Ovilinga Viokuivisa Vipameka Oupanga Wetu na Jeova
1. Ovilinga viokuivisa vituetela ouwa patyi?
1 Okuundapa nombili movilinga viokuivisa tyipondola okupameka oupanga wetu na Jeova nokuyawisa ehambu lietu. Tyotyili, onthue tuundapa movilinga viokuivisa haunene pala okuhambukiswa Jeova. Mokonda yokutavela otyitumino “tyokuivisa ondaka,” tupewa ononkhano onongwa na Jeova, nokuvatelwa mononkhalelo ononkhuavo. (2 Tim. 4:2; Isa. 48:17, 18) Mahi, oñgeni ovilinga viokuivisa vipondola okutupameka, nokutuetela ehambu?
2. Oñgeni ovilinga viokuivisa vitupameka?
2 Tupamekwa Nokupewa Ononkhano Onongwa: Ovilinga viokuivisa vituavela ondundo yokuyumba onthumbi Mouhamba wa Huku, atuhayeke ovitateka vitusoyese. (2 Cor. 4:18) Okulongesa otyili Tyombimbiliya tyipameka ekolelo lietu momilao via Jeova, nokuyawisa olupandu luetu kotyili. (Isa. 65:13, 14) Tyina tukuatesako vakuetu okulinga oupanga na Jeova, “nokuhalingi onthele youye,” nonthue tupameka etokolo lietu liokuhalingi onthele youye.—João 17:14, 16; Rom. 12:2.
3. Oñgeni ovilinga vietu viokuivisa vitukuatesako okukala novituwa vio Vakristau?
3 Okuundapa movilinga viokuivisa tyitukuatesako okukala novituwa vio Vakristau. Mongeleka, okulinga ononkhono pala “okukala ovipuka aviho kovanthu aveho,” tyitukuatesako okukala nomutima weliola. (1 Cor. 9:19-23) Tyina tupopia na vana “vakunyauninwa vala kononthele ambuho, ngo nongi mbuhena omunthita,” tulilongesa okukala nokankhenda. (Mat. 9:36) Tulilongesa okukala noumphwa lundo tyina tukoleleya namphila ovanthu vehetavela, ine vetulinga oundyale. Ehambu lietu liliyawisa tyina tuundapesa omuenyo wetu pala okukuatesako vakuetu.—Atos 20:35.
4. Oñgeni utala ovilinga viove viokuivisa?
4 Ononkhano onongwa okuundapa movilinga vihivilika Una watokala efendelo lietu! Ovilinga viokuivisa vitupameka. Tupu vietela ononkhano onongwa aveho vekahi nokuundapa nombili movilinga ‘viokuava oumbangi wonondaka onongwa.’—Atos 20:24.