Vokuavelama—Kononkhambe Ononkhuana Vekukalesa Ñgeni?

Vekahi nokuhateka unene, otyo valinga omuvielo ngoti o womutitimo umwe omunene! Ononkhambe ononkhuana navana vavelama-ko valekesa nawa etyi tyahonekwa Mombimbiliya! Onkhambe yotete ongonga, wokuavelama-ko ohamba omphe yapewa epondolo liokutumina. Konyima yae akuya onkhambe ina otyivala tyotupia. Una wavelama-ko upola ombembwa mouye auho. Akulandula vali onkhuavo onthikovei, ikahi ngenthiki, una wavelama-ko watyinda otyipeyalo, otyo kuiviswa ondyala imwe onene. Konyima, pahe akuya onkhambe imwe yahoka, yehena tyivala. Una wavelamako Ononkhia. Otyo, otyilekeso tyokuti makukala omauvela omanyingi aipaa. Iya Ondyembo imukwai, otyo ipola omienyo vio vanthu!—Apocalipse 6:1-8.

“Onthiki yotete natanga konthele ya vana vavelama kononkhambe ononkhuana natilile unene owoma. Andyilitehelela okuti Onthiki Yekoyeso ili unene popepi iya mokonda ankho hafuilepo ankho himahupiswa.”—Crystal

“Tyanthyuvisile unene etyi natanga konthele ya vana vavelema kononkhambe mbuna ovivala vielikalaila. Mahi pahe etyi nelilongesa oityi emonekelo olio lihangununa andyityinoñgonoka umwe nawa.”—Ed

Okuti nove welitehelela nga Crystal, onthiki yotete watanga konthele ya vana vavelama konokhambe ononkhuana vapopiwa momukanda wa Apocalipse? Ine welitehelela nga Ed? Etyi ovalume vekuana vavelama kononkhambe vaendela, otyipuka tyimwe tyiiwe nawa momukanda wa Apocalipse, omukanda wahulililako Mombimbiliya. Ankho utyiale okuti inkha unoñgonoka nawa emonekelo olio mopoloko ouwa? Ñgeni ngotyo? Huku walaa okuti ove upondola okuvasa ehambu inkha utanga, nokunoñgonoka etyi utanga, nokuendela movipuka viahonekwa momukanda ou womaulo.—Apocalipse 1:1-3.

Namphila ovanthu vamwe vatila owoma tyina vatanga emonekelo konthele yovalume vekuana vavelama kononkhambe, mahi hatyoko walingilua. Tyotyili, ovanthu ovanyingi-nyingi vetyimona okuti emonekelo olio lievepameka, alo umwe lievekalesa nekevelelo liotyotyili. Emonekelo olio nove lipondola okukupameka! Mbambavo tualako nokutanga.