Kala Omunongo Tyina Ulongesa
1. Okuundapesa nounongo Ondaka ya Huku muakutikinya tyi?
1 Nga Paulu, ovaivisi ovanongo, vaimbuka okuti “okuundapesa nawa ondaka yotyili” muakutikinya vali tyipona vala okupopia konthele Yovihonekwa Vikola. (2 Tim. 2:15) Tyina tuundapesa Ondaka ya Huku, oñgeni tupondola okuundapesa ‘ounongo’ mokulongesa?—Atos 28:23.
2. Oñgeni tupondola okuvatela omunthu okuyawisa onthilo yae Mondaka ya Huku?
2 Yeka Ondaka ya Huku Ipopie: Tete, undapesa Ombimbiliya monkhalelo omuteheleli aimbuka okuti Ombimbiliya ina ounongo wa Huku. Onthumbi tuna Mondaka ya Huku ipondola okulunda omunthu okutehelela nawa otestu ikahi nokutangwa. (Heb. 4:12) Tupondola vala okupopia okuti: “Ame naimbuka okuti tyakolela okunoñgonoka etyi Huku asoka konthele yotyo. Tala etyi Ondaka yae ipopia.” Inkha tyitavela, tanga Mondaka ya Huku opo omunthu atehelele.
3. Tyina tuamatange otestu, oityi tupondola okulinga opo tukuateseko omuteheleli wetu okunoñgonoka nawa?
3 Vali, hangununa otestu watanga. Kovanthu ovanyingi katyapepukile okunoñgonoka oversikulu tyina veitanga otyikando tyotete. Pamwe tuesukisa okuhangununa esilivilo otestu ina. (Luc. 24:26, 27) Lekesa motestu onondaka mbelikuata netyi ukahi nokupopia. Okulinga epulo omuteheleli, tyipondola okukuvatela okutala inkha anoñgonoka nawa etyi tyapopiwa.—Pro. 20:5; Atos 8:30.
4. Oityi vali tyesukisa opo tukale ovanongo tyina tulongesa?
4 Popia Konthele Yovihonekwa: Tatu, linga ononkhono pala okuhika komutima. Kuatesako omunthu okutala oñgeni apondola okuundapesa otestu momuenyo wae. Okupopia konthele Yovihonekwa tyipondola okuhindila omunthu okupilulula onkhalelo yae yokusoka. (Atos 17:2-4; 19:8) Mongeleka, tyina tuamatange Salmo 83:18, tupondola okupopia oñgeni okunoñgonoka enyina liomunthu tyakolela pokulinga oupanga. Iya upondola okupula: “Oityi ove usoka, okuti okunoñgonoka enyina lia Huku matyikuvatela opo omalikuambelo ove akale vali nesilivilo?” Tyakolela unene okuundapesa otestu monkhalelo imwe ilikuata kumwe nomuenyo womunthu. Ounongo oo wokulongesa Ondaka ya Huku, tyivatela vana vokuna omutima waviuka okufenda Huku yotyotyili Jeova.—Jer. 10:10.