Okuti Upondola Okuundapa Vali Unene Movilinga Viokuivisa?
1. Omokonda yatyi ovilinga vietu viokuivisa viesukisa okulingwa nondyanga?
1 Etyi Jesus atala okuti otyinyingi tyovanthu valekesa esuko konondaka onongwa Mbouhamba, walongesa ovalongwa vae okuti, “itei ku Muene wovilinga opo atume ovaundapi kovilinga viae viokuteya.” (Mat. 9:37, 38) Mokonda tukahi konthyulilo yokuteya, ovilinga vietu viesukisa okulingwa vali nondyanga. Otyo tyilekesa okuti tuna okulikuambela nokutala oñgeni tupondola okufuisapo vali nawa ovilinga vietu viokuivisa.—João 14:13, 14.
2. Oityi vamue valinga etyi veiva okuti kuesukisa vali ovaundapi movilinga viokuivisa?
2 Ononkhalelo Mbokuundapa Vali Unene Movilinga Viokuivisa: Nehongolelo, nekuateso lia Jeova, ovanthu ovanyingi vekahi nokunyingila movilinga vioukokoli-ndyila. (Sal. 26:2, 3; Fil. 4:6) Vamue valinga ononkhono pala okuundapa ngovakokoli-ndyila vapola pokati, like ine onohanyi mbumue mokueenda kuenima. Oyo onkhalelo imue ongwa pala okuundapa vali unene movilinga viavo viokuivisa. Ehambu liokuundapa movilinga ovio, liaavela ondundo ovanyingi puvo okuundapa movilinga vioukokoli-ndyila.—Atos 20:35.
3. Inkha kohale waundapele ngomukokoli-ndyila, oityi mohande okulinga pahetyino?
3 Okuti Upondola Okukondoka Okuundapa Movilinga Vioukokoli-Ndyila?: Inkha ove waundapele movilinga vioukokoli-ndyila, tyotyili uhinangela omuwo oo nehambu. Okuti uhole okulikuambela opo ukale nomphitilo yokukondoka okuundapa movilinga vioukokoli-ndyila? Hamue ovitateka ankho viekutyilika okuundapa movilinga ovio, viatetululuale. Pahe omuvo wehikapo opo ukondoke okuundapa vali movilinga vioukokoli-ndyila.—1 João 5:14, 15.
4. Omphitilo patyi atuho tuna?
4 Ovilinga viokuteya vikahi nokukanyauka, iya apa katutu mavipu. (João 4:35, 36) Atuho tutalei onkhalelo yetu opo tutokole inkha tupondola okuonganeka nawa ovilinga vietu via kese nthiki opo tuundape vali unene movilinga viokuivisa. Inkha tuatala okuti kamatutyivili okuundapa movilinga vioukokoli-ndyila, tupondola okutala ononkhalelo ononkhuavo mbokuundapa vali nounongo movilinga viokuivisa? (Mar. 12:41-44) Aveho hono vaundapeswa na Jeova pala okuundapa movilinga ovio viakolela, vena elao enene!—Sal. 110:3.