Hivilika Jeova Kese Nthiki
1. Ovaumbili va Huku vaavelwa ondundo yokulinga tyi, iya omokonda yatyi?
1 Ohamba David wapopia etokolo liae liokuhivilika Jeova “kese nthiki” alo komivo viahapu. (Sal. 145:2, 7, 21) Nonthue tuna ehunga ewa pala okuhivilika Jeova kese nthiki.—Sal. 37:10; 145:14, 18; 2 Ped. 3:13.
2. Oñgeni onombunga mbupondola okuhivilika Jeova kese nthiki?
2 Tuhivilikei Jeova Meumbo Lietu: Onthue tuna omikanda vituvatela okutomphola konthele Yondaka ya Huku tyina tulinga o testu yonthiki, tyina tulinga Elilongeso Liombunga, na tyina tulipongiya pala omaliongiyo. Onombunga ononyingi valinga ononkhono opo valie kumue kongulohi. Otyo tyivekuatesako okutomphola nokuahiliya, nokukala nomphitilo yokuhivilika Jeova. Okuhimbika okutomphola novana, tyipondola okukuatesako unene ovohe okutekula ovana vavo “montheto no movitumino via Huku.”—Efé. 6:4; Deut. 6:5-7.
3. Onomphilo patyi tuna tyina tukahi novakuatate vetu?
3 Tuhilivikei Jeova Kumue Novakuatate Vetu: Tyina tukahi movilinga viokuivisa ine momaliongiyo omewaneno, tuna onomphitilo onongwa pala okuhivilika Jeova novakuatate vetu. (Pro. 15:30; Fil. 4:8; Heb. 13:15) Mokonda atuho tuna ohole na Jeova, tyina tupopia navakuetu kamatyitupuilisa okupopia konthele youwa wae.—Sal. 106:1.
4. Omononkhalelo patyi ononkhuavo ove upondola okuhivilika Jeova?
4 Hivilika Jeova Tyina Upopia Navana Vehelilongesa Ombimbiliya: Namphila pamue katupondola okuundapa movilinga viokuivisa kese nthiki mokonda yonkhalelo yetu, okupopia navana tuundapa navo, tulilongesa navo, navakuavo vali vekahi ponthele yetu konthele ya Jeova nehando liae, tyipondola okukuatesako ovanthu vokuna omutima waviuka okukala nekevelelo. (Sal. 27:14; 1 Ped. 3:15) Omphange umue ankho ukahi nokuendela mo aviau, waavelele oumbangi omunthu umue ankho ukahi ponthele yae. Omunthu oo apamekwa unene netyi eiva, apopila omphange apa akala nokumuavela onumelu yae yotelefone, opo vatualeko nokutomphola. Putyina ovitateka vitualako nokuliyawisa mouye uno, ovanthu va Jeova vatualako nokuivisila vana vafuapo pala okutehelela “onondaka onongwa mbovipuka oviwa.” Otyo tyiavela vakuetu ekevelelo, nomphitilo yokuhivilika Jeova.—Isa. 52:7; Rom. 15:11.
5. Omokonda yatyi tuhanda okuhivilika Jeova, iya oñgeni tupondola okutyilinga?
5 Tyotyili, Jeova uhambukwa unene okutehelela tyina ovaumbili vae vemuhivilika kese nthiki! Ngetyi ovipuka aviho vimoneka Jeova alinga vimuhilivika, nonthue tupondola okuhivilika Jeova momaumbo etu, mewaneno, natyina tupopia navakuetu nkhele vehenehimbike okuhivilika Jeova.—Sal. 19:1-4.