Otyiawa Tyimwe Tyelikalela

JORDAN wapelue okawato kamwe ankho kalinga ngoti ketupu esilivilo. Mahi pahe, otyipuka aavela vali esilivilo. Jordan wati, “omukulu umwe utiwa Russell ankho epanga liombunga yange, oe wekemphele puetyi ankho ndyimututu.” Konyima yononkhia mba Russell, Jordan anoñgonoka okuti, Russell wakuatesileko unene ombunga yae etyi ankho vena ovitateka. Jordan wati “ame nelilongesa unene konthele ya Russell, pahe otyiawa tyina amphele tyina vali esilivilo enene kuame.”

Ongeleka ya Jordan ilekesa okuti, otyiawa kovanthu vamwe tyipondola okukala ine okuhakala nesilivilo. Mahi ku una wetyipeua, tyina esilivilo. Ombimbiliya ipopia konthele yotyiawa tyimwe, monondaka ombu: “Mokonda Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakanyimueko, mahi akala nomuenyo uhapu.”​—João 3:16.

Otyiawa otyo tyipondola okuavela omuenyo una utyitambula! Okuti Pena otyiawa tyimwe tyipondola okukala vali nesilivilo enene tyipona otyiawa otyo? Namphila vamwe kavesukile notyiawa otyo, mahi Kovakristau votyotyili tyina “esilivilo enene.” (Salmo 49:8; 1 Pedro 1:18, 19) Omokonda yatyi Huku aavela omuenyo womona wae ngotyiawa pala ouye?

Apostolu Paulu wetyihangununa no nondaka ombu: “Mokonda yomunthu wike vala onkhali ­yanyingila mouye iya onkhali yaeta ononkhia. Moluotyo ononkhia mbeliyandyana kovanthu va-tyo aveho.” (Romanos 5:12) Omulume wotete, Andau, ketavelele ku Huku tyawina iya otyo atyimuetela ononkhia. Mokonda ya Andau, ononkhia mbeliyandyana mouye auho.

“Ofeto yonkhali ononkhia, mahi otyali tuapewa na Huku omuenyo uhapu, menyina lia Kristu Jesus Tatekulu yetu.” (Romanos 6:23) Opo tuyovoke kononkhia tuatambuliswa, Huku watuma Omona wae, Jesus Kristu pano pohi opo aave omuenyo wae wehena nkhali opo ayovole ovanthu. Pahe mokonda yotyilikutila otyo, tyiiwe okuti “otyilikutila tyeyovo,” aveho vana vena ekolelo mu Jesus, mavakakala nomuenyo uhapu.—Romanos 3:24.

Mokonda yoviwa Huku maavela vana vemufenda menyina lia Jesus Kristu, Paulu wapopia okuti: “Tupandula Huku mokonda yotyiawa etuavela otyali.” (2 Coríntios 9:15) Onthue katutyivili okupopia konthele yotyilikutila tyeyovo mokonda otyiwa unene iya tyihuvisa. Konthele yoviawa aviho Huku aavela ovanthu, omokonda yatyi otyiawa otyo tyakolela vali? Oñgeni otyiawa otyo tyelikalela noviawa ovikuavo?a Iya oñgeni molekesa okuti wetyipanda? Tukukonga opo uvase omakumbululo omapulo oo Mombimbiliya monthele yavali mailandulako.