Lekesa Ohole Yotyotyili Kovalongwa Vove
1. Oityi tyesukisa pala okuvatela omulongwa?
1 Pala okuvatela omulongwa wo Mbimbiliya alo ehika kelipakulo, tyesukisa vali unene tyipona vala okulilongesa nae Ombimbiliya apeho. Apostolu Paulu waeleka oupanga wae navana ankho alongesa, na ina wokuna oluembia ulela ovana vae. Nonthue tuna ehambu liokuavela “omuenyo wetu” opo tuvatele ovalongwa vetu okukula mopaspilitu.—1 Tes. 2:7-9.
2. Omokonda yatyi tuesukisa okulekesa esuko komulongwa, iya oñgeni tupondola okutyilinga?
2 Lekesa Esuko Komulongwa: Putyina omulongwa aundapesa etyi ekahi nokulilongesa, omutima wae maumuhindila okuyekapo oupanga na vana vahalandula ovitumino Viombimbiliya. (1 Ped. 4:4) Ombunga yae ipondola okumuyala. (Mat. 10:34-36) Tupondola okumuvatela pokumulekesa esuko liotyotyili. Omukuatate umwe o missionaliu wokuna omanima omanyingi movilinga ovio, ulondola okuti: “Tyina wamamane okulilongesa nomulongwa, wahatundepo liwa. Inkha tyitavela, pumphama iya amutomphola po katutu.” Tala nawa opo ukuateseko omulongwa wove. Mongeleka, upondola okutelefonala ine okukemutalelapo tyina avela? Inkha tyitavela, upondola okupumphama nomulongwa wove momaliongiyo nokumuvatela okuyunga ovana?
3. Oñgeni tupondola okukuatesako omulongwa wetu okupewa epameko newaneno?
3 Ombatelo Yewaneno: Inkha ukahi nokuundapa movilinga viokuivisa popepi neumbo liomulongwa wove, omokonda yatyi kukemutalelapo liwa, nokumulekesa ou muatunda nae? Ovikando vimwe upondola okukonga ovavisi velikalela, okukutikinyamo ovakulu vewaneno, opo vekulandule komulongwa wove. Tupu, tyina wamahimbika okulongesa omunthu Ombimbiliya, muavela ondundo opo aye komaliongiyo Kondyuo Yomaliongiyo. Otyo matyimukuatesako okupameka oupanga novakuatate mewaneno mavakala ombunga yae yopaspilitu.—Mar. 10:29, 30; Heb. 10:24, 25.
4. Ombili yetu maituetela ondyambi patyi?
4 He uvatela ovana vae nombili, ukala nehambu tyina ovo vatokola okuama ku Jeova nokuendela motyili. (3 João 4) Nonthue tupondola okukala nehambu ngolio tyina tulekesa ohole yotyotyili kovalongwa vetu.