Omukanda wo Kofilyale
Vaivisi Ononthyolwa:
Putyina tukevelela onthiki onene ya Jeova, ohole tuna na Huku no omunthele yetu, yetukalesa nombili movilinga viokuivisa mokuenda kuenima liovilinga liokualamba. Mohanyi ya Tyitalale, tuahambukwa novanthu 335.900 ankho vekahi Pehinangelo Liononkhia mba Tatekulu! Tutyii okuti ovanyingi vetavela etyi tuaundapa movilinga viokukonga ovanthu veye kehinangelo. Mohanyi oyo, ovaivisi 9.785 vaundapele movilinga vioukokoli-ndyila, novakokoli-ndyila vapola pokati.
Mokuenda kuenima liovilinga, kuaonganekwa omawaneno omape alamba po 60, moluotyo, ankho kuna okuonganekwa vali ono sirkuitu onombali. Nombatelo yo programa yokutunga Onondyuo Mbomaliongiyo, kuatungwale Onondyuo 27. Tupu, kuatungwa Onondyuo Mbomaliongiyo ko Kuanza-Norte, noko Zaire. Opo tutyivile okutualako novilinga ovio vikahi nokuliyawisa, kuaonganekwa vali ono grupu onombali, mbuundape kumue nononkhuana ankho mbukahikuale.
Mohanyi ya Tyitalale ko Luanda kualingwa Otyonge tyotete Tyonthiki Ike melaka lio Kimbundu, ankho pena 1.910 yovanthu. Tyayandyuluka okuti ankho vahambukwa unene. Pahe tukevelela omawaneno melaka olio komutue wandyila.
Ovilinga viokutunga vali nawa Ombetele vikahi nokuenda nawa, iya tuna ombatelo yovalinepi ovanyingi vatunda kovilongo ovikuavo, novakuatate vamue vo motyilongo tyetu nkhele vahanepele. Ombili yavo, nokuelipakula nomutima auho, itupameka okutualako ‘okunkhimaneka Jeova novipuka vietu aviho viakolela.’—Pro. 3:9.
Tyotyili tukahi momuvo umue omuwa unene! Tuna elao limue enene liokuiwa Jeova, nokunoñgonoka ehando liae, nokulinga ehando olio!
Vaivisi Vouhamba ononthyolwa
Ovakuatate venyi,
Ofilyale yo Angola