Ovilinga Vietu Viokuivisa—Vilekesa Okuti Tuna Ohole na Huku
1. Ohole Jesus ena na Huku yemuavelele ondundo yokulinga tyi?
1 Ohole yalundile Jesus okufuisapo ovilinga viae viokuivisa. Ovipuka aviho Jesus alingile movilinga viokuivisa vilekesa nawa ohole ena na Jeova. Jesus wati: “Opo ouye utyinoñgonoke okuti ame ndyihole Tate, ame ndyilinga ngetyi Tate anthuma.” (João 14:31) Mokonda tuvalanduli va Jesus, nonthue tuna elao liokulekesa ohole onene na Huku, movilinga vietu viokuivisa.—Mat. 22:37; Efé. 5:1, 2.
2. Ohole tuna na Jeova itulunda okulinga tyi movilinga vietu viokuivisa?
2 “Enyina Liove Linkhimanekwe”: Onthue tulekesa ohole yetu ku Jeova nokunkhimaneka enyina liae tyina tuovola kese omphitilo pala okupopila ovanthu aveho nombili konthele ya Jeova Nouhamba wae. (Sal. 83:18; Eze. 36:23; Mat. 6:9) Ngetyi tyaendele ovilinga viokuivisa via Jesus, ovilinga vietu viokuivisa vilekesa okuti tuna ehando enene opo enyina lia Jeova linkhimanekwe nehando lia lilingwe.—Mat. 26:39.
3. Omonkhalelo patyi ohole tuna na Jeova itukuatesako okufinda ovitateka?
3 Ohole Itulunda Okufinda Ovitateka: Ohole tuna na Jeova, ilamba ovitateka aviho. (1 Cor. 13:4, 7) Jesus wamuene ononkhumbi momuenyo wae mahi kayekelepo ovilinga viae viokuivisa. Mahi, tyina avasiwa novitateka, ohole, nehando liae liokulinga ehando lia Jeova viemukuatesako okufinda kese tyitateka. (Mar. 3:21; 1 Ped. 2:18-23) Nonthue tuna ovitateka ovinyingi, mahi ohole tuna na Huku, ipondola okutukuatesako okufinda ovitateka. Inkha tulandula nawa ongeleka ya Kristu, matukala nonthumbi yokuti matutyivili okufwisapo ovilinga vietu viokuivisa. Namphila tuna ovitateka konthele yekongoko, nokuyalwa nombunga, nokukulupa, ine ovanthu tuivisa vehetavela, otyo katyitutyilika okulekesa ohole yetu ku Jeova nokufwisapo nawa ovilinga vietu viokuivisa.
4. Ohole tuna na Jeova ituavela ondundo yokulinga tyi?
4 Ohole ina ononkhono ononene, iya onthue tuna elao liokulekesa ohole tuna na Huku movilinga vietu viokuivisa. (1 Cor. 13:13) Tuyekei “ohole yetu itualeko okuliyawisa vali” unene mokonda omuwo wokunkhimaneka apeho enyina lia Jeova ukahi popepi.—Fil. 1:9; Mat. 22:36-38.