Okuti Ove Utyihinangela?

Okuti utyivila okukumbulula omapulo aa avasiwa Momitala Viomulavi vyo 2019?

Onondaka mba Huku mbati “oviti aviho mokatulilwa pala okukuluisa kamavikulingi natyike,” mbuhangununa-tyi? (Isa. 54:17)

Tupondola okukala nonthumbi yokuti Huku metuyakulila “kepuku-puku” liovakalavi. (Isa. 25:4, 5) Onondyale mbetu nalumwe mavalingi otyipuka tyipondola okutulingisa okuyekapo okuumbila Siovaa. — w19.01, pomafo 6-7.

Oñgeni onkhalelo Huku atekulile ova Kanaa nova Isilayeli ankho valinga ononkhali, ilekesa okuti omuviuki?

Huku ankho ukoyesa vana valinga ovinepo viasila, no vokulinga onya ovakai novana. Mahi ankho uyamba vana vetavela ovitumino viae, nokutekula nawa vakuavo. — w19.02, pomafo 22-23.

Oityi tuesukisa okulinga tyina omunthu umwe uhembangi elikuambela?

Tupondola okutualako tyahiliya, mahi atuhati “amem.” Tupu katupondola okulikuata navo momankhanya tyina velikuambela. Mahi tupondola okulinga elikuambelo lietu momutima. — w19.03, pefo 31.

Oñgeni Huku akala tyina omukulu alala nomona?

Okulala nomona onkhali komona, no kewaneno, no kovatumini, no ku Huku. Movilongo vimwe, muna ovitumino vipopia okuti tyina omunthu amaimbuka okuti umwe walala nomona, una okuketyipopila ovatumini. Ovakulu vewaneno movilongo ovio, vaendela movitumino ovio. — w19.05, pomafo 9-10.

Oñgeni mopilulula onkhalelo watuwa mokati?

Wesukisa okulinga ovipuka evi vitatu: Likuambela ku Siovaa. Sokolola nehando liokutala etyi tyikahi momutima wove. Holovona omapanga omawa. — w19.06, pefo 11.

Oityi tupondola okulinga pahetyino opo tukoleleye tyina tuamahataikiswa?

Tuesukisa okupameka oupanga wetu na Siovaa. Kala nonthumbi yokuti ukuhole iya nalumwe mekuyekepo. Tanga Ombimbiliya ononthiki ambuho, nokulikuambela apeho. Kala nonthumbi yokuti omilao vya Huku mavikafuisuapo pokati Kouhamba wae. Paka momutwe ono testu noviimbo uhole vali. — w19.07, pomafo 2-4.

Oityi tupondola okulinga opo tukuateseko ombunga yetu okunoñgonoka otyili?

Tyakolela unene okukala nokankhenda, novituwa oviwa, nokupwa-elundo, nokupopia navo nonthilo. — w19.08, pomafo 15-17.

Ngetyi tyipopia Mateusi 11:28, oñgeni Sesusi etupepulula?

Tuna ovakulu vewaneno vetuhole, nomapanga omawa, novilinga oviwa. — w19.09, pefo 23.

Oñgeni Huku etuavela ehando nepondolo liokuundapa? (Fili. 2:13)

Tyina tutanga Ombimbiliya atusokolola ku etyi tutanga, Huku upondola okutuavela ehando liokuundapa, nepondolo liokutyilinga. Ononkhono mbae mbupondola okuyawisa kounongo wetu. — w19.10, pefo 21.

Ovipuka patyi wesukisa okulinga tyina uhanda okulinga etokolo?

Wesukisa okulinga ovipuka vitano: Lilongesa konthele yetyi uhanda okutokola. Likuambela okuita ounongo. Tala omokonda yatyi uhandela okulinga etokolo. Panga nawa etyi molingi. Tala ovipuka ngetyi vikahi. — w19.11, pomafo 27-29.

Okuti elongeso liokuti omunthu una ohande ihankhi liehimbika etyi Satanasi apopia na Eva motyikunino tyo Endene?

Tyafuile hatyoko. Satanasi wapopila Eva okuti kamankhi. Katile mamoneka vala ngatyina ankhia. Omalongeso aeho omatutu anyimua-ko Nombila Onene pomuvo wa Noe. Etyi Huku angwangwanesa omalaka pomuvo wokutunga o Mbabele, ovanthu aveliyandyana “mouye auho.” Mokonda yotyo, olusoke luokuti ovanthu vena ohande ihankhi, nalo aluhimbika okuliyandyana. — w19.12, pefo 15.