Uhakale Notyiho

ELONDOLO LIO MBIMBILIYA: ‘Yekeipo okukala notyiho’—Mateus 6:25.

Otyo tyihangununa tyi? Jesus wapopile onondaka ombo Melongomona alingile Komphunda. Ngetyi tyilekesa omukanda umwe upopia konthele yo Mbimbiliya, ondaka “okukala notyiho” melaka lio Gregu ipopia etyi omunthu “akala tyina ahepa, ine hamwe una ondyala, nomasukalalo omakuavo akala nao ononthiki ambuho.” Otyiho tyakutikinya okusukalala unene novipuka maviya komutwe. Katyapengele okusuka novipuka tuhanda, nokusuka nouwa wa vana tuhole. (Filipenses 2:20) Mahi etyi Jesus apopia okuti “uhakale notyiho,” ankho ukahi nokulondola ovalanduli vae opo vahasukalale unene, mokonda tyipondola okuvekalesa nowoma netyi matyimoneka muhuka, iya otyo ankho tyipondola okuvepola ehambu. —Mateus 6: 31, 34.

Okuti elondolo olio na hono liakolela? Ankho tupaka momutwe elondolo olio lia Jesus matukala ovanongo. Omokonda yatyi? Omokonda omikanda vimwe vipopia otyiho, viati ovanthu vokusukalala unene, vakala tyanumana, iya okukala notyiho ngotyo, tyiveetela “omauvela, ngouvela utiwa ulcera, nouvela womutima, no asma, ouvela (wokuhafimi nawa).”

Jesus wapopia okuti uhakale notyiho, mokonda utyii okuti: Katyitukuatesako. Jesus wapula okuti: “Olie puonwe mokonda yokusukalala unene, upondola okuyawisa vali ononthiki komuenyo wae?” (Mateus 6:27) Okusukalala unene katyiyawisa komuenyo tuna. Tupu, pamwe tukala nowoma notyipuka tyimwe, mahi atyihamoneka ngomu ankho tutyisokela. Omunthu umwe wapopia konthele yotyo okuti: “Okusukalala unene netyi matyiya komutwe ononkhono-pwila. Mokonda etyi matyiya pamwe otyiwa, hatyivi ngetyi ankho tusoka.”

Oñgeni matulityilika okukala notyiho? Tete, o mokuyumba onthumbi mu Huku. Huku wavela oviila okulia tupu uundisa nawa ononthemo. Okuti kapondola okukuatesako ovanthu vae muetyi vesukisa? (Mateus 6:25, 26, 28-30) Vali, hambukilwa etyi una hono. Jesus wati: “Muhakalei notyiho nonthiki yomuhuka, mokonda kese nthiki ina omasukalalo ayo.” Ove kutavela okuti, “kese onthiki ina ovivi viayo”?—Mateus 6:34.

Inkha tutavela omalondolo a Jesus, matyitukuatesako okuliyakulila kovipuka vipondola okunyona ekongoko lietu. Tupu, omalondolo oo, etuetela omapole mo mutima. Otyo, otyo Ombimbiliya iihana okuti “ombembwa ya Huku.”—Filipenses 4:6, 7.