Tualako Noukuatyili ‘Mononkhumbi Ononene’

1-2. (a) Oityi ovatumini mavapopi apa katutu? (b) Omapulo patyi esukisa okukumbululwa?

SOKA ñgeno ovatumini vapopia-ale okuti “tuna ombembwa, tukahi metuliyo.” Hamwe mavelimphande okuti pahe vavasa ombembwa yotyotyili. Ovatumini mavahande onthue tutavele okuti pahe ouye ukahi nawa. Mahi otyipuka matyimoneka-po, matyilekesa nawa okuti naina ouye kaukahi nawa. Ñgeni ngotyo? Eulo limwe lyo Mbimbiliya, lipopia okuti “mavauhululwa nehanyauno, . . . iya kamavakamona onkhalelo naike yokuhupa.” — 1 Tes. 5:3.

² Pena omapulo amwe akolela esukisa okukumbululwa: Ovipuka patyi maviendepo mokueenda kuononkhumbi ononene? Oityi Siovaa ahanda tulinge mokueenda kuononkhumbi ononene? Iya oñgeni tupondola okulifuiika pahetyino opo tukoleleye mononkhumbi ononene? — Mat. 24:21.

OITYI MATYIKAMONEKA ‘MONONKHUMBI ONONENE’?

3. Ngetyi tyipopia Eholololo 17:5, 15-18, oñgeni Huku makahanyako “Ombambilonia Onene”?

³ Tanga Eholololo 17:5, 15-18. “Ombambilonia Onene” maihanyuako! Ngetyi tuapopia-le konyima ovatumini kamavetyivili okutyilika ovipuka mavimoneka-po mokueenda kuononkhumbi ononene. Omokonda yatyi? Omokonda “Huku [makapaka] momitima viavo ehando liokufuisapo olusoke lwae.” Olusoke patyi? Olusoke luokuhanya-ko onongeleya ambuho mbomatutu, okukutikinyamo mbuna mbuliti Ovakilisitau ine mbulandula Sesusi. Huku makapaka olusoke lwae momutima ‘wonombinga ekwi’ ‘mbenyama enkhuhu.’ “Onombinga ekwi” mbulekesa ovatumini aveho vakuatesako “enyama enkhuhu.” Iya “enyama enkhuhu” lilekesa eongano limwe litiwa Nações Unidas (Omalongo Aongana). (Ehol. 17:3, 11-13; 18:8) Tyina ovatumini vamautukila onongeleya mbomatutu, opo ononkhumbi ononene mbahimbika. Ehanyauno lionongeleya mbomatutu malikahangayalesa ovanthu aveho.

4. (a) Hamwe oityi matyilundu ovatumini okuutukila onongeleya mbomatutu? (b) Oñgeni hamwe ovanthu vo nongeleya mavekelitehelela iya oityi hamwe mavapopi?

⁴ Onthue katutyii oityi matyilundu ovatumini okuutukila “Ombambilonia Onene.” Hamwe mavakapopia okuti onongeleya mbunyona ombembwa iya mbutyihole tyokuhongiliya ovatumini tyina valinga omatokolo. Ine hamwe mavakapopia okuti onongeleya mbuna onombongo ononyingi novipuka ovinyingi. (Ehol. 18:3, 7) Mahi otyo katyilekesa okuti ovatumini mavakaipaa ovanthu aveho veli monongeleya mbomatutu. Tyafuile ovatumini mavakahanya-ko vala onongeleya mbatyo ambuho. Oñgeni ovanthu vo monongeleya ombo mavakakala? Mavekelitehelela okuti ononkhalamutwe mbavo kavafuisile-po etyi valaa. Tupu hamwe mavakapopia okuti: ‘Ame nalumwe nali wongeleya ei.’

5. Oityi Siovaa alaa konthele yononkhumbi ononene, iya omokonda yatyi?

⁵ Ombimbiliya kaipopi nawa-nawa omuvo ulifuepi Ombambilonia Onene maihanyuako. Mahi tutyii okuti kamatyisete. (Ehol. 18:10, 21) Siovaa walaa okuti ‘makatepulula ononthiki mbatyo ombo’ opo ahupise “vana vaholovonwa”, nongeleya yotyotyili. (Malu. 13:19, 20) Mahi oityi Siovaa ahanda tulinge mokueenda kuononkhumbi ononene alo po Alumagedom?

TUALAKO OKUUMBILA SIOVAA

6. Tyihe-kulityilika vala onongeleya mbomatutu, oityi vali tuesukisa okulinga?

⁶ Ngetyi tuelilongesa monthele yokualamba, Siovaa uhanda ovaumbili vae velityilike onongeleya mbomatutu mononkhalelo ambuho. Mahi okulinga vala ngotyo katyituuka. Tupu tuna okutokola okukuatesako efendelo liotyotyili, ine okutualako okuumbila Siovaa. Tala ononkhalelo onombali mbokutyilinga.

7. (a) Oityi matyitukuatesako okutualako okukakatela movitumino vya Siovaa? (b) Omokonda yatyi Ova Hebeleu 10:24, 25, ipopila okuti tuesukisa okuliongiya? Iya omokonda yatyi tyakolela okutyilinga pahetyino?

⁷ Tete, tuesukisa okukakatela movitumino vya Siovaa. Onthue katupondola okutavela ovipuka ovivi ovanthu valinga. Mongeleka, onthue katutavela ovipuka aviho vielikuata novinepo viasila, ngetyi ovalume ine ovahikuena valala poyavo novipuka ovikuavo ovanthu ovo valinga. (Mat. 19:4, 5; Loma 1:26, 27) Vali, tuesukisa okutualako okufenda Siovaa kumwe novakuatate vetu. Onthue tuliongiya novakuatate vetu kese apa petavela. Mongeleka, tulingila omaliongiyo Monondyuo mbo Maliongiyo, no momaumbo ovakuatate vetu. Alo umwe pamwe tuliongiya monkhalelo ovanthu vehetyiimbuka. Ngatukala-kala novitateka, katupondola okuyekapo okuenda komaliongiyo. Ou, omuvo wokuenda apeho komaliongiyo, “haunene tyina [tutala] okuti onthiki ikahi popepi.” — Tanga Ova Hebeleu 10:24, 25.

8. Okuti onondaka tuivisa mambukapiluluka mononkhumbi ononene? Hangununa.

⁸ Mokueenda kuononkhumbi ononene, onondaka tuivisa mambukapiluluka. Pahetyino, onthue tukahi nokuivisa onondaka onongwa Mbouhamba, nokulinga ononkhono mbokulinga ovalongwa. Mahi mononkhumbi ononene, onthue matukaivisa onondaka mbukahi ngomamanya omanene ongandavila. (Ehol. 16:21) Hamwe matukaivisa okuti kuakambela vala katutu opo ouye wa Satanasi uhanyue-ko. Mokueenda kuomuvo, matunoñgonoka etyi matupopi no ñgeni matukaivisa. Okuti matukaivisa ngetyi tulinga pahetyino? Ine matukaivisa monkhalelo onkhuavo? Nkhele katutyii. Twii vala okuti matukakala nelao liokuivisa onondaka mbekoyeso mba Siovaa nomutima wakola! — Eze. 2:3-5.

9. Oñgeni onondaka matukaivisa mambukakalesa ovanthu iya onthumbi patyi tupondola okukala nayo?

⁹ Tyafuile onondaka matukaivisa, mambulundu ovanthu okuhanda okututalameka opo tuhaivise-ivise vali. Onthue hono tuna onthumbi yokuti Siovaa utukuatesako movilinga viokuivisa. Tupu mononkhumbi ononene matusukisa okutualako nonthumbi oyo mu Siovaa. Iya tupondola okukala nonthumbi yokuti Siovaa metuavela ononkhono tuesukisa opo tufuisepo ehando liae. — Miq. 3:8.

LIFUIIKA OPO UKOLELEYE TYINA OVAUMBILI VA HUKU VAMAUTUKILWA

10. Ngetyi tyipopia Luka 21:25-28, oñgeni ovanthu ovanyingi mavakakala mokueenda kuononkhumbi ononene?

¹⁰ Tanga Luka 21:25-28. Mokueenda kuononkhumbi ononene, ovanthu matyikeveihama unene okutala okuti ovipuka aviho ankho vayumba onthumbi vikahi nokuhanyuako. Mavakakala tyehulilwa iya mavakavela owoma. Mokonda yatyi? Omokonda mavakamona ovipuka vihenemoke mouye tunde kohale. (Sof. 1:14, 15) Pomuvo opo, omuenyo maukepuiya unene, alo umwe kovaumbili va Siovaa. Iya mokonda katulingi onthele youye, hamwe matukalingwa onya. Tupu hamwe kamatukamona ovipuka vimwe tuesukisa opo tulitekule.

11. (a) Omokonda yatyi ovanthu mavakapopia unene konthele Yonombangi mba Siovaa? (b) Katuesukisile okutila owoma ononkhumbi ononene mokonda yatyi?

¹¹ Ovanthu vokuali monongeleya mbokuahanyuako, mavakanumanena Onombangi mba Siovaa mokonda ovo vala vahupapo. Ovanthu mavakapopia unene konthele yetu, alo umwe mo Internete. Satanasi novanthu atumina maveketunumanena unene mokonda onthue vala tuahupa-po. Otyipuka ankho vahanda, okuhanyako onongeleya ambuho kombanda yohi. Mahi nii kamavetyivili. Iya mokonda yotyo, mavaovola onkhalelo yokutuhanyako. Ovanthu vovilongo aviho maveliwaneka avauutukila Onombangi mba Siovaa mouye auho. Otyikundyi otyo, tyihanwa okuti o Goge ya Magoge.b (Eze. 38:2, 14-16) Hamwe tupondola okusukalala tyina tusoka kononkhumbi ononene mokonda katutyii nawa-nawa oñgeni ovipuka maviende. Mahi katuesukisile okutila owoma ononkhumbi ononene. Siovaa meketuavela onondonga mambutuhupisa. (Sal. 34:19) Onthue ‘matukakala lutai, atukatula omitwe vietu,’ mokonda tutyii okuti “eyovo [lietu] likahi popepi.”c

12. Oñgeni “omupika omukuatyili nokualunguka” ekahi nokutufuiika opo tukale ovakuatyili movipuka mavimoneka komutwe wandyila?

¹² “Omupika omukuatyili nokualunguka” ukahi nokutufuiika opo tukale ovakuatyili mokueenda kuononkhumbi ononene. (Mat. 24:45) Uhole okutyilinga mononkhalelo ononyingi, mahi matutale vala onkhalelo ike: ovionge viononthiki ononthatu vyo 2016 alo 2018. Ovionge ovio vietulunda okukala novituwa mavitukuatesako okukala ovakuatyili tyina onthiki ya Siovaa ifuena-ko. Pahe matupitulula ovituwa ovio.

KALA OMUKUATYILI, KOLELEYA, KOLA OMUTIMA

13. Oñgeni tupondola okupameka oukuatyili wetu ku Siovaa? Iya omokonda tuesukisila okutyilinga pahetyino?

¹³ Oukuatyili: Otyonge tyo 2016 ankho tyina osapi yati: “Tualako Noukuatyili ku Siovaa!” Otyonge otyo tyetulongesa okuti inkha tukala noupanga wapama na Siovaa, matukala ovakuatyili kwe. Tupu tuahinangeleswa okuti tupondola okupameka oupanga wetu na Siovaa mokulikuambela nomutima auho, nokulilongesa nawa Ombimbiliya. Okulinga ngotyo, matyitukuatesako okulambela movitateka vimoneka ngatyina onomphunda. Putyina onthyulilo itualako okufuena popepi, tukevelela okuti matuvasi ovitateka vilola oukuatyili wetu ku Huku no Kouhamba wae. Iya ovanthu mavatualako okutulinga omukuele. (2 Pet. 3:3, 4) Matulambela movitateka ovio, haunene mokonda katulipake mopulitika. Tuesukisa okupameka oukuatyili wetu pahetyino opo tutualeko okukala ovakuatyili mokueenda kuononkhumbi ononene.

14. (a) Oityi matyikamoneka novakuatate vahongolela eongano? (b) Omokonda yatyi matusukisila okukala ovakuatyili pomuvo opo?

¹⁴ Mokueenda kuononkhumbi ononene, onkhalelo eongano lihongolelwa maipiluluka. Ovalembulwa aveho veli pano pohi mavatualwa keulu opo navo valwe movilwa vyo Alumagedom. (Mat. 24:31; Ehol. 2:26, 27) Otyo tyilekesa okuti Ononkhalamutwe mbo Nombangi mba Siovaa kamavakakala vali pano pohi. Mahi no ngotyo, ovanthu ovanyingi-nyingi mavatualako tyaongana. Vamwe povakuatate vokulinga onthele yonongi ononkhuavo, mavahongolela eongano. Matulekesa okuti tuvakuatyili ku Siovaa tyina tukuatesako ovakuatate ovo, na tyina tutavela ehongolelo liavo. Tuhinangelei okuti omuenyo wetu utei ku otyo!

15. Oityi matyitukuatesako okukoleleya movitateka? Iya omokonda tuesukisila okutyilinga pahetyino?

¹⁵ Koleleya: Otyonge tyo 2017 ankho tyina osapi yati: “Tualako Okukoleleya!” Otyonge otyo tyetukuatesako okunoñgonoka oñgeni tupondola okukoleleya movitateka. Tyetulongesa okuti okukoleleya katyitei inkha tuna ovitateka ine tutupu ovitateka. Iya matutyivili vala okukoleleya inkha tuyumba onthumbi mu Siovaa. (Loma 12:12) Tuhalimbueiko etyi Sesusi alaa okuti: “Una ukahi nokukoleleya alo konthyulilo, makayovolwa.” (Mat. 24:13; okatoi) Onondaka ombo mbulekesa okuti tuesukisa okutualako okukala ovakuatyili tyina tulambela movitateka. Inkha tukoleleya movitateka pahetyino, matukala nekolelo liapama tyina nkhele ononkhumbi ononene mbuhenehimbike.

16. Oityi tyitukuatesako okukola omutima iya oñgeni tupondola okukolesa omutima wetu pahetyino?

¹⁶ Okukola omutima: Otyonge tyo 2018 ankho tyina osapi yati: “Kola Omutima!” Otyonge otyo tyetuhinangelesa okuti okukola omutima katyitei kounongo, no kononkhono mbetu muene. Tuesukisa okuyumba onthumbi mu Siovaa opo tukoleleye. Tupu otyo tuesukisa okulinga opo tukole omutima. Oityi matyitukuatesako okuyumba vali onthumbi mu Siovaa? Okulilongesa Ondaka yae ononthiki ambuho, nokusokolola kononkhalelo ayovolele ovaumbili vae vo kohale. (Sal. 68:20; 2 Pet. 2:9) Haunene matusukisa okukola omutima nokuyumba onthumbi mu Siovaa, tyina Goge ya Magoge ametuutukila mokueenda kuononkhumbi ononene. (Sal. 112:7, 8; Heb. 13:6) Inkha tuyumba onthumbi mu Siovaa pahetyino, matukala nomutima wakola tyina Goge ametuutukila.d

KEVELELA NEHAMBU OMUVO MOYOVOLWA

17. Omokonda yatyi tuhapondola okutila owoma o Alumagedom? (Tala olutalatu luo kondye.)

¹⁷ Ngetyi tuelilongesa monthele yokualamba, ovanyingi pu onthue tuatyitwa mononthiki mbahulilila. Mahi tupu tukevelela okukahupa kononkhumbi ononene. Ovilwa vyo Alumagedom mavikamanako ouye uno wovivi. Mahi katuesukisile okutila owoma. Mokonda yatyi? Omokonda o Alumagedom ovilwa vya Huku. (Pro. 1:33; Eze. 38:18-20; Zac. 14:3) Siovaa makatuma Sesusi ahongolele onoandyu ononyingi-nyingi novalembulwa movilwa vyo Alumagedom. Aveho mavakalwisa Satanasi novilulu viae, novanthu vahongiliyua navo pano pohi. — Dan. 12:1; Ehol. 6:2; 17:14.

18. (a) Oityi Siovaa apopia? (b) Omokonda yatyi Eholololo 7:9, 13-17 ikukuatesako okukala nonthumbi yovipuka ukevelela komutwe wandyila?

¹⁸ Siovaa wapopia okuti: “Oviti aviho mokatulilwa opo vikuluise, kamavikulingi natyike.” (Isa. 54:17) “Ovanthu ovanyingi-nyingi” vaumbila Siovaa noukuatyili, mavakahupa mononkhumbi ononene iya avatualako okuumbila Siovaa. (Tanga Eholololo 7:9, 13-17.) Tyotyili, Ombimbiliya itukalesa nonthumbi yokuti matukahupa kononkhumbi ononene! Iya tutyii nawa okuti “Siovaa uyakulila ovakuatyili kwe.” (Sal. 31:23) Aveho vehole Siovaa iya vemuhilivika, mavakahambukwa tyina amasukukisa enyina liae likola. — Eze. 38:23.

19. Oityi tukevelela matyimoneka apa katutu?

¹⁹ Soka vala oñgeni ovituwa vivasiwa mu 2 Timotiu 3:2-5 mavikapiluluka mouye omupe tyina Satanasi amayekepo okuhongiliya ovanthu. (Tala okakasa kati: “Onkhalelo Ovanthu Mavakakala.”) Omukuatate George Gangas ankho umwe Pononkhalamutwe mbo Nombangi mba Siovaa, wapopia konthele yotyo okuti: “Ouye maukakala omphangu ikahi nawa mokonda mamukakala vala ovafendi va Siovaa! Apa katutu mokakala mouye omupe. Mokakala nga Siovaa. Matukakala-ko apeho.” Ovipuka tukevelela oviwa unene!