Oñgeni Upondola Okuyakulila Omutima Wove?

1-3. (a) Siovaa ankho uhole Salomau mokonda yatyi iya oñgeni emuyambele? (b) Omapulo patyi matukumbulula monthele ei?

SALOMAU wakala ohamba yo Isilayeli etyi ankho omukuendye. Etyi ahimbika okutumina, Siovaa emupopila okuti: “Ita etyi uhanda, mankhuavele-tyo.” Salomau akumbulula okuti: “Ame nkhele ndyimona iya hityivili okulinga nawa ovipuka. . . . Avela omuumbili wove omutima omutaveli opo etyivile okukoyesa ovanthu vove.” (1 Reis 3:5-10) Salomau walekesa okuti wapola pokati etyi aita “omutima omutaveli.” Otyo tyitukuatesako okunoñgonoka omokonda yatyi Siovaa ankho ehole unene Salomau! (2 Sam. 12:24) Mokonda Huku wahambukilwe unene nekumbululo lya Salomau, emuavela “omutima omunongo, nenoñgonoko.” — 1 Reis 3:12.

² Etyi Salomau ankho omukuatyili, Siovaa wemuyambele unene. Salomau waholovonenue opo atunge ondyuo inkhimaneka enyina lya Siovaa, Huku yo Isilayeli. (1 Reis 8:20) Salomau ankhimana unene mokonda younongo Huku emuavelele. Tupu, Huku emukuatesako okuhoneka omikanda vitatu vyo Mbimbiliya. Umwe puvio o Provérbios.

³ Momukanda wa Provérbios, ondaka omutima yapopiwa ovikando vihungi po 100. Mongeleka, Provérbios 4:23 yati: “Kovipuka aviho wesukisa okuyunga, yunga vali nawa omutima wove.” Mo versikulu ei, ondaka “omutima” ihangununa-tyi? Matukumbulula epulo olio monthele ei. Tupu matulilongesa omapulo evali: Oñgeni Satanasi aovola okunyona omutima wetu? Oityi tuna okulinga opo tuyakulile omutima wetu? Opo tutualeko okukala ovakuatyili ku Huku, tuna okunoñgonoka omakumbululo omapulo oo.

“OMUTIMA WOVE” OITYI?

4-5. (a) Oñgeni o Salmo 51:6 itukuatesako okunoñgonoka etyi tyihangununa ondaka “omutima”? (b) Oñgeni ekongoko lietu, litukuatesako okunoñgonoka omokonda yatyi tuesukisila okuyunga nawa omutima wetu?

⁴ Mu Provérbios 4:23, ondaka “omutima” ipopia etyi tyikahi “mokati komunthu.” (Tanga Salmo 51:6 nokatoi.) Ondaka oyo ihangununa omalusoke, nonkhalelo tulitehelela, nomokonda yatyi tulingila ovipuka iya nomahando etu. Omutima onkhalelo tuatuwa mokati, hatyetyi vakuetu vamona kondye.

⁵ Tala oñgeni ekongoko lietu lilekesa omokonda yatyi tyakolela okuyunga etyi tyikahi momutima. Tete, opo tutualeko nekongoko ewa, tuna okuholovona nawa etyi matuli, nokuhataika apeho. Tupu, opo tutualeko noupanga wapama na Huku, apeho tuna okutanga Ombimbiliya, nomikanda vietu, nokulekesa apeho okuti tuna ekolelo mu Siovaa. Matulekesa okuti tuna ekolelo tyina tuendela muetyi tulilongesa, nokupopila vakuetu etyi tuanoñgonoka. (Loma 10:8-10; Tia. 2:26) Vali, tupondola okulitala iya atusoko okuti tuna ekongoko, mahi naina mokati tuna ouvela. Tyelifwa notyo, tupondola okutala kovipuka tulinga movilinga vya Huku atusoko okuti tuna ekolelo liapama, mahi naina omahando omavi ekahi nokukulila momutima wetu. (1 Kol. 10:12; Tia. 1:14, 15) Tuna okuhinangela okuti Satanasi uhanda okutunyona nomalusoke ae. Oñgeni aovola okutyilinga? Iya oñgeni tupondola okuliyakulila?

OÑGENI SATANASI AOVOLA OKUNYONA OMUTIMA WETU?

6. Oityi Satanasi ahanda okulinga iya oñgeni aovola okutyilinga?

⁶ Satanasi uhanda tukale ngae. Uhanda tuhetavele ovitumino vya Siovaa iya atusoko vala kuonthue. Satanasi ketyivili okutukuluminya okusoka, nokulinga ovipuka ngae. Ngotyo, wovola ononkhalelo onkhuavo opo etuyondye. Mongeleka, tukahi pokati kovanthu vasoka ngae. (1 Suau 5:19) Satanasi uhanda tukale omapanga ovanthu ovo namphila tutyii nawa okuti omapanga omavi anyona onkhalelo yetu yokusoka, nokutuhongiliya okulinga ovipuka ovivi. (1 Kol. 15:33) Otyo tyaendele Nohamba Salomau. Wanepele ovakai ovanyingi vahafende Siovaa iya katutu-katutu avahimbika “okuyapula omutima wae” ku Siovaa. — 1 Reis 11:3.

7. Oityi vali Satanasi aundapesa opo anyone omalusoke etu iya omokonda yatyi tuna okulungukila?

⁷ Satanasi uundapesa onosinema opo ayandyanese onkhalelo yae yokusoka. Utyii nawa okuti omahipululo alekeswa-mo kaetutalula vala. Omahipululo oo etulongesa onkhalelo yokusoka, netyi tuna okulinga. Jesus waundapesile omahipululo pokulongesa. Mongeleka, wapopile ehipululo liomulume omu Samaliya, no liomona omupeseli. (Mat. 13:34; Luka 10:29-37; 15:11-32) Mahi ovanthu vokusoka nga Satanasi vapondola okuundapesa omahipululo opo vanyone onkhalelo yetu yokusoka. Tuna okupola pokati, mokonda onosinema mbumwe mbututalula, nokutulongesa ovipuka viakolela. Mahi tupu tuna okulunguka. Tyina tuholovona ovitalukiso tuna okulipula okuti: ‘Okuti osinema ei ikahi nokundongesa okuti tyaviuka okulinga omahando olutu?’ (Gal. 5:19-21; Efe. 2:1-3) Oityi una okulinga inkha wiimbuka okuti osinema imwe ikahi nokuyandyanesa omalusoke a Satanasi? Lityilika-yo ngatyina ukahi nokuliyakulila kouvela ulitambuliswa!

8. Oñgeni ovohe vapondola okukuatesako ovana vavo okuyakulila omitima viavo?

⁸ Vohe, onwe muna otyilinga tyokuyakulila omitima viovana venyi komalusoke a Satanasi. Onthue tutyii okuti mulinga atyiho muvila opo muyakulile ovana venyi komauvela. Apeho mukomba eumbo lienyi iya muyumbahi ovipuka vipondola okuetela ombunga yenyi ouvela. Tyelifwa notyo, muna okuyakulila ovana venyi ko nosinema, nomawela apakwa mono telefone iya novipuka vimwe mo internet viyandyanesa omalusoke a Satanasi. Siovaa wemuavela otyilinga tyokukuatesako ovana venyi opo vakale omapanga ae. (Pro. 1:8; Efe. 6:1, 4) Muhakalei nowoma wokuundapesa ovitumino vyo Mbimbiliya opo mupopile ovana venyi etyi vena okulinga netyi vahapondola okulinga. Popilei ovana venyi etyi vapondola okutala mo televisau netyi vahapondola okutala iya amuvehangununina omokonda yatyi muatokolela ngotyo. (Mat. 5:37) Putyina ovana vatualako okukula, vekuatesako okuundapesa ovitumino vyo Mbimbiliya opo vapunge otyiwa notyivi. (Heb. 5:14) Tupu hinangela okuti ovana kavelilongesila vala kovipuka upopia, mahi haunene velilongesila kuevi ulinga. — Deut. 6:6, 7; Loma 2:21.

9. Olupi olusoke lumwe Satanasi ayandyanesa iya omokonda yatyi tuna okulungukila?

⁹ Tupu, Satanasi wovola okunyona omutima wetu mokutuhindila okuyumba vali onthumbi mounongo wovanthu tyipona mounongo wa Siovaa. (Kolo. 2:8) Satanasi uyandyanesa olusoke luokuti otyipuka tyakolela vali momuenyo, okukala omuhona. Ovanthu vasoka ngotyo pamwe vakala umwe ovahona, mahi pamwe otyo katyimoneka-po, mahi no ngotyo vekahi motyiponga. Mokonda yatyi? Omokonda vapondola okupaka ekongoko liavo, nombunga, noupanga wavo na Huku motyiponga opo vakale ovahona. (1 Tim. 6:10) Onthue tupandula unene Tate yetu wo keulu utukuatesako okutala onombongo monkhalelo yapola pokati. — Ecl. 7:12; Luka 12:15.

OÑGENI TUPONDOLA OKUYAKULILA OMUTIMA WETU?

10-11. (a) Oityi tuna okulinga opo tuyakulile omutima wetu? (b) Kohale, omulavi ankho una otyilinga patyi iya oñgeni omutima wetu upondola okuelekwa nomulavi?

¹⁰ Inkha tuhanda okuyakulila nawa omutima wetu, tuna okuimbuka oviponga iya liwa-liwa atulityilika-vyo. Mu Provérbios 4:23, ondaka ‘okuyunga’ ituhinangelesa otyilinga tyovalavi. Pomuvo Wohamba Salomau, ovalavi ankho vakala keulu liovimato viepunda-umbo iya tyina vamona otyiponga avalondola vakuavo. Otyilinga tyovalavi tyitukuatesako okunoñgonoka etyi tuna okulinga opo tuhayeke Satanasi anyone omutima wetu.

¹¹ Kohale, ovalavi ankho vaundapela kumwe novayungi vo nombundi. (2 Sam. 18:24-26) Okuundapa ngotyo, ankho tyivekuatesako okuyakulila epunda-umbo mokonda vaika liwa-liwa onombundi tyina kuameya onondyale. (Nee. 7:1-3) Omutima walongesua no Mbimbiliyab upondola okuundapa ngomulavi mokutulondola tyina Satanasi aovola okunyona onkhalelo yetu yokusoka, nonkhalelo tutala ovipuka, nomahando etu. Apeho tyina omutima wetu utulondola konthele yotyiponga tyimwe, tuna okutavela liwa-liwa ngatyina tuaika omavai.

12-13. Oityi tuhongiliyua okulinga, mahi oñgeni tupondola okuliyakulila?

¹² Tala oñgeni tupondola okuliyakulila komalusoke a Satanasi. Siovaa utupopila okuti “ouhayo wotyihola novipuka aviho viasila ine elungavi, [kavipondola] okupopiwa pokati [ketu].” (Efe. 5:3) Mahi oityi matulingi inkha kovilinga ine okosikola vahimbika okutomphola konthele youndalelapo? Onthue tutyii okuti tuna “okuanya ovipuka aviho vielikalela netyi Huku ahanda, nomahando omouye.” (Titu 2:12) Omulavi wetu, ine omutima, una okutulondola. (Loma 2:15) Mahi oñgeni matuutehelela? Hamwe matuhande okutehelela etyi vapopia ine okutala omalutalatu vekahi nokulituma. Mahi oo omuvo wokuika omavai, mokupilulula etompho ine okutundapo.

¹³ Tupewa ondundo opo tutualeko okuliyakulila komalusoke okulinga etyi tyapenga. Mahi tuna onthumbi yokuti Siovaa weete ononkhono tukahi nokulinga iya metuavela ononkhono nounongo tuesukisa opo tuanye omalusoke a Satanasi. (2 Crô. 16:9; Isa. 40:29; Tia. 1:5) Namphila Huku etukuatesako, oñgeni onthue tupondola okutualako okuyakulila omutima wetu?

LUNGUKA

14-15. (a) Tuna okuikula omutima wetu opo munyingile-tyi, iya oñgeni tupondola okutyilinga? (b) Tyina tutanga Ombimbiliya, oñgeni Provérbios 4:20-22 itukuatesako okupolako ouwa? (Tala okakasa kati: “Oñgeni Mosokolola?.”)

¹⁴ Opo tuyakulile omutima wetu, onthue katusukisa vala okuwika opo muhanyingile omalusoke omavi, mahi tupu tuna okuwikula opo munyingile omalusoke omawa. Soka kongeleka yovanthu vokuyunga ponombundi mbepunda-umbo. Ovayungi ankho vaika omapito opo onondyale mbahanyingile-mo, mahi tupu ankho vaikula omapito opo mepunda-umbo muetwe okulia novipuka ovikuavo viesukisa. Inkha omapito atualako tyaikwa, vokuli mepunda-umbo vapondola okunkhia nondyala. Tyelifwa notyo, nonthue apeho tuna okuikula omutima wetu opo munyingile omalusoke a Huku.

¹⁵ Mokonda Ombimbiliya ondaka ya Siovaa, apeho tyina tuitanga, tukahi nokuyeka omalusoke ae ahongolele onkhalelo yetu yokusoka, novipuka tulinga. Mahi oñgeni tupondola okupolako ouwa tyina tutanga Ombimbiliya? Tyimwe okulikuambela. Omphange umwe wati: “Tyina ndyitanga Ombimbiliya, tete ndyilikuambela ku Siovaa opo ankhuateseko ‘okutala ovipuka vihuvisa’ vikahi Mondaka yae.” (Sal. 119:18) Tupu tuesukisa okusokolola ku etyi tuatanga. Tyina tulikuambela, atutange iya atusokolola, Ondaka ya Huku “ihika komutima wetu.” Okulinga ngotyo, matukala nohole nomalusoke a Siovaa. — Tanga Provérbios 4:20-22; Sal. 119:97.

16. Oñgeni ovanyingi vehole okupola ouwa mokutala ono vidiu mbo Broadcasting?

¹⁶ Onkhalelo onkhuavo yokuyeka omalusoke a Huku etuhongolele, okutala ono vidiu mbukahi mo JW Broadcasting^®. Ovakuatate vamwe ovalinepi vati: “Siovaa uhole okukumbulula omalikuambelo etu no Broadcasting ya kese hanyi. Ono vidiu ombo mbutupameka unene tyina tuasoya. Iya apeho mondyuo yetu tuhikisa oviimbo vyo Broadcasting. Tuvihikisa tyina tuteleka, na tyina tukomba iya na tyina tunwa osaa.” Onovidiu ombo mbutukuatesako okuyakulila omutima wetu. Tupu mbutukuatesako okusoka monkhalelo Siovaa asoka nokuanya omalusoke a Satanasi.

17-18. (a) Ngetyi tyipopia 1 Reis 8:61, oityi tyimoneka-po tyina tuendela muetyi Siovaa etulongesa? (b) Oityi tulilongesila kongeleka Yohamba Ezekia? (c) Ngetyi o Salmo 139:23, 24 ipopia, oityi tupondola okuita tyina tulikuambela?

¹⁷ Apeho tyina tuimbuka ouwa utundilila kokulinga etyi tyaviuka, ekolelo lietu lipama vali. (Tia. 1:2, 3) Tulitehelela nawa mokonda Siovaa wahambukwa nonthue iya ututala okuti tuvana vae. Tupu ehando lietu liokumuhambukiswa liliyawisa. (Pro. 27:11) Apeho tyina tulolwa, omphitilo yokulekesa ku Siovaa okuti tumuumbila nomutima wetu auho. (Sal. 119:113) Onthue tulekesa ku Siovaa okuti tumuhole iya tuatokola okutavela ovitumino viae, nokulinga ehando liae. — Tanga 1 Reis 8:61.

¹⁸ Otyo tyilekesa okuti kamatupengesa vali? Au, mokonda nkhele tuvakuankhali. Inkha tupengesa, tuhinangelei ongeleka Yohamba Ezekia. Nae walingile oviponyo. Mahi welivelele iya atualako okuumbila Siovaa “nomutima auho.” (Isa. 38:3-6; 2 Crô. 29:1, 2; 32:25, 26) Ngotyo, tuhayekei Satanasi etunyone nomalusoke ae. Tulikuambelei opo tukale “nomutima omutaveli.” (1 Reis 3:9; tanga Salmo 139:23, 24.) Onthue matutualako okukala ovakuatyili ku Siovaa inkha tulinga otyipuka tyakolela unene: okuyunga omutima wetu.