Ndyikahi Nokulinga Etyi Tyituuka Movilinga Viokuivisa?
1. Esuko patyi Omukristau wekolelo apondola okukala nalio?
1 Onthiki imwe welilingile epulo olio? Ove hamue kuundapa vali unene movilinga viokuivisa mokonda una ovitateka viekongoko, wakulupa, ine eliyawiso liovilinga viombunga, vikusoyesa. Omphange umue una ovana vetatu wahoneka okuti pamue ulivela onombei mokonda omuwo nononkhono mbesukisa pala okutekula ombunga yae vimutyilika okuundapa unene movilinga viokuivisa. Oityi matyituvatela okutala ovipuka monkhalelo yapola pokati?
2. Oityi Jeova akevelela kuonthue?
2 Etyi Jeova akevelela kuonthue: Tyotyili, atuho tuhanda okuundapa unene movilinga viokuivisa. Mahi, etyi tuhanda okulinga tyelikalela unene netyi tupondola okulinga. Mokonda tuhanda okuundapa vali unene otyo tyilekesa okuti tutupu ondende. Onthue tuna okuhinangela okuti Jeova wii nawa onkhalelo yetu iya ketuiti tulinge etyi tuhevili. (Sal. 103:13, 14) Oityi Jeova akevelela kuonthue? Oe uhanda tumuumbile nomuenyo wetu auho, okulinga atyiho tuvila.—Col. 3:23.
3. Oñgeni matutale ononkhono mbetu tukahi nokulinga movilinga viokuivisa?
3 Oityi matyitukuatesako okutokola etyi tyaviuka pala onthue? Tupondola okuita ku Jeova etukuateseko okutala onkhalelo yomuenyo wetu. (Sal. 26:2) Okuyumba onthumbi mepanga Omukristau wekula mopaspilitu utuii nawa iya utupu owoma wokututolela etyi tuesukisa okulinga tyipondola okutuvatela. (Pro. 27:9) Tupu, hinangela okuti mokonda onkhalelo yomuenyo ipiluluka, otyiwa okutala nawa apeho onkhalelo yomuenyo wetu.—Efé. 5:10.
4. Oñgeni tuna okutala omahinangeleso Ombimbiliya konthele yovilinga viokuivisa?
4 Oñgeni Tutala Omahinangeleso Konthele Yovilinga Vietu: Tyina ovanthu vahateka opo vafetue, vana vekahi nokuvetala veveavela ondundo. Valinga ngotyo opo ovanthu vokuhateka vahasoye. Tupu, ondundo nomahinangeleso Ombimbiliya tupewa momaliongiyo etu nomomikanda vietu opo ‘tuivise ondaka nondyanga’ opala ouwa wetu, katyilekesa okuti ononkhono tukahi nokulinga kambuhi. (2 Tim. 4:2) Onthue tupondola okukala nonthumbi yokuti tyina tuovola okuundapa vali, Jeova mahinangela ‘ohole novilinga vietu’ tumulingila.—Heb. 6:10.