola okulinga ononkhono ngombo.

Andyililongesa Ombimbiliya navo nombatelo yomikanda vio Braile. Namphila ankho ndyikahi nokunoñgonoka etyi ndyilongeswa, mahi momutima ankho tyepuiya okutavela ovipuka vimwe. Mongeleka, ankho tyimphuiya okutavela okuti Huku tyotyili wesuka name, nokuti vakuetu navo vesuka name. Andyinoñgonoka omokonda yatyi Jeova ayekelela nkhele ovipuka ovivi. Mahi, ame tyemphuiyile unene okutavela okuti tyotyili o Tate wokuna oluembia.a

Katutu-katutu, etyi ankho ndyililongesa Movihonekwa, atyinkhuatesa-ko okupilulula onkhalelo yange yokusoka. Mongeleka, nanoñgonoka okuti Huku una unene okankhenda na vana vamona ononkhumbi. Huku wapopia konthele ya vana vemufenda vamoneswa emone, okuti: “Tyotyili namona ononkhumbi mbovanthu vange . . . ame ndyii nawa omaluihamo avo.” (Êxodo 3:7) Etyi nahimbika okupanda ovituwa oviwa via Jeova, atyimphe ondundo yokupakula omuenyo wange kwe. Mo 1998 andyimbatisalwa iya andyikala Ombangi ya Jeova.

Etyi palamba enima tunde pombatisimu yange, andyikuate mosikola imwe yovamphoki, popepi nepundaumbo lio Escuintla. Omukulu umwe wewaneno aimbuka ovitateka ndyilamba navio opo ndyiye komaliongiyo. Ewaneno ankho liokuli vali popepi, likahi konyima yomphunda ina ankho Onombangi vainduka opo veye okundongesa. Ankho tyimphuiya unene okulinga oungendi oo. Opo ankhuateseko, omukulu oo wewaneno apopi nombunga imwe Yonombangi mepundaumbo olio. Iya avetavela okukala name meumbo liavo, nokunkhuatesako okuenda komaliongiyo. Tunde opo, vekahi nokunthekula nawa ngatyina ndyi-wombunga yavo.

Ndyina onongeleka ononyingi konthele yohole yotyotyili ovakuatate mewaneno vena name. Onongeleka ombo ambuho, mbampha onthumbi yokuti okukala Ombangi ya Jeova, ndyikahi pokati Kovakristau votyotyili.—João 13:34, 35.

OUWA NAPOLA-KO:

Hinelitehelele vali okuti ndyitupu esilivilo ine okukala tyihena ekevelelo. Pahe omuenyo wange wakolela unene. Ame ndyiundapa omuvo auho movilinga vio Nombangi mba Jeova viokulongesa Ombimbiliya. Pahe hisoko vali koulema wange, ndyina ehambu liokulongesa vakuetu otyili otyiwa unene tyo Mbimbiliya. Tupu, ndyina ehambu mokonda ndyimukulu wewaneno, ndyilinga omalongomona Ombimbiliya momawaneno o pohika yetu. Pamwe ndyilinga alo umwe omalongomona Ombimbiliya movionge viononthiki ononthatu, mukala ovanthu ovanyingi unene.

Mo 2010, nakuata Mosikola Yovilinga Viokuivisa, (hono itiwa Osikola Yovaivisi Vouhamba wa Huku) yalingilwe mo El Salvador. Osikola oyo yamphongiya opo ndyifuisepo nawa ovilinga viange mewaneno. Okulongeswa mosikola oyo, tyampha onthumbi onene yokuti nakolela ku Jeova Huku, una ulongesa kese munthu pala ovilinga viae. Tupu tyampha onthumbi yokuti una oluembia name.

Jesus wati: “Okuava tyihambukiswa vali tyipona okupewa.” (Atos 20:35) Hono ndyipondola okupopia okuti ndyina ehambu enene ankho nahasoko. Pahe ndyilitehelela okuti ndyipondola okukuatesako vakuetu.