Oumukanda Wokukonga Ovanthu Opo Veye Kehinangelo Maviyandyaneswa Ouye Auho!
1. Ovilinga patyi mavilingwa ouye auho mokueenda kuohanyi Yehinangelo?
1 “Tyilingei lingei apeho mehinangelo liange.” (Luc. 22:19) Okutavela otyitumino otyo tya Jesus, mu 30 ya Tyitalale yo 2010, ovafendi va Jeova maveliongiya kumue na vana vokuesuka, opo vahinangele ononkhia mba Jesus. Oumukanda wokukonga ovanthu veye Kehinangelo Liononkhia mba Tatekulu, mauhimbika okuawa mouye auho mu 13 ya Tyitalale alo 30 yohanyi oyo.
2. Oñgeni matuave okamukanda kokukonga?
2 Oñgeni Matukongo Ovanthu: Avela omunthu okamukanda kokukonga opo atale olutalatu lukahipo iya opopi okuti: “Mu 30 ya Tyitalale, ovanthu ovanyingi mouye auho maveliongiya pala okuhinangela ononkhia mba Jesus. Ndyikahi nokukuavela okamukanda aka opo ukale peliongiyo olio nombunga yove. Tupu upondola okukonga omapanga ove.” Inkha una omuvo, upondola okutanga Lucas 22:19 opo ulekese Movihonekwa otyitumino otyo, no ola, nomphangu apa malikalingilwa. Hinangela okuti mokonda omuvo kauhi pala okuundapa otelitoliu aiho, otyiwa okuhapopi unene.
3. Ovalie tupondola okukonga?
3 Inkha ewaneno liove lina otelitoliu onene, ovakulu vewaneno mavemutolela opo musepo omikanda ovio pomaumbo ana muhavasile nawike. Inkha tyitavela, upondola okuava okamukanda kokukonga kumue Nomutala Womulavi no Despertai! Ovola okukonga vana uhole okukatalelapo, ovalongwa vove Vombimbiliya, ombunga, vana ulilongesa navo kosikola, na vana uundapa navo, ovomunthele, novakuavo vali.
4. Okunoñgonoka nokupandula ohole ya Jeova mokuetuavela ofeto yeyovo, matyituavela ondundo yokulinga tyi?
4 Lipongiya Opo Uundape Nombili: Monohanyi Mbehinangelo, omuvo omuwa pala okuyawisa ovilinga vietu. Okuti upondola okuovola omuvo opo uundape ngomukokoli-ndyila wapola pokati? Una ovana ine ovalongwa Vombimbiliya vekahi nokukula nawa mopaspilitu? Inkha una, kapopie novakulu vewaneno opo vatale inkha vafuapo pala okuundapa movilinga ovio ngovaivisi vehenembatisalwe. Okunoñgonoka nokupandula ohole ya Jeova mokuetuavela ofeto yeyovo, matyituavela ondundo yokukala Pehinangelo, nokukonga ovanthu veliongiye nonthue.—João 3:16.