Ove Upondola Okukakala-ko Apeho Pano Pohi

OLIO EKEVELELO LIMWE EWA UNENE! Omutungi wetu walaa okutuavela omuenyo wa apeho, pano pohi. Mahi ovanyingi kavetavela okuti otyo otyili mokonda yovitateka. ‘Vamwe vapopia okuti nthiki imwe ovanthu aveho mavankhi, mokonda ononkhia mbulinga onthele yomuenyo wetu.’ Nkhele vamwe vetavela okuti tyitavela okukala-ko apeho, mahi ha-popano pohi. Vapopia okuti tyitavela okukala-ko apeho tyina tuamankhi atuende keulu. Oityi ove usoka?

Tyina nkhele uhenekumbulule, lilongesa omakumbululo omapulo aa etatu Mombimbiliya: Oityi umona kovanthu tyilekesa okuti ovanthu ankho vatungwa opo vakale-ko apeho? Oityi Huku ankho ahanda etyi atunga ovanthu nohi? Omokonda yatyi ovanthu vankhila?

VATUNGWA MONKHALELO YELIKALELA

Kovipuka aviho vina omuenyo Huku atunga pano pohi, ovanthu ovo vatungwa monkhalelo yelikalela. Ñgeni ngotyo? Ombimbiliya ipopia okuti ovanthu ovo vala vatungwa “otyifuika” tya Huku. (Gênesis 1:26, 27) Otyo tyihangununa-tyi? Tyihangununa okuti, ovanthu vatungwa monkhalelo Huku ekahi, vatungwa opo vakale novituwa ngo via Huku, ngetyi ohole iya nouviuki.

Ovanthu tupu vatungwa nepondolo liokusoka no kusokolola. Ovanthu vapondola okutala ounene wouye, nonkhalelo ovipuka vikahi-mo viatungwa, nokutehelela oviimbo, nokulomba, novipuka ovikuavo. Tupu tupondola okukala omapanga Omutungi wetu. Onkhalelo ovanthu vatungwa ilekesa okuti povipuka aviho Huku atunga pano pohi, ovanthu ovo vatungwa monkhalelo yelikalela unene.

Nkhele soka: Okuti ankho Huku wetutunga opo tukale-ko vala omanima ehehi? Okuti ankho tyesukisa etutunge novituwa ngo viae, nepondolo liokulinga ovipuka? Otyili otyetyi: Huku wetutunga novituwa ngo viae iya nounongo opo tukale nehambu iya atukala-ko apeho pano pohi.

ETYI MUENE HUKU AHANDELE

Ovanthu vamwe vapopia okuti, Huku nalumwe ahandele ovanthu vakale-ko apeho kombanda yohi. Vapopia okuti ohi yatungwa vala opo ikale-ko omuvo uhehi ngamo ovanthu vatalelwa inkha pena ovanthu vapondola okuenda keulu vakakale na Huku. Mahi otyipuka otyo hatyili-ko. Mokonda inkha otyili, opo naina Huku oe utumonesa ononkhumbi tuhole okukala nambo. Iya ngwe otyipuka otyo katyelikuatele novituwa via Huku. Ombimbiliya ipopia konthele ya Huku okuti: “Onondyila mbae ambuho ouviuki. Huku yotyotyili uhena natyike tyahaviukile. Omuviuki, tupu omukuatyili.” — Deuteronômio 32:4.

Ombimbiliya ipopia nawa-nawa etyi Huku ahandela ohi ino okuti: “Eulu o lya Jeova, mahi, oohi weiyavela ovana vovanthu.” (Salmo 115:16) Huku watunga ohi opo ikale eumbo lietu likahi nawa. Wapaka-mo atyiho tyesukisa opo tukale nomuenyo una ehambu. — Gênesis 2:8, 9.

“Eulu o lya Jeova, mahi, ohi weiyavela ovana vovanthu.” — Salmo 115:16

Ombimbiliya tupu ipopia nawa-nawa etyi Huku etutungila. Waavelele otyilinga tate yetu wotete okuti, “yulisei ohi aiho, iya amuitumina . . . novipuka aviho viokuna omuenyo vienda-enda kombanda yohi, vituminei.” (Gênesis 1:28) Nkhele soka kehambu ñgeno vakalele nalio, inkha vetavelele ku Huku avaviukisa ohi ikale Omphangu Yombembwa! Ñgeno Andau na Eva iya novana vavo vakala nomuenyo wa apeho pano pohi, hakeulu-ko.

OITYI TUNKHILA?

Tunkhia mokonda yatyi? Ombimbiliya ilekesa okuti omona umwe wa Huku wihanua okuti Satanasi Eliapu, liatyitukila-po Huku motyikunino tyo Endene. Ñgeni ngotyo?

Satanasi wahindila ovo tate yetu vo tete, Andau na Eva, okulihonyeka koumphuki wae opo vatyitukilepo Huku. Satanasi wapopia okuti Huku ukahi nokutyilika Andau na Eva ovipuka oviwa, mokonda ankho vapondola okuholovona otyiwa ine otyivi. Ngwe avahulu ku Satanasi avehetavela Huku. Otyo atyieta-tyi? Mokueenda kuomuvo Andau na Eva avankhi ngetyi ankho Huku evelondolele. Ngotyo, avapumbwa elao liokukala-ko apeho tyihankhi Momphangu Yombembwa pano pohi. — Gênesis 2:17; 3:1-6; 5:5.

Etyi Andau na Eva valinga, tyaetela ovitateka ovanthu vatyo aveho alo vomononthiki mbetu. Ondaka ya Huku yati: “Mokonda yomunthu wike vala [Andau] onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho.” (Rom. 5:12) Onthue tunkhia mokonda tuapiñgana onkhali kovo tate yetu votete, hakuti ononkhia mbulinga onthele ‘yehando’ lya Huku.

UPONDOLA OKUKAKALA-KO APEHO PANO POHI

Oumphuki wo motyikunino tyo Endene kawatyatyilikile etyi ankho Huku ahandela ohi novanthu. Ohole onene ya Huku nouviuki wae, viemulunda okuovola onkhalelo imwe opo etuyovole kononkhali no kononkhia. Apostolu Paulu wahangununa okuti: “Ofeto yonkhali ononkhia, mahi otyali tuapewa na Huku omuenyo uhapu, menyina lya Kristu Jesus Tatekulu yetu.” (Romanos 6:23) Mokonda Huku uhole ovanthu “waava Omona wae wongunga [Jesus Kristu], opo kese omunthu ukala nekolelo mwe ahakanyimueko, mahi akala nomuenyo uhapu.” (João 3:16) Mokonda Jesus nae una oluembia nonthue, tyihakuluminyinwe, muene weliava ngotyilikutila opo ovanthu vakale netyi Andau avombesa.a

Apa katutu Huku makafuisapo omulao wae wokupilulula ohi opo ikale omphangu yombembwa. Opo nove upoleko ouwa, tavela nomutima wove auho onondaka mba Jesus mbati: “Nyingililei mombundi yahita. Mokonda onthanda nokuahandyuka etapalo lituala kehanyauno, iya ovanyingi omo vekahi nokunyingilila. Mahi, ombundi onthutu nondyila yahita ituala komuenyo, iya kavehi vekahi nokuivasa.” (Mateus 7:13, 14) Omuenyo wove komutwe-wandyila, utei kuetyi ove muene moholovona. Oityi ove molingi?