Okuti Nthiki Imwe Waundapeliale Ngomukokoli-ndyila?
1. Omphitilo patyi ovanthu ovanyingi vena, mahi oityi vamwe vesukisa okulinga?
1 Mokueenda kuomanima, ovanthu ovanyingi vena omphitilo “yokulongesa, nokuivisa umbo na umbo onondaka onongwa” movilinga viomuvo auho. (Atos 5:42) Mahi, vamwe vayekapo okuundapa ngovakokoli-ndyila mokonda yomahunga omanyingi. Inkha waundapeliale ngomukokoli-ndyila, okuti watala nawa onkhalelo yove yomuenyo inkha upondola okuundapa vali ngomukokoli-ndyila?
2. Omokonda yatyi vana ankho vayekapo ovilinga vioukokoli-ndyila kohale, vesukisa okutala nawa onkhalelo yavo yomuenyo?
2 Onkhalelo Yomuenyo Ipiluluka: Hamwe otyitateka tyekulingisa uyekapo ovilinga vioukokoli-ndyila katyipo vali. Mongeleka, inkha wayekelepo ovilinga vioukokoli-ndyila mokonda ankho kutyivili okutuukisa onoola 90 mohanyi, okuti pahe kumetyivili okuava onoola 70? Okuti pahe kuundapa vali unene kovilinga ngetyi ankho uundapa, ine ombunga yove ankho utekula yatepuluka etyi wayekapo ovilinga vioukokoli-ndyila? Omphange umwe ankho wayekapo ovilinga vioukokoli-ndyila mokonda yekongoko, pahe nomanima 89, wakondoka vali movilinga ovio. Oe wakala omanima omanyingi tyihaende vali kosipitali iya elitehelela okuti ekongoko liae likahi nawa pala okukondoka vali movilinga vioukokoli-ndyila!
3. Oñgeni aveho mombunga vapondola okuundapela kumwe opo vakuateseko umwe mombunga aundape ngomukokoli-ndyila?
3 Ove hamwe nalumwe waundapele ngomukokoli-ndyila, mahi umwe mombunga yove wayekapo ovilinga vioukokoli-ndyila opo atekule umwe mombunga wakulupa. (1 Tim. 5:4, 8) Inkha ongotyo, okuti ove ine vakuenyi mombunga mupondola okukuatesako una wayekapo ovilinga vioukokoli-ndyila? Omokonda yatyi kamutompholela konthele oyo? (Pro. 15:22) Tyina aveho mombunga vaundapela kumwe opo umwe aundape ngomukokoli-ndyila, amuho mupondola okulitehelela okuti mukahi nokuundapa.
4. Oityi una okulinga inkha onkhalelo yove yomuenyo hono kaitavela ukale vali omukokoli-ndyila?
4 Uhasoye inkha onkhalelo yove yomuenyo kaitavela opo uhimbike okuundapa vali ngomukokoli-ndyila. Ehando liove liokutyilinga tyihambukiswa Jeova. (2 Cor. 8:12) Undapesa movilinga viokuivisa ounongo wakala nao etyi ankho umukokoli-ndyila. Likuambela opo upameke ehando liove liokukondoka movilinga ovio, nokutala onomphitilo mbokupilulula onkhalelo yove yomuenyo. (1 João 5:14) Hamwe, mokueenda kuomuvo, Jeova “mekuikulila epito limwe enene liovilinga” opo ukale vali nehambu liokuundapa movilinga vioukokoli-ndyila!—1 Cor. 16:9.