Omikanda Vietu Vilingwa Pala Okukuatesako Ovanthu Aveho
1. Oñgeni omupika wekolelo nokualunguka ahetekela apostolu Paulu?
1 Ngetyi apostolu Paulu apopile onondaka onongwa mononkhalelo mbelikalela opo etyivile okupopia “novanthu aveho,” omupika wekolelo nokualunguka uundapesa omikanda opo akuateseko ovanthu vena omatavelo nomihoko vielikalela. (1 Cor. 9:22, 23) Moluotyo, opo tutyivile okuundapesa nawa Omutala Womulavi no Despertai! tuesukisa okunoñgonoka nokuhinangela ovalie omikanda ovio viahonekelwa.
2. O Despertai! yalingilwa valie?
2 O Despertai!: Omukanda ou walingua pala okukuatesako ovanthu velifwa navana apostolu Paulu apopile etyi apopila “ovalume voko Atena.” (Atos 17:22) Ovalume ovo ankho ha Vakristau, iya ankho vena enoñgonoko liehehi Liovihonekwa. Tupu, o Despertai! yalingwa pala ovanthu vena enoñgonoko liehehi ine vehena enoñgonoko Liombimbiliya. Pamwe kavetyii natyike konthele yomalongeso Ovakristau, vapondola okukala tyelihaika nongeleya, ine pamwe kavetyii okuti Ombimbiliya ina esilivilo enene. O Despertai! yalingwa pala okukuatesako ovatangi vetavela okuti kuna Huku yotyotyili. Tupu yalingwa pala okupameka ekolelo Mombimbiliya nokukuatesako omutangi okunoñgonoka okuti Onombangi mba Jeova velikalela konongeleya ononkhuavo.
3. Omutala Womulavi wounyingi no wokulilongesa walingilwa valie?
3 Omutala Womulavi: Omutala Womulavi pala ounyingi, walingilua ovatangi vena onthilo na Huku, Novihonekwa. Vena enoñgonoko limwe Liombimbiliya, mahi kavanoñgonoka nawa omalongeso Ombimbiliya. Ovo velifwa novanthu vana Paulu apopia okuti vena “onthilo na Huku.” (Atos 13:14-16) Omutala Womulavi wokulilongesa, wahonekua haunene pala Onombangi mba Jeova. Paulu wapopile okuti vana vatanga omikanda viae ankho vei Ovihonekwa nokuna enoñgonoko liafuapo liotyili. (1 Cor. 1:1, 2) Tupu, ononthele mbokulilongesa mbahonekwa pala vana vaya komaliongiyo etu iya vei nawa omalusoke nonondaka Onombangi vapopia momikanda viavo.
4. Omokonda yatyi tuesukisila okunoñgonoka nawa kese mukanda tuundapesa movilinga viokuivisa?
4 Namphila tuava omikanda vivali movilinga viokuivisa, ovikando ovinyingi tupopia vala omukanda wike. Mahi, linga ononkhono opo unoñgonoke nawa kese mukanda. Ngotyo motyivili okupopia etyi matyikuatesako vana uvasa.