Otyili Konthele Youhamba wa Huku
Sesusi walongesile ovalongwa vae okulikuambela okuti: “Tate yetu keulu, enyina liove lisukukiswe. Ouhamba wove uye. Ehando liove lilingwe pano pohi, ngetyi likahi nokulingwa keulu.” (Mateusi 6:9, 10) Ouhamba wa Huku oityi? Oityi ukahi nokulinga? Iya omokonda yatyi tuesukisila okulikuambela opo uye?
Sesusi Ohamba Youhamba wa Huku.
Luka 1:31-33: “Iya omuluku okuti o Sesusi. Omona oo, makala omunene, aihanwa okuti Omona Womukulami, iya Siovaa Huku, memupe otyipundi tyoutumini wa tate yae Daviti. Makakala Ohamba mondyuo ya Sakoo apeho, iya Ouhamba wae kamaukapwa.”
Otyipuka tyakolela vali Sesusi ankho aivisa, Ouhamba wa Huku.
Mateusi 9:35: “Sesusi ahimbika okuenda momapunda-umbo no momaumbo aeho, nokulongesa ovanthu monondyuo mbavo mbokufendela, otyo aivisa onondaka onongwa Mbouhamba, nokuhakula omauvela aeho ovanthu.”
Sesusi wapopilile ovalongwa vae ovipuka ankho mavilekesa okuti Ouhamba wa Huku wahimbika okutumina.
Mateusi 24:7: “Mokonda otyilongo matyikalwisa otyilongo otyikuavo, ouhamba maukalwisa ouhamba omukuavo. Kovilongo ovinyingi makukamoneka ovinimawe, nondyala.”
Hono, ovalongwa va Sesusi vekahi nokuivisa Ouhamba wa Huku mouye auho.
Mateusi 24:14: “Iya onondaka ombu onongwa Mbouhamba wa Huku, mambukaiviswa kombanda yohi aiho, okuava oumbangi kovanthu vomalongo aeho iya konyima onthyulilo aiya.”