OmapulO Ovatang
“Ondaka patyi ya Huku” yapopiwa mu Hebreus 4:12 okuti “ina omuenyo nononkhono ononene”?
Ono versikulu mbatetekela nombu mbalandulako, mbutukuatesako okuimbuka okuti Paulu ankho ukahi nokupopia onondaka konthele yehando lia Huku, mbuvasiwa mo Mbimbiliya.
Ovikando ovinyingi omikanda vietu vipopia konthele ya Hebreus 4:12 pala okulekesa okuti Ombimbiliya ina epondolo liokupilulula omienyo viovanthu, iya otyo otyili. Mahi, otyiwa okunoñgonoka oityi Paulu ankho ekahi nokupopia etyi ahoneka onondaka mbukahi mu Hebreus 4:12. Ankho ukahi nokuavela ondundo Ovakristau ova Hebreu opo vaundapele kumwe nehando lia Huku. Ehando olio lia Huku livasiwa movihonekwa vikola. Paulu wapopia ongeleka yova Isilayeli Huku ayovola koupika mo Egitu. Ankho vena ekevelelo liokuenda motyilongo Tyalaelwe, “otyilongo muna owiki nomahini” omu ankho vapondola okukapululukwa.—Êxodo 3:8; Deuteronômio 12:9, 10.
Olio ankho ehando lia Huku. Mahi ova Isilayeli kavatuaileko nokulandula ehongolelo lia Jeova, nokukala nekolelo mwe, mokonda yotyo ovanyingi puvo avahanyingila motyilongo Tyalaelwe. (Números 14:30; Josué 14:6-10) Mahi, no ngotyo Paulu nkhele wapopia “omulao wokunyingila mepululuko lia [Huku].” (Hebreus 3:16-19; 4:1) “Omulao” oo ulinga onthele yetyi Huku ekahi nokuhololola konthele yehando liae. Ngo Vakristau ova Hebreu, onthue tutanga konthele yehando olio nokuundapela kumwe nehando olio. Opo alekese okuti ehando olio lielikuata kumwe Novihonekwa, Paulu wapopia onondaka mbukahi mu Gênesis 2:2 no Salmo 95:11.
Tyihika komitima vietu okunoñgonoka okuti “omulao wokunyingila mepululuko lia [Huku] utualako.” Onthue tuna onthumbi yokuti etyi Ombimbiliya ilongesa konthele yokunyingila mepululuko lia Huku tyili-tyili tyitavela, iya tukahi nokulinga atyiho opo tunyingilemo. Onthue katulingi vala ngotyo tyina tulandula Ovitumino viapelwe Moisesi, ine tyina tulinga ovipuka oviwa vihambukiswa Jeova. Mahi, mokonda tuna ekolelo mu Huku, tuna ehambu nokuundapela kumwe nehando liae nokutualako okulinga ngotyo. Ovanthu ovanyingi mouye auho vekahi nokuhimbika okulilongesa Ombimbiliya, tupu vekahi nokulilongesa okuti Huku ukahi nokuhololola ehando olio. Otyo tyikahi nokulunda ovanthu ovanyingi okupilulula omuenyo wavo, nokulekesa ekolelo liavo, nokumbatisalwa. Onkhalelo vekahi nokulinga omapiluluko, otyilekeso tyokuti “ondaka ya Huku ina omuenyo nononkhono ononene.” Etyi Huku ekahi nokuhololola Mombimbiliya konthele yehando liae tyikahi nokupilulula omuenyo wetu, tupu matyitualako nokupilulula omuenyo wetu.