OSAPI YOKONDYE | OITYI OMBIMBILIYA IPOPIA KONTHELE YONOANDYU?
Onoandyu Mbukahi Ñgeni?
Okuti ove uhanda okunoñgonoka otyili konthele yo noandyu, ñgeni mbukahi, opi mbatuka-pi iya oityi mbulinga? Kutupu vali oku tupondola okuvasa omakumbululo aviuka tyihe Mombimbiliya Ondaka ya Huku. (2 Timóteo 3:16) Oityi Ombimbiliya itupopila konthele yonoandyu?
Ngetyi Huku ospilitu iya katupondola okumumona, no noandyu mbukahi nga Huku katupondola okumbumona mokonda “mbutupu ohitu nomankhipa.” Tyotyili onoandyu oko mbukahi, mbukala keulu iya mbuhongolelwa na Huku keulu.—Lucas 24:39; Mateus 18:10; João 4:24.
Kohale onoandyu ankho mbumonekela ovanthu. Opo mbufuisepo ovilinga mbapewa na Huku, ankho mbulipilulula amalutu ambo, tyina mbuya pano pohi.—Juízes 6:11-23; 13:15-20.
Namphila Ombimbiliya ipopia konthele yonoandyu ngatyina ovalume, iya tyina mbupopiwa konthele yokupiluluka tupu ongatyina ovalume, kutupu etyi tyilekesa okuti onoandyu ovalume ine ovakai. Onoandyu kambunepe tupu kambulityiti. Tupu onoandyu, kambukahi ngo vanthu vatyitua, avakala ononkhupula konyima avakulupa. Onoandyu mbatungwa na Jeova. Ombimbiliya imbuihana okuti: “Ovana va Huku yotyotyili.”—Jó 1:6; Salmo 148:2, 5.
Ombimbiliya ipopia okuti, kuna “omalaka ovanthu no onoandyu.” Tyilekesa okuti onoandyu mbuna omalaka iya tupu mbupopia. Namphila Huku atuma onoandyu opo mbupopie novanthu, mahi ketavela tufende nokulikuambela ko noandyu.—1 Coríntios 13:1; Apocalipse 22:8, 9.
Onoandyu ononyingi-nyingi, ovikundyi novikundyi (ono miriades).a—Daniel 7:10; Apocalipse 5:11.
Onoandyu mbuna “epondolo enene.” Onoandyu mbuna vali epondolo tyipona ovanthu, tupu mbuna vali ounongo tyipona ovanthu. Onoandyu mbupondola okuenda ovikambo ovile, alo umwe mbupondola okulamba apa paoyela eheke.—Salmo 103:20; Daniel 9:20-23.
Namphila onoandyu mbuna epondolo enene, mahi mbuna apa mbaoyela, tupu pena ovipuka mbehei.—Mateus 24:36; 1 Pedro 1:12.
Onoandyu mbatungwa nontheto, novituwa vielifwa no via Huku, nepondolo liokulinga etyi mbuhanda. Ngetyi ovanthu vekahi, no noandyu mbupondola okukoya okulinga otyiwa ine otyivi. Mokonda yotyo, onoandyu mbumwe mbaholovona okutyitukilapo Huku.—Judas 6.
a Omiriade ike onomili 10. Iya ono miriade onombali mbukatuuka onomiliau 100. Ngotyo Apocalipse ipopia ‘onomiriade no nomiriade’ mbo noandyu. Otyo tyilekesa okuti kuna onoandyu ononyingi-nyingi ovityita novityita.