Ame Ankho Hihande Okunkhia!

OMUENYO WANGE KOHALE

Ame natyitilwa ko Paddington otyilongo tyimwe tyina ovanthu ovanyingi popepi no Londres ko Inglaterra. Ame ankho ndyikala na me iya novakulu vange ovakulu kuame vetatu. Tate yange weile okututalela-po iya mokonda yokunwa unene akala novitateka.

Puetyi ankho ndyimona, me ankho apeho ulinga omalikuambelo ovinthiki aviho. Ankho ndyina Ombimbiliya onthutu ina ono Salmu iya andyihimbika okuimba oviimbo vimwe ame ankho ndyihole. Ndyihinagela okuti natangele onondaka mbumwe momukanda wange ankho ndyihole unene mbati: “Nthiki imwe kamakutyi.” Onondaka ombo ankho mbunkhalesa tyihena otumphoki mokonda ankho ndyisoka ovipuka ovinyingi mavikeya komutwe. Ame ankho ndyisoka okuti, ‘momuenyo muna vali ovipuka ovinyingi.’ ‘Omokonda yatyi nakalela-ko?’ Ame ankho hihande okunkhia!

Ankho nasukalala nokunoñgonoka etyi matyikamoneka. Ankho ndyihetekela okupopia no vokuankhia, nthiki imwe ame nomapanga ange okosikola atukatalelapo omalangalo iya atutale onosinema mbulekesa ovipuka ovivi. Onthue ankho tusoka okuti otyipuka tyimwe tyihambukiswa iya tyitilisa owoma.

Etyi ankho ndyina vala omanima ekwi, andyihimbika okukala omphuki. Andyihimbika okusipa omakaya iya liwa-liwa andyityityiliya. Konyima, andyihimbika okusipa epangwe. Etyi ankho ndyina omanima 11, andyihetekela okunwa ovikunwa vikoleswa. Namphila ame nahahande omupepo watyo, mahi ankho ndyihole onkhalelo omunthu akala tyina akolwa. Tupu ankho ndyihole oviimbo nokunyana. Ame ankho ndyityihole tyokuenda konofala no kovipito ovikuavo tyina ndyihanda. Ame ankho ndyihole okuhena meumbo kounthiki iya andyikondoka kombimba. Mokonda yokuhalala kounthiki, ankho ndyiponwa unene iya ngotyo apeho ankho ndyihena kosikola. Tyina nahahene kosikola, ankho ndyinwa tyina tulongeswa..

Konthyulilo yenima, kosikola ame ankho hipasala. Me ankho ketyii okuti ame hitavela iya etyi etyiiva anumana unene ehetyihande. Andyilu na me iya meumbo andyiiluka-mo. Mokueenda kuomuvo andyikala nomukuendye wange utiwa Tony, ankho omunthu umwe uvindwa. Tony ankho ulipaka movivi nokulandesa omakaya iya tupu ankho una vala otyituwa tyokuveta vakuavo. Liwa-liwa andyikala omulemi, pomuvo opo ankho ndyina vala omanima 16 etyi nakutula omona wetu wotyiveli.

OÑGENI OMBIMBILIYA YAPILULULA OMUENYO WANGE

I first met Onthiki yotete tuelivasa no Nombangi mba Jeova, opuetyi ankho ndyikala mondyuo imwe mutekulwa ovakai vahanepelwe mahi vena omalukembe. Ngamo ndyipewa novatumini apa ndyilala. Iya apeho ankho Onombangi mba Jeova veya okutalelapo ovakai vamwe ankho tukala navo. Nthiki imwe andyivetañgunisa. Mahi ankho vakumbulula omapulo ange monkhalelo imwe yayandyuluka nawa Nombimbiliya. Ankho ovanthu vamwe vapwa-elundo iya onkhalelo oyo ainthyuvisa unene. Moluotyo, naame andyihimbika okulilongesa Ombimbiliya.

Ngotyo, andyinoñgonoka otyipuka tyimwe Mombimbiliya tyapilulula omuenyo wange. Tunde poututu ame ankho ndyina owoma wokunkhia. Ame nanoñgonoka ondongeso ya Jesus konthele yetutilo! (João 5:28, 29) Tupu nanoñgonoka okuti Huku wesuka naame. (1 Pedro 5:7) Haunene onondaka mba Jeremias 29:11 mbanthyika komutima. Mbapopia okuti: “ ‘Ame muene ndyii nawa omalusoke ndyina konthele yenyi’, otyo tyapopia Jeova, ‘omalusoke ombembwa, ha ononkhumbi, opo ndyimuavele ekevelelo no nonthiki mbo komutwe.’ ” Andyihimbika okukala nonthumbi yokuti ndyina ekevelelo lio kukala-ko apeho Mouye Omupe pano pohi.​—Salmo 37:29.

Onombangi mba Jeova vandekesa ohole yotyotyili. Onthiki yotete naya keliongiyo liavo, ainkhalesa nawa mokonda aveho ankho ovanthu vahambukwa! (João 13:34, 35) Otyo ankho tyelikalela unene nonkhalelo ovanthu vongeleya yange ankho vandinga. Namphila ankho nehekahi nawa, mahi nongotyo Onombangi avandiepesa nawa. Tupu vankhuatesako muatyiho mahi ankho omomuvo nesukisa vali. Andyihimbika nokulitehelela okuti pahe ndyilinga onthele yombunga imwe ina oluembia.

Elilongeso liange lio Mbimbiliya, ankho lilingwa monkhalelo imwe inkhuatesako okulinga omapiluluko opo ndyityivile okuendela movitumino via Huku. Ankho katyapepukile okuyekapo okusipa omakaya. Mahi mokueenda kuomuvo, andyinoñgonoka oviimbo vimwe ankho vinkhalesa nehando liokusipa epangwe, andyiyekepo okutehelela oviimbo ovio. Opo ndyikale nawa, nayekapo okuenda kovipito no ko nofala kounthiki, kuna ankho ndyipondola okuhongiliyua okunwa. Andyikala nomapanga omape apondola okunkhuatesako okukala nomuenyo ukahi nawa.​—⁠Provérbios 13:20.

Momuvo oo, Tony tupu otyo ahimbika okulilongesa Ombimbiliya no Nombangi mba Jeova. Mokonda Onombangi vakumbulula omapulo ae Nombimbiliya, akala nonthumbi yokuti etyi ankho ekahi nokulongeswa otyili. Walinga omapiluluko omanene momuenyo wae: Wayekapo okukala epanga lionongangala, nokuenda kovipito iya tupu wayekapo okusipa epangwe. Mokonda ankho tuhanda okuhambukiswa Jeova, tupu atuimbuka okuti tuesukisa okupilulula onkhalelo yomuenyo wetu iya atuhimbika okukuatesako omona wetu. Onthue atulinepe mo 1982.

Ndyihinangela etyi ankho ndyiovolola ononthele mbo Mutala Womulavi no Despertai!a omahipululo ovanthu vetyivilile okulinga omapiluluko ngetyi ame ankho nahanda okulinga. Napamekelwe unene no nongeleka mbavo. Otyo atyimphe ononkhono mbokulikuatehila, anahayeke-ko. Andyitualako okulikuambela ku Jeova opo ahandyeke-po. Ame na Tony tuambatisalwa iya atukala Onombangi mba Jeova mu Kakwenye yo 1982.

OUWA PATYI NAPOLA-KO

Okuakala noupanga omuwa na Jeova Huku tyayovola omuenyo wange. Ame na Tony tuamona okuti Jeova wetukuatesako momuvo wovitateka. Tuelilongesa okuyumba onthumbi mu Huku momuvo wovitateka iya atulitehela okuti wetukuatesako tupu watekula ombunga yetu.​—Salmo 55:22.

Ame nalinga ononkhono mbokukuatesako ovana vetu okunoñgonoka Jeova ngetyi nalinga. Pahe ame ndyina ehambu liokutala ovana vavo naavo vekahi nokukulila menoñgonoko lia Huku.

Ame pahetyino hipinduka-po vali kounthiki opo ndyisoke kuetyi matyikamoneka komutwe wandyila ine ononkhia. Ame na Tony tutalelapo omawaneno elikalaila Onombangi mba Jeova kese simanu opo tuvepameke. Tuna ehambu liokulongesa vakuetu opo vakale nekolelo mu Jesus, navo opo vakamone omuenyo ­uhapu.