Okuava Oumbangi Monondyila Monkhalelo Yaviuka
1. Oñgeni tupondola okuhetekela Jesus?
1 Mokueenda kuovilinga via Jesus viokuivisa, oe ankho upopia novanthu avasa metapalo no ponomphangu ononkhuavo. (Luc. 9:57-61; João 4:7) Oe wahandele okupopila ovanthu ovanyingi onondaka mbae mbakolela. Hono, okuava oumbangi monondyila onkhalelo imwe ongwa pala okukuatesako ovanthu okukala nounongo wa Huku. (Pro. 1:20) Ovilinga vietu maviliyawisa inkha tuovola okupopia novanthu nokukala ovanongo pokupopia.
2. Okuovola okupopia novanthu tyina tuundapa monondyila muakutikinya tyi?
2 Ovola Okupopia Novanthu: Otyiwa okuenda apa ovanthu vekahi tyipona vala okutalama ine okupumphama pomphangu imwe okevelela ovanthu vekahi nokulamba veye kuove. Popia noundyandyi, tala komunthu, nokukala tyahiliya, ngatyina epanga liove. Inkha ukahi nokuundapa novaivisi vakuenyi, otyiwa okuliyapuka amuhaende amuho okukapopia nomunthu wike. Tupu, wesukisa okulinga ononkhono pala okukatalelapo ovanthu valekesa esuko. Inkha tyitavela, konthyulilo yetompho pula oñgeni upondola okumuvasa opo mutomphole vali. Ovaivisi vamwe vaundapa apeho pomphangu ike vala opo vetyivile okupopia novanthu vapopiliale navo opo vatualeko okulunda esuko liavo.
3. Oñgeni matulekesa okuti tuvanongo tyina tuava oumbangi monondyila?
3 Kala Omunongo Pokupopia: Holovona nawa opi motalama nou motomphola nae. Katyesukisile okuava oumbangi ovanthu aveho vekahi nokulamba. Tala nawa. Mongeleka, inkha omunthu alumbana, otyiwa okumuyeka alambe. Tyina wiivisa ponthele yonovenda, popia liwa opo ulityilike okunguanguanesa muene wovenda. Pamwe, otyiwa okuava oumbangi ovanthu vekahi nokulupuka movenda tyipona vana vekahi nokunyingila. Ivisa monkhalelo imwe ihanumanesa ovanthu. Tupu, tala nawa tyina wava omikanda. Inkha omunthu kalekesile unene esuko, muavela otratadu tyipona okumuavela Omutala Womulavi ine o Despertai!.
4. Omokonda yatyi okuava oumbangi monondyila onkhalelo imwe ongwa ihambukiswa?
4 Okuava oumbangi monondyila tyitukuatesako okuyandyanesa ombuto onyingi yotyili momuvo umwe uhehi. (Ecl. 11:6) Ovanthu vamwe tuvasa ovo vana hamwe tuhevili okuvasa peumbo tyina tuundapa movilinga viokuivisa umbo na umbo. Omokonda yatyi kulipongiya opo wave oumbangi monondyila, onkhalelo imwe ihambukiswa ilinga onthele yovilinga viokuivisa?