Nakala Nombembwa na Huku na Me

ME wamphula okuti: “Omokonda yatyi uhafendela ovakuakulu vove? Kuanoñgonokele okuti una omuenyo mokonda yavo? Ulekesa kuvo okuti wapandula? Oñgeni upondola okuyekapo oviso tuavasale novakuaukulu vetu? Okuyekapo okulinga ovipuka ankho vilinga ovakuaukulu vetu ongatyina efendelo lietu olio matutu.” Etyi Me amana okupopia ngotyo, ehimbika okulila.

Etyi palamba onohanyi mbehehi, Onombangi mba Jeova avahande okulongesa me Ombimbiliya. Me ehetavela okulilongesa, mahi mokonda ankho omunthu omuwa evepopila vandongese. Mahi pahe ahimbika okunumanena, mokonda ankho pamwe himutavela. Mahi, mokonda ankho nahanda okuhambukiswa Jeova, katyapepukile okumutavela. Ankho katyapepukile, mahi Jeova amphe ononkhono.

OKULILONGESA KONTHELE YA JEOVA

Ombunga yange ova Budista, ngovanthu ovanyingi vomo Japão. Mahi etyi nelilongesa onohanyi onombali no Nombangi mba Jeova, andyitavela okuti Ombimbiliya oyo tyotyili. Etyi nanoñgonoka okuti ndyina Tate ukala keulu, andyihande okumunoñgonoka vali nawa. Potete, ame na Me tuhambukwa okupopia etyi tuelilongesa. Andyihimbika okuenda komaliongiyo mo Tyalumingu. Ankho nanoñgonoka ovipuka ovinyingi, andyipopila Me okuti himalingi vali oviso viova Budista. Liwa-liwa, me apiluluka. Me ati: “Okukala nomunthu mombunga wehena ohole novakuaukulu vetu katyikahi nawa.” Amphopila opo nehelilongese vali Ombimbiliya nokuenda komaliongiyo. Hasokele okuti me mapopi ngotyo! Me apiluluka akala ngatyina omunthu omukuavo.

Tate etavela ku Me. Nelilongesa mu Efésios kapitulu 6 okuti Jeova uhanda ame ndyitavele kovo tate. Ankho nahanda ombunga yetu ikale vali nombembwa, andyisoko okuti inkha ndyivetehelela, okuenda kuomuvo navo mavanthehelela. Pomuvo opo, ankho ndyikahi nokulipongiya opo ndyikalinge ono polova kosikola, ngotyo andyitavela etyi tyamphopilile ovo tate ono hanyi ononthatu mbokualamba. Mahi nalaele Jeova okuti mandyende vali keliongiyo tyina ono polova mbamapu.

Etokolo liange ankho kaliaviukile mokonda yomahunga evali. Tete, ankho ndyisoka okuti tyina pamalambe onohanyi ononthatu ehando liange liokuumbila Jeova malikulu. Mahi, oupanga wange na Jeova autepuluka liwa-liwa. Vali, ovo Tate na Me ankho vahanda ndyiyekepo okuumbila Jeova.

EKUATESO NOKUYELWE

Mondyuo Yomaliongiyo, ankho na pumphama no Nombangi ononyingi veyelwe no nombunga mbavo. Avamphopila okuti Jeova mamphameka. (Mateus 10:33-37) Avamphopila okuti inkha ndyitualako nekolelo mu Jeova, ombunga yange vapondola okulilongesa konthele yae. Ankho nahanda okuyumba onthumbi mu Jeova, ngotyo andyihimbika okulikuambela unene.

Ombunga yange ankho indyele mononkhalelo mbelikalela. Me amphopila opo ndyiyekepo okulilongesa. Pamwe ankho hipopi. Tyina ndyina etyi nahanda okupopia, apeho ankho tuyaya mokonda kese wike uhanda okulekesa okuti waviukisa. Pahe andyiimbuka okuti inkha ndyikala vali nonthilo netyi Me asoka netyi etavela, kamatuyaye vali. Ovo tate avamphe vali ovilinga opo ndyikale vala meumbo. Pamwe ankho vandyikila pondye, nokuhantyilapo okulia.

Me apopila ovanthu ovakuavo opo vemukuateseko okunthyongiliya. Apopila omulongesi wange, mahi ehetyivili. Me anthuala komuhona wae opo antyindile okuti onongeleya ambuho ombo matutu. Atelefonalela kovanthu ovakuavo mombunga yetu eveiti opo vemukuateseko. Otyo atyinumanesa unene. Mahi momaliongiyo, ovakulu vewaneno avamphopila okuti tyina Me apopila vakuavo konthele yotyitateka tyange, ukahi nokuveavela oumbangi.

Ovo tate ankho vahanda ndyikalongeswe kosikola onene opo ndyivase ovilinga vikahi nawa. Ankho atuho tuanumana, mokonda yotyo andyivehonekela omikanda ominyingi pala okuvehangununina etyi nahanda okulinga. Tate anumana unene, ati: “Inkha usoka okuti movasi ovilinga, vivasa muhuka ine hangotyo otundu meumbo.” Andyilikuambela ku Jeova andyiiti opo ankhuateseko. Monthiki onkhuavo, tyina ankho ndyikahi movilinga viokuivisa, onompange vevali avamphe otyilinga tyokulongesa ovana vavo. Tate ehetyihande, ahapopi vali naame ahimbika okunianga. Me apopi okuti hahe vali nakalele omphuki tyipona okukala Ombangi ya Jeova.

Pamwe ankho ndyitupu onthumbi yokuti Jeova uhanda umwe ndyitualeko okuanya ovo tate. Andyilikuambela ku Jeova andyisokolola etyi Ombimbiliya ipopia konthele yoluembia. Otyo atyinkhuatesako vali unene iya andyinoñgonoka okuti ovo tate valinga tupu ngotyo omokonda vesuka naame. Jeova ankhuatesako okuviukisa olusoke luange iya andyinoñgonoka etyi ndyina okulinga. Tupu, tyina ankho ndyenda movilinga viokuivisa, ankho ndyivipanda vali unene. Pahe ankho nahanda okukala omukokoli-ndyila.

MOVILINGA VIOU KOKOLI-NDYILA

Etyi onompange vamwe vetyiiva okuti nahanda okukala omukokolil-ndyila, avamphopila okuti nkhele ndyipondola okukevela alo ovo tate vatula omutima. Andyilikuambela okuita ounongo, andyiovolola, otyo ndyisoka omokonda yatyi nahandela okukala omukokoli-ndyila, tupu andyipopi novakuatate no nomphange valongoka motyili. Konyima andyitokola okuhambukiswa Jeova. Tupu andyinoñgonoka okuti inkha ndyikevela vali otyo nahakala omukokoli-ndyila ovo tate vapondola okuntyika.

Andyihimbika ovilinga vioukokoli-ndyila menima ndyikahi nokumanuhula okulongeswa mosikola onene. Etyi nakala omukokoli-ndyila, andyihande okukaundapa oku kuesukisa vali ovaivisi. Mahi Me na Tate avehetavela ndyitunde meumbo. Ngotyo andyikevela alo natuula omanima 20. Konyima andyiiti ko filiale opo vanthume popepi nombunga yange kokulio kuo Japão opo Me ahasukalale vali unene.

Tyina ankho ndyikahi movilinga ovio, ndyihambukwa okutala ovalongwa vange Vombimbiliya vambatisalwa. Andyihimbika okulilongesa o Ingelesi mokonda ankho nahanda okuundapa vali unene movilinga viokuivisa. Konyima, etyi namona ombili yono mphange vevali ovakokoli-ndyila vavilapo mewaneno no ñgeni vakuatesako vakuavo, naame andyitokola okukala omukokoli-ndyila wavilapo. Pomuvo opo, Me avele unene, andyikondoka keumbo opo ndyikemukuateseko. Otyo atyimuhuvisa unene, akala vali nokankhenda naame.

OVIWA VIATUNDA KU JEOVA

Etyi palamba omanima epandu vali, omukokoli-ndyila wavilapo utiwa o Atsushi, napopia konthyimbi, anthumikisa omukanda. Ankho uhanda tulinepe iya amphulu oityi ame ndyisoka. Nalumwe nasokele okulihanda na Atsushi, iya tupu ankho hisoko okuti wesuka naame. Etyi palamba ohanyi, andyimukumbulula okuti nahanda okumunoñgonoka vali nawa. Andyiimbuka okuti ovilinga nahanda okuvasa meongano nae ovio ahanda. Ankho tuhanda okutualako movilinga viomuvo auho, iya tuafwapo okutavela kese tyilinga tupewa. Pakala vala katutu, atulinepe. Andyihambukwa unene etyi Me na Tate, novakuavo vali mombunga veya kotyinepo tyetu.

Konyima, etyi tukahi movilinga vioukokoli-ndyila womuvo auho, Atsushi apewa otyilinga tyokukalelapo omutalelipo womauaneno. Konyima, atupewa otyilinga tyoukokoli-ndyila wavilapo iya atukala ovatalelipo vomawaneno. Etyi tuamana okutalelapo omawaneno aeho, o mbetele aitulikalela. Avetupulu inkha tuafuapo pala okuenda ko Nepal atutualako novilinga vietu viokutalelapo omawaneno.

Ankho nalinga otyiho tyokusoka oñgeni ovo tate mavakala inkha ndyiilukila vali kokule. Etyi neve telefonalela, Tate ankhumbulula okuti: “Moende kotyilongo otyiwa.” Ono simanu mbumwe konyima, umwe pomapanga ae wemuavela omukanda upopia oñgeni otyilongo tyo Nepal tyikahi, iya Tate ankho kenesoke okuti otyilongo tyikahi nawa pala okukapila.

Atuhambukwa unene okukala pokati kovanthu voko Nepal. Konyima, atuhimbika okutalelapo omawaneno omo Bangladesh. Namphila ankho otyilongo otyo tyikala popepi no Nepal, mahi ankho tyelikalela unene. Ankho tumona ovipuka vielikalaila movilinga vietu. Etyi palamba omanima etano, atupopilwa opo tukondoke ko Japão, pahe oku pehepano tuna ehambu movilinga viokutalelapo omawaneno.

Nelilongesa unene konthele ya Jeova etyi tuaundapa ko Japão, noko Nepal, noko Bangladesh. Ovanthu vakala movilongo ovio vena ovituwa, noviso vielikalaila. Iya kese munthu welikalela. Netyimona oñgeni Jeova akuatesako kese munthu, nokumutavela, nokumukuatesako, nokumuyamba.

Ndyina ovipuka ovinyingi ndyipandula ku Jeova. Wandyeka ndyimunoñgonoke, nokulinga ovilinga viae, iya wandyavela omulume Omukristau ukahi nawa. Huku wankhuatesako okulinga omatokolo omawa, iya ndyina oupanga omuwa na Jeova nombunga yange. Ndyipandula Jeova, ame na Me tuakala vali omapanga. Ndyipandula unene mokonda Nakala Nombembwa na Huku na Me.