Ovola Vana Vahanda Okutehelela
1. Oñgeni matulekesa okuti tupanda elao liokuundapa movilinga viokuivisa?
1 Mokueenda kuovilinga viokuivisa via Jesus, oe waendele unene pala okupameka ovatendi nonondaka onongwa. (Isa. 61:1, 2) Ngovatumwa vekahi pomphangu ya Kristu, onthue hono tuna elao liokumuhetekela pokuovola nombili vana vahanda okutehelela motelitoliu yetu.—Mat. 10:11; 2 Cor. 5:20.
2. Oñgeni Paulu apilulula onkhalelo yae yokuava oumbangi, iya ouwa patyi apolako?
2 Okupilulula Onkhalelo Yokuava Oumbangi: Apostolu Paulu ankho wetyiliya okuenda tete monondyuo ambuho mbokufendela pala okukaivisila ova Judeu navana ankho veheva Judeu. (Atos 14:1) Mo Filipu, Paulu na Sila vakaovolele ovanthu ankho ‘vekahi pomphangu yokulikuambela.’ Ovo vahimbika okuava oumbangi kovakai ankho vekahipo, iya Lidia, umwe povakai ovo etavela liwa otyili.—Atos 16:12-15.
3. Onomphitilo patyi ononkhuavo tupondola okukala nambo tyina tuhekahi nokuivisa umbo na umbo?
3 Okuti tyina wehekahi movilinga viokuivisa umbo na umbo, upondola okuivisila ovanthu pana patalamena omatuku-tuku, povilinga, pana pakuata unene ovanthu, ponopalasa, nomo novenda mbukahi motelitoliu yove? Hamwe upondola okukaava oumbangi kovanthu vana vakala mo nondyuo ononene mbuyungwa novanthu, okuvehonekela omikanda ine okutelefonala. Okutala nawa, nokupilulula onkhalelo yokuava oumbangi motelitoliu yove, matyikuvatela okukala “novilinga ovinyingi movilinga via Tatekulu.”—1 Cor. 15:58.
4. Oityi tupondola okulinga inkha otelitoliu yewaneno lietu onthutu?
4 Ovaivisi ovanyingi vena omphitilo yokuundapa vali unene movilinga viokuivisa pokuilukila kewaneno ekuavo, motyilongo tyavo muene ine kotyilongo otyikuavo. Ovakuavo velilongesa elaka ekuavo opo vaivisile ovanthu vokuatunda kovilongo ovikuavo.
5. Oñgeni tuna okutala omuvo tukahi hono, iya oityi tuna okutokola okulinga?
5 Atuho tuna okunoñgonoka okuti “epia ouye.” (Mat. 9:37; 13:38) Mokonda onthyulilo youye uno ikahi popepi, kese umwe una okutala nawa onkhalelo yae, ounongo, no nomphitilo pala okuyawisa ovilinga viae viokuivisa. Jeova utuavela onthumbi yokuti inkha tupaka tete omasuka Ouhamba, oe maavela ononkhano onongwa ononkhono tulinga pala okuyawisa ovilinga vietu viokuivisa. —Mat. 6:33.